"ވަކިވާ ކޮންމެ މެމްބަރަކަށް މެމްބަރަކު ހޯދޭހާ ޤާބިލުކަން އެބަހުރި"
ޕާޓީ ދޫކޮށް ދާ މީހުން އެތެރޭގައި މައްސަލަ އުފައްދަން އުޅުނުކަމަށް ވިދާޅުވި
ޖުމްހޫރީ ޕާޓީގެ ސްޕޯކްސްޕަރސަން ޢަލީ ޞާލިޙް
ޖުމްހޫރީ ޕާޓީއިން ވަކިވެގެންދާ ކޮންމެ މެމްބަރަކަށް އިތުރު މެމްބަރަކު ހޯދުމުގެ ޤާބިލުކަން އެބަހުރިކަމަށް ޕާޓީގެ ސްޕޯކްސްޕަރސަން ޢަލީ ޞާލިޙް ވިދާޅުވެއްޖެެއެވެ.
ރާއްޖެ ޓިވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން ޢަލީ ވަނީ, ޖުމްހޫރީ ޕާޓީއަކީ ރާއްޖޭގެ ކުރިމަގު ބިނާކުރުމަށްޓަކައި މުހިންމު ދައުރެއް އަދާކުރި، އަދާކުރަމުންދާ, އަދި ކުރިމަގުގައިވެސް މި ގޮތުގައި ދެމި އޮންނާނެ ޕާޓީއެއްކަމަށެވެ. މި މަސައްކަތުގައި އެކި ޚިޔާލުގެ އަދި އެކި ފިކުރުގެ މީހުންނާއެކު މަސައްކަތް ކުރާއިރު، އަބަދުވެސް މަސައްކަތް ކުރާނީ އެންމެން ގޮވައިގެން ކުރިއަށް ދިއުމަށް ކަމަށެވެ.
މި ދަތުރުގައި މިހާތަނަށް އައިއިރު ޕާޓީގެ އެތެރޭ ތިބި މީހުންނާ ތަޅަން ބަޔަކު އުޅުނު ނަމަވެސް އެކަން ވިޔަ ނުދޭނެކަން ހާމަކޮށްދީފައިވާކަމަށެވެ. މިގޮތަށް އުޅޭ މީހުން ފަހު ވަގުތު ޕާޓީ ދޫކޮށް ދާއިރު، މިގޮތަށް ދާ ކޮންމެ މެމްބަރަކަށް އާ މެމްބަރަކު ހޯދުމުގެ ޤާބިލުކަން އެބަހުރިކަމަށް ވިދާޅުވިއެވެެ.
މި ޕްރޮގްރާމްގައި ވާހަކަދައްކަވަމުން ޢަލީ ވަނީ, ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަކީ ކޯލިޝަން ހިންގުމުގެ ޗެމްޕިއަންގެ ގޮތުގައި ސިފަކުރައްވާފައެވެ. އަދި މި ސަރުކާރުގައި ޖުމްހޫރީ ޕާޓީ ދެމިއޮންނާނީ ޖުމްހޫރީ މަޝްވަރާކުރުމުގެ އުސޫލުންކަމަށެވެ. މިއަދުވެސް ޕާޓީން ގަބޫލުނުކުރާ ކަމެއް އަތުވެއްޖެނަމަ އެކަމެއް ރައީސަށް ދަންނަވައި, ހައްލުކުރުމަށް ފަސޭހަކަމަށް އޭނާ ވިދާޅުުވިއެވެ.
ވަކިވެގެންދާ ކޮންމެ މެމްބަރަކަށް އިތުރު މެމްބަރަކު ހޯދުމުގެ ޤާބިލުކަން އެބަހުރިކަމަށް ސްޕޯކްސްޕަރސަން ވިދާޅުވެފައި މިވަނީ އެ ޕާޓީގެ މެމްބަރުންތަކެއް ޕާޓީ ދޫކޮށް އިދިކޮޅާ ގުޅި, އަދި އައު ޕާޓީއެއްވެސް އުފައްދާފައިވާ ދަނޑިވަޅެއްގައެވެ. އެގޮތުން ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު ކާނަލް ރިޓަޔާޑް މުޙައްމަދު ނާޒިމާއި ކުރީގެ ޕޮލިސް ކޮމިޝަނަރު އަދި ތިމަރަފުށީ ދާއިރާގެ މެންބަރު ޢަބްދުﷲ ރިޔާޒު ވަނީ އަލަށް އުފެއްދި މޯލްޑިވްސް ނެޝަނަލް ޕާޓީއާ ގުޅިވަޑަައިގެން ފައެވެ.
