ކުޑަކުއްޖަކަށް ޖިންސީ ގޯނާ ކުރި މައްސަލައެއް ބަލަން ފަށައިފި
7 އޯގަސްޓު 2021 | ހޮނިހިރު 13:06ޖިންސީ ގޯނާ ކޮށްފައިވަނީ 14 އަހަރުގެ ކުޑަ ކުއްޖަކަށް
އަންހެނުންނަށް ކުރާ ޖިންސީ ގޯނާއާ ދެކޮޅަށް ކުރި މުޒާހަރާގެ ތެރެއިން
ކުޑަ ކުއްޖަކަށް ޖިންސީ ގޯނާ ކުރި ކަމުގެ މައްސަލައެއް ފުލުހުން ތަހުގީގުކުރަން ފަށައިފިއެވެ.
ފުލުހުން ބުނީ ހުކުރު ދުވަހުގެރޭގެ ވަގުތެއްގައި މާލޭގައި 14 އަހަރުގެ ކުޑަ ކުއްޖަކަށް ޖިންސީ ގޯނާ ކުރިކަމުގެ މައްސަލައެއް ފުލުހުންނަށް ހުށަހަޅާފައިވާ ކަމަށެވެ. މި މައްސަލަ ތަހުގީގުކުރަމުންދާކަމަށް ފުލުހުން ވަނީ ބުނެފައެވެ.
މި މައްސަލާގައި މިހާތަނަށް އެއްވެސް މީހަކު ހައްޔަރުކޮށްފައިނުވާކަމަށް ފުލުހުން ބުނެފައިވެއެވެ.
މި މައްސަލައާއި ގުޅޭ ވީޑިއޯއެއްވެސް ރޭގެ ވަގުތެއްގައި ސޯޝަލް މީޑިއާގައި އާންމުވެފައިވާއިރު، މައުލޫމާތު ލިބޭގޮތުގައި އެ ކުއްޖާއަށް ޖިންސީ ގޯނާ ކޮށްފައިވަނީ ކުއްޖާ ދިރިއުޅޭ ގެއަށް އާންމުކޮށް ގޮސް އުޅޭ ދެ މީހުންނެވެ.
މިފަހަކަށް އައިސް ޖިންސީ ގޯނާގެ ގިނަ މައްސަލަތަކެއް ފެންމަތިވަމުންދާއިރު، މިފަދަ މައްސަލަތައް ބަލަން ފަށާކަން މީޑިއާގައި ހާމަކޮށް، އެކަން ކުރާ މީހުންނަށް އެކަށީގެންވާ އަދަބެއް ނުދެވޭ ކަމީ ގިނަ ބައެއްގެ ކަންބޮޑުވުމެކެވެ.
