ކޮވިޑް-19 ވެކްސިން ނުޖަހާ އެކުވެރިންނާ ޖެނިފަރ އެނިސްޓަން ގުޅުން ކަނޑާލައިފި

ހޮލީވުޑްގެ މަޝްހޫރު ތަރި, އަދި އެންމެންގެ "ފްރެންޑް" ޖެނިފަރ އެނިސްޓަން، ކޮވިޑް-19 ވެކްސިން ނުޖަހާ އެކުވެރިންނާ ގުޅުން ކަނޑާލައިފިއެވެ.

އޭނާ މިކަން ހާމަކޮށްފައިވަނީ އިންސްޓައިލްއަށް ދިން އިންޓަރވިއުއެއްގައެވެ. ޖެނިފަރ ބުނީ ވެކްސިން ޖެހުމާ ދެކޮޅުކަން ހާމަކޮށްފައިވާ, އަދި ވެކްސިން ޖެހިތޯ ނޫންތޯ ބުނަން ބޭނުން ނުވާ އެކުވެރިންނާ ގުޅުން ކަނޑާލާފައިވާ ކަމަށެވެ. އަދި މިމީހުން ވެކްސިންޖެހުމާ ދެކޮޅުހެދުމަކީ "ފެކްޓްސް" ގަބޫލު ނުކުރުންކަމަށް އޭނާ ބުންޏެވެ.

"ފްރެންޑްސް" ސީރީޒްގައި ރޭޗަލް ގްރީންގެ ރޯލުން ފެނުނު ޖެނިފަރގެ މި އިއުލާނަށް ގިނަ ބައެއްގެ ފާޑު ކިޔުން އަމާޒުވިއެވެ. މިއަށް އޭނާވެސް ވަނީ ރައްދު ދީފައެވެ.

އެގޮތުން ވެކްސިން ޖަހާފައި ހުރެއްޖެ ނަމަ އޭނާއަށް ކޮވިޑް-19 ނުޖެހޭނެކަމަށް ބުނި މީހަކަށް ރައްދު ދެމުން އޭނާ ބުނީ، "ވޭރިއަންޓެއް ހުރި މީހެއްގެ ފަރާތުން އޭނާއަށް ބަލި ޖެހިދާނެ"ކަމެވެ. އަދި އޭގެ ސަބަބުން އޭނާ އެހާ ބަލި ނުވިޔަސް އަދި ހޮސްޕިޓަލްގައި އެޑްމިޓް ނުކުރި ނަމަވެސް އޭނާގެ ފަރާތުން  ބޮޑެތި ބަލިތައް ތަހައްމަލުކުރަމުންދާ, ނާޒުކު ހާލަތުގައި ހުރި މީހަކަށް ބަލި ޖެހިދާނެކަން އޭނާ ފާހަގަކުރިއެވެ.

އަދި މިއީ އޭނާ އެންމެ ހާސްވާކަންތައް ކަން ފާހަގަކޮށް ޖެނިފަރ ބުނީ އެހެން މީހުންނާ މެދު ވިސްނުން މުހިއްމު ކަމަށެވެ.

ގިނަ ރިސަރޗްތަކުން ދައްކާ ގޮތުގައި ވެކްސިން ޖަހާފައިވާ މީހަކަށް ވެސް ކޮވިޑް ޖެހިދާނެއެވެ. ނަމަވެސް ވެކްސިންގެ ސަބަބުން މާ ބޮޑަށް ބަލި ނުވާނެއެވެ.