މިއަހަރު ދެވަނައަށް އެންމެ ގިނަ ފަތުރުވެރިން ރާއްޖެ އައީ ޖުލައި މަހު
ޖުލައި މަހު ރާއްޖެ އައި ފަތުރުވެރިންގެ އަދަދު އެއް ލައްކައަށް އަރާ
ފަތުރުވެރިން
މިއަހަރު ދެވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ މިދިޔަ ޖުލައި މަހު ކަމަށް ޓުއަރިޒަމް މިނިސްޓްރީން ހާމަކޮށްފިއެވެ.
ޓުއަރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ ޖުލައި މަހު 101،818 ފަތުރުވެރިން ރާއްޖެ އައިސްފައިވެއެވެ. މިއާއެކު ޖުލައި މަސް ވެފައިވަނީ މިއަހަރު ދެވަނައަށް އެންމެ ގިނަ ފަތުރުވެރިން ރާއްޖެ ޒިޔާރަތްކޮށްފައިވާ މަހަށެވެ. މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ މާޗް މަހުއެވެ. އެމަހު 109،882 ފަތުރުވެރިން ރާއްޖެ އައިސްފައިވެއެވެ.
ޖުލައި މަހުގެ ތަފާސްހިސާބުތަކަށް ބަލާއިރު، ދުވާލެއްގެ މައްޗަށް އެންމެ ގިނަ ފަތުރުވެރިން އައިސްފައިވަނީ ތިންވަނަ ހަފުތާގައެވެ. ޖުލައި 15 އިން 21 އަށް ދުވާލެއްގެ މައްޗަށް 4،102 ފަތުރުވެރިން އައިސްފައިވާކަމަށް ޓުއަރިޒަމް މިނިސްޓްރީން ހާމަކުރެއެވެ. ޖުލައި މަހުގެ ފަހު ހަފުތާގައި ދުވާލެއްގެ މައްޗަށް 3،474 ފަތުރުވެރިން އައިސްފައިވާކަމަށް ޓުއަރިޒަމް މިނިސްޓްރީން ވަނީ ބުނެފައެވެ.
ކޮވިޑް-19 ހާލަތާ އެކުވެސް ފަތުރުވެރިންނަށް ރާއްޖެ ހުޅުވާލާފައިވާއިރު، މި މުއްދަތުގައި އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. މި މުއްދަތުގައި ރާއްޖެ އައި ފަތުރުވެރިންގެ 23.3 އިންސައްތަ ރަޝިއާގެ ފަތުރުވެރިން ހިއްސާކުރާއިރު، 16.9 އިންސައްތަ ހިއްސާކުރަނީ އިންޑިއާގެ ފަތުރުވެރިންނެވެ. ޖަރުމަނުން އައި ފަތުރުވެރިން 5.5 އިންސައްތަ ހިއްސާކުރެއެވެ.
މީގެ އިތުރުން މި ހިނގާ އޮގަސްޓު މަހުގެ ފުރަތަމަ ދުވަހު އެކަނިވެސް 5،424 ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ.
މި އަހަރުގެ ފުރަތަމަ ތިން މަހު ރާއްޖެ އައި ފަތުރުވެރިންގެ އަދަދުތަކަށް ބަލާއިރު، މަހަކަށް ވުރެ މަހެއް އަދަދުތައް ވަނީ އިތުރުވެފައެވެ. ޖެނުއަރީ މަހު 92,103 ފަތުރުވެރިން ރާއްޖެ އައި އިރު، ފެބްރުއަރީ މަހު އެ އަދަދު ވަނީ 96,882 އަށް އިތުރުވެފައެވެ. އަދި މާޗު މަހު ރާއްޖެ އައި ފަތުރުވެރިންގެ އަދަދު ލައްކައަކަށް ވުރެ މައްޗަށް އަރާފައިވާއިރު، މިއީ ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލި ފަހުން އެއް މަހެއްގައި ލައްކައަކަށް ވުރެ ގިނަ ފަތުރުވެރިން އައި ފުރަތަމަ ފަހަރެވެ. އެމަހު 109,585 ފަތުރުވެރިން ވަނީ އައިސްފައެވެ. ނަމަވެސް އޭޕްރިލް މަހު މި އަދަދު ވަނީ 91,200 އަށް ވެއްޓިފައެވެ.
މެއި މަހު 64,613 ފަތުރުވެރިން ރާއްޖެ އައިސްފައިވާއިރު، ޖޫން މަހު ރާއްޖެ އައިސްފައި ވަނީ 56,166 ފަތުރުވެރިންނެވެ. ރާއްޖެ އަންނަ ފަތުރުވެރިންގެ އަދަދު މެއި އަދި ޖޫން މަހު ދަށްވެގެން ދިއުމަށް ފަހު ޖުލައި މަހު މި އަދަދު ވަނީ އެއް ލައްކައަށް އަރާފައެވެ.
މިއާއެކު މިއަހަރުގެ މިހާތަނަށް ޖުމްލަ 612،367 ފަތުރުވެރިން ރާއްޖެ ޒިޔާރަތްކޮށްފައިވާކަމަށް ވަނީ ރެކޯޑުކޮށްފައެވެ. މިއަހަރު ނިމުމުގެ ކުރިން އެއް މިލިއަން ފަތުރުވެރިން ރާއްޖެ ގެނައުމަކީ ސަރުކާރުގެ އަމާޒެކެވެ.
