2.2 ބިލިއަން ރުފިޔާއާ އެކު މިރާ އަށް މަހަކު އެންމެ ބޮޑު އާމްދަނީއެއް ލިބުނީ މިއަހަރުގެ ޖެނުއަރީ މަހު!
ޖެނުއަރީ މަހު 2.2 ބިލިއަން ރުފިޔާ މީރާ އަށް ވަނީ ލިބިފަ
މީރާ
ވޭތުވެދިޔަ ޖަނުއަރީ މަހު މީރާއަށް 2.2 ބިލިއަން ރުފިޔާ ބަލައިގެންފައިވާ ކަމަށް އެ އޮތޯރިޓީން ބުނެފިއެވެ.
ދައުލަތުގެ ޓެކްސް އިދާރާ މޯލްޑިވްސް އިންލެންޑް ރެވެނިއު އޮތޯރިޓީ މިރާ އިން ބުނީ މިއީ މަހެއްގެ ތެރޭގައި އެންމެ ގިނަ ފައިސާ މިހާތަނަށް އެއޮތޯރިޓީން ބަލައިގަތް ފަހަރު ކަމަށެވެ.
މީރާގެ ތަފާސްހިސާބުގައި ވާގޮތުން، މި އަދަދަކީ 2016 ވަނަ އަހަރުގެ މި މުއްދަތާ އަޅައިބަލާއިރު 27.2 ޕަސެންޓް އިތުރު އަދަދެކެވެ. އަދި މިއީ ނިމިދިޔަ ޖަނުއަރީގައި ލިބޭނެ ކަމަށް އަންދާޒާ ކުރި އަދަދަށް ވުރެ 26.1 ޕަސެންޓް އިތުރު އަދަދެއް ކަމަށް މީރާ އިން ބުނެއެވެ.
މީރާގެ އާމްދަނީ މިހާ ބޮޑުވެފައިވަނީ ބީޕީޓީ އަދި ޓޫރިޒަމް ލޭންޑް ރެންޓްގެ ގޮތުގައި ލިބިފައިވާ އަދަދު އިތުރުވުމުން ކަމަށް އެ އޮތޯރިޓީން ބުނެއެވެ.
ޖަނުއަރީ މަހު ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ބީޕީޓީ އެވެ. އެގޮތުން ބީޕީޓީގެ ގޮތުގައި 943.88 މިލިއަން ރުފިޔާ މީރާ އަށް ބަލައިގަނެފައިވާ އިރު މިއީ ޖެނުއަރީގެ އާމްދަނީގެ 43.2 ޕަސެންޓް ކަމަށް އެ އޮތޯރިޓީން ބުނެއެވެ. މީގެ އިތުރުން ޖީއެސްޓީގެ ގޮތުގައި 742.64 މިލިއަން ރުފިޔާ ލިބިފައިވާ އިރު އެއީ ޖެނުއަރީގައި ލިބުނު އާމްދަނީގެ 34 ޕަސެންޓް ކަމަށް މީރާ އިން ބުނެއެވެ. މިދިޔަ ޖެނުއަރީ މަހު އެއަރޕޯޓް ސަރވިސް ޗާޖް 66.28 މިލިއަން ރުފިޔާ ލިބުނު އިރު ޓޫރިޒަމް ލޭންޑް ރެންޓް 60.94 މިލިއަން ރުފިޔާ ވަނީ ލިބިފަ އެވެ. އަދި އެހެނިހެން ޓެކްސްގެ ގޮތުގައި މީރާ އަށް ވަނީ 178.76 މިލިއަން ރުފިޔާ ލިބިފަ އެވެ.
ޖެނުއަރީ 2017 ގައި މީރާއިން ބަލައިގަތް އާމްދަނީގެ ތެރޭގައި 66.5 މިލިއަން އެމެރިކާ ޑޮލަރު ހިމެނޭ ކަމަށް އެއޮތޯރިޓީން ބުނެއެވެ.
