އަފްޣާނިސްތާނުގެ ދާޚިލީ ހަނގުރާމަ ހޫނުވެ ހަމަލާތައް ވަރުގަދަވެއްޖެ

އަފްޣާނިސްތާނުގެ ދާޚިލީ ހަނގުރާމަ ހޫނުވެ، އދން ބަލަހައްޓަމުންދާ ސަރަހައްދުތަކަށް ހަމަލާތައް އަމާޒުވެއްޖެއެވެ.

އަފްޣާނިސްތާނު ސަރުކާރުގެ ސިފައިންނާއި ތާލިބާނުންނާއި ދެމެދު ބިންތައް ހިފުމަށް ދަނީ ހަމަލާތައް ބަދަލުކުރަމުންނެވެ. އެގޮތުން މި ވަގުތު އެންމެ ވަރުގަދަ ހަމަލާތަކެއް ބަދަލުކުރަމުންދަނީ އަފްޣާނިސްތާނުގެ ހެރަތު ޕްރޮވިންސް ހިމެނޭ ސަރަހައްދުގައެވެ. މި ސަރަހައްދުގެ ހާލަތު ބަލާ އާންމުންނަށް ރައްކާތެރިކަން ފޯރުކޮށްދިނުމަށް ހަނގުރާމަކުރުން މަނާ އަދި އދން ބަލަހައްޓަމުންދާ ސަރަހައްދުތަކެއް ވަނީ ކަނޑައަޅާފައެވެ. އެހެންނަމަވެސް، އެންމެ ފަހުން ބަދަލުކުރެވުނު ހަމަލާތަކުގައި އިދިކޮޅުގެ ހަމަލާތަކެއް ހެރަތު ޕްރޮވިންސްގެ މިފަދަ ސަރަހައްދަކަށް އަރާފައިވާކަން ވަނީ ކަށަވަރުވެފައެވެ.

މި ހަމަލާ އަމާޒުވިކަން ހާމަކޮށް ނެރުނު ބަޔާނެއްގައި ޔުނައިޓެޑް ނޭޝަންސް އެސިސްޓެންސް މިޝަން އިން އަފްޣާނިސްތާން، އުނަމާއިން ބުނެފައިވަނީ ހަމަލާ އަމަޒުވެފައިވަނީ ހެރަތު ޕްރޮވިންސްގައި އދން ބަލަހައްޓަމުންދާ އެންމެ ބޮޑު މަރުކަޒަށް ކަމަށެވެ. އެ ސަރަހައްދުގެ ބޭރުން މީގެ ކުރިންވެސް ބޮމާއި، ކަނޑި ބަޑީގެ ހަމަލާތައް ދެމުން ދިޔަޔަސް މިއީ އެ މަރުކަޒަށް އަމާޒުވި މިފަދަ ފުރަތަމަ ހަމަލާކަމަށް އުނަމާއިން ބުނެއެވެ. މި ހަމަލާގައި ސަރަހައްދުގެ ރައްކާތެރިކަން ކަށަވަރުކުރަން ހުރި ސެކިއުރިޓީ ގާޑެއް މަރުވެފައިވާކަން ވަނީ ކަށަވަރުކޮށްދީފައެވެ. މީގެ އިތުރުންވެސް އެ ސަރަހައްދުގައި ތިބި އިތުރު ބައެއް އޮފިސަރުންނަށް އެކިވަރުގެ އަނިޔާވެފައިވާކަމަށް ބަޔާނުގައި ވެއެވެ. އެހެންނަމަވެސް، މިކަމުގެ އިތުރު ތަފްސީލު ހާމަކޮށްފައެއް ނުވެއެވެ.

އަފްޣާނިސްތާނުގގެ ދާޚިލީ ހަނގުރާމަ ހޫނުވެފައިވަނީ އެ ގައުމުގައި ތިބި އެމެރިކާ ސިފައިން ފައިބަން ފެށުމާއި ގުޅިގެންނެވެ. އަފްޣާނިސްތާނުގެ 50 އިންސައްތަ ސަރަޙައްދުތައް އޮތީ ޠާލިބާން ޖަމާޢަތުގެ ބާރުގެ ދަށުގައިކަމަށް އެމެރިކާއިން ވަނީ ބުނެފައެވެ.

އެމެރިކާގެ ދިފާޢީ ވުޒާރާގައި ބޭއްވި ނޫސްވެރިންގެ ބައްދަލުވުމުގައި ޖޮއިންޓު ޗީފްސް އޮފް ސުޓާފުގެ ޗެއާމަން ޖެނެރަލް މާކު މިލީ ވިދާޅުވީ އަފްޣާނިސްތާނުގައި ޠާލިބާނުން ބޮޑެތި ކުރިއެރުންތަކެއް ހޯދަމުންދާކަމަށެވެ. އެ ގޮތުން އަފްޣާނިސްތާނުގައި ޙަރަކާތްތެރިވާ ބޭރުގެ ފައުޖުތައް އެ ގައުމުން ފައިބަމުންދާ ދަނޑިވަޅެއްގައި ޠާލިބާނުންގެ ޙަމަލާތައް ވަރަށް ބޮޑަށް އިތުރުކޮށް ވަރުގަދަކޮށްފައިވާކަމަށާއި މުހިންމު ސަރަޙައްދީ ރޮނގުތައްވެސް އޮތީ އެ ޖަމާޢަތުގެ ބާރުގެ ދަށުގައިކަމަށް ޖެނެރަލް މިލީ ވިދާޅުވިއެވެ. އަދި އަފްޣާނިސްތާނުގެ 419 ޑިސްޓުރިކްޓުގެ ތެރެއިން 200 ޑިސްޓުރިކްޓު އޮތީ ޠާލިބާނުންގެ ބާރުގެ ދަށުގައިކަމަށް އޭނާ ވިދާޅުވިއެވެ.

20 އަހަރު ދުވަހަށްފަހު އެމެރިކާގެ އިތުރުން ހުޅަނގުގެ އަސްކަރީ އިއްތިހާދު، ނޭޓޯއިންވަނީ އަފްޣާނިސްތާނުން ފޭބުމުގެ މަސައްކަތް ފަށައިފައެވެ. އެ ގޮތުން ނޭޓޯގެ ފައުޖުތަކުގައި ހިމެނޭ އިނގިރޭސިވިލާތާއި ޖަރުމަންވިލާތާއި އިޓަލީވިލާތުގެ ސިފައިންވަނީ އަފްޣާނިސްތާނުން ފައިބައިފައެވެ. އަދި އަންނަ އޮގަސްޓު މަސް ނިމުމުގެ ކުރިން އަފްޣާނިސްތާނުން ފޭބުމުގެ މަސައްކަތް އެމެރިކާގެ ސިފައިންވެސް ވަނީ ފަށައިފައެވެ. އެ ގޮތުން އަފްޣާނިސްތާނުގެ ކަންދަހާރުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުވެސްވަނީ އަފްޣާނިސްތާނުގެ ސަލާމަތީ ބާރުތަކާ ހަވާލުކޮށްފައެވެ. އަފްޣާނިސްތާނުގައި އެމެރިކާގެ ސިފައިން މިހާރު ޙަރަކާތްތެރިވަނީ ވެރިރަށް ކާބުލްގެ އިތުރުން އެ ގައުމުގެ ބައިނަލްއަގްވާމީ ވައިގެ ބަނދަރުގެ ސަލާމަތީ ކަންކަން ބެލެހެއްޓުމުގެ މަސައްކަތުގައި އެކަންޏެވެ.

ބޭރުގެ ފައުޖުތަކުން އަފްޣާނިސްތާނުން ފައިބަމުންދާ ދަނޑިވަޅެއްގައި ޠާލިބާން ޖަމާޢަތުގެ ހަނގުރާމަވެރިންގެ ބާރުވަނީ ވަރުގަދަކޮށްފައެވެ. ޠާލިބާނުންވަނީ އަފްޣާނިސްތާނުން ޕާކިސްތާނާއި ތަޖިކިސްތާނާއި އުޒުބެކިސްތާނާއި އީރާނަށް ދެވެން އޮންނަ މައިމަގުތަކާއި ސަރަހައްދީ ރޮނގުތައް އެ ޖަމާއަތުގެ ބާރުގެ ދަށަށް ގެނެސްފައެވެ. ޠާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ ސަރަޙައްދުތައް އޮތީ އެ ޖަމާޢަތުގެ ބާރު ދަށުގައެވެ.