ކޮވިޝީލްޑް ވެކްސިން ޖެހި މީހުންނަށް ދެވަނަ ޑޯޒްގެ ގޮތުގައި އެސްޓްރަޒެނެކާ ވެކްސިން ޖެހޭނެކަމަށް ޓެކްނިކަން އެޑްވައިޒަރީ ގްރޫޕުގައި ހިމެނިވަޑައިގަންނަވާ ޑރ. ނަޒްލާ މުސްތަފާ ވިދާޅުވެއްޖެއެވެ.

ޑރ. ނަޒްލާ މިފަދައިން ވިދާޅުވީ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. ޑރ. ނަޒްލާ ވިދާޅުވީ ފުރަތަމަ ޑޯޒް ކޮވިޝީލްޑުން ޖަހާފައިވާ މީހުންނަށް ދެވަނަ ޑޯޒްގެ ގޮތުގައި އެސްޓްރަޒެނެކާ ވެކްސިން ޖެހިދާނެ ކަމަށެވެ. ދުނިޔޭގެ ސިއްހަތު ޖަމިއްޔާއާއި، މޯލްޑިވިއަން ޓެކްނިކަލް އެޑްވައިޒަރީ ގްރޫޕުންވެސް ބަލާ ގޮތުގައި މި ދެ ވެކްސިނަކީ އެއްކަހަލަ ދެ ވެކްސިން ކަމަށް ޑރ. ނަޒްލާ ވިދާޅުވިއެވެ.

މިވަގުތު ވެކްސިންގެ ފުރަތަމަ ޑޯޒް ޖަހައި، ދެވަނަ ޑޯޒް ނުޖަހާ ތިބި މީހުން ދެވަނަ ޑޯޒް ވީހާވެސް އަވަހަކަށް ޖެހުމަށް ޑރ. ނަޒްލާ ވަނީ އިލްތިމާސް ކުރައްވާފައެވެ.މީގެ ނޫސްވެރިންގެ މި ބައްދަލުވުމުގައި އިމިއުނިޒޭޝަން ޕްރޮގްރާމުގެ އޮފިސަރ ނާޝިޔާ އަބްދުލްޣަފޫރު ވިދާޅުވީ އެސްޓްރަޒެނެކާ ވެކްސިން ލިބުމާއެކު މިމަހުގެ 27 ވަނަ ދުވަހުން ފެށިގެން އަތޮޅުތެރޭގައި އެ ވެކްސިން ޖަހަން ފަށާފައިވާ ކަމަށެވެ. މާލެ ސަރަހައްދުގައި ވެކްސިން ޖަހަން ފަށާނީ މިމަހުގެ 31 ވަނަ ދުވަހުން ފެށިގެން ކަމަށް ވިދާޅުވިއެވެ. މާލެ ސަރަހައްދުގެ 6 ސެންޓަރެއްގައި އެސްޓްރަޒެނެކާ ވެކްސިން ޖެހުމުގެ މަސައްކަތް ކުރިއަށްދާނެ ކަމަށް ނާޝިޔާ ވިދާޅުވިއެވެ.

ރާއްޖޭގެ އާބާދީގެ 50 އިންސަތައަށްވުރެ ގިނަ މީހުން މިހާތަނަށް ވަނީ ވެކްސިންގެ ދެ ޑޯޒް ފުރިހަމަކޮށްފައެވެ. އެގޮތުން ވެކްސިންގެ ފުރަތަމަ ޑޯޒް ފުރިހަމަ ކުރި މީހުންގެ އަދަދު 321،429 އަށް އަރާއިރު، ދެވަނަ ޑޯޒް ފުރިހަމަ ކުރި މީހުންގެ ޖުމްލަ 261،605 އަށް އަރައެވެ.