ހުކުރު މިސްކިތުގެ ހުރުމަތް ކެނޑޭފަދަ ކަމެއް ފަތުރުވެރިޔަކު ކުރިކަމަށް ނުބެލެވޭ - ޑރ ޒާހިރު
23 ޖުލައި 2021 | ހުކުރު 13:48ފުލުހުން ގޮސް ބެލި ބެލުމުން އެ ފަދަ ކަމެއް ފާހަގަނުވާކަމަށް ވަނީ ބުނެފައި
މާލޭ ހުކުރު މިސްކިތް
ހުކުރު މިސްކިތުގެ ހުރުމަތް ކެނޑޭފަދަ ކަމެއް ފަތުރުވެރިޔަކު ކުރިކަމަށް ނުބެލެވޭ މިނިސްޓަރ އޮފް އިސްލާމިކް އެފެއާޒް ޑރ. އަހުމަދު ޒާހިރު އަލީ ވިދާޅުވެއްޖެއެވެ.
އިސްލާމިކް މިނިސްޓަރ މިފަދައިން ވިދާޅުވެފައިވަނީ، މާލޭ ހުކުރު މިސްކިތުގައި ބިދޭސީ އަންހެނަކު ޣައިރު ދީނުގެ އަޅުކަމެއްކަމަށް ބެލެވޭކަމެއް ކުރާ ވީޑީއޯއެއް އާންމުވެފައިވާ ދަނޑިވަޅެއްގައެވެ. މިކަމާއި ގުޅިގެން ރާއްޖެ އެމްވީއާއި ވާހަކަފުޅުދައްކަވަމުން ޑރ. އަހުމަދު ޒާހިރު އަލީ ވަނީ ކަން ހިނގިގޮތުގެ މަޢުލޫމާތު މިނިސްޓްރީން ސާފުކޮށްފައިވާކަމަށް ވިދާޅުވެފައެވެ. އެގޮތުން މާލޭ ހުކުރު މިސްކިތަށް އެރި ބިދޭސީ އަންހެންމީހާއަކީ ފަތުރުވެރިއެއްކަމަށާއި، މި މީހާ މިސްކިތަށް އެރީ އެ މިސްކިތަކީ ރާއްޖޭގެ އާސާރާއި ތަރިކައެއްގެ ގޮތުގައި ކަނޑައެޅިފައި ތަނެއްކަމުގައިވުމުން އެކަމަށް ހުއްދައޮތުމުންކަމަށެވެ. އަދި މިފަދަ ތަންތަނަށް އާންމުގޮތެއްގައި ފަތުރުވެރިިން ގެންގޮސް މައުލޫމާތު ދިނުމަށް ޓުއާ ގައިޑުން ތިބިނަމަވެސް، މި އަންހެން މީހާއާއެކު އެއްވެސް ޓުއާ ގައިޑެއް ނުދާކަމަށް އިސްލާމިކް މިނިސްޓަރ ވިދާޅުވިއެވެ.
މި ފަތުރުވެރިޔާ މިސްކިތަށް އެރުމަށްފަހު މިސްކިތުގައި ބަހައްޓާފައި ހުރި ޚަތިމެއް ނެގުމުން މިސްކިތުގައި 24 ގަޑިއިރު ފޯރިމަރަންތިބޭ ހެރިޓޭޖް މިނިސްޓްރީގެ އޮފިޝަލުން އެ އަންހެން މީހާ ހުއްޓުވާ ސުވާލުކުރިކަމަށެވެ. އެގޮތުން އެމީހާއަކީ މުސްލިމެއްތޯ ސުވާލުކުރިކަމަށާއި، އެ މީހާއަކީ މުސްލިމެއް ނޫންކަމަށް ބުނެ ޚަތިމް ހިފައިގެން އިށީނދެ ލޯ މަރާލާފައި އިރުކޮޅަކު ހުރުމަށްފަހު ޚަތިމް ބޭއްވީކަމަށް އިސްލާމިކް މިނިސްޓަރ ވިދާޅުވިއެވެ. މިކަން ރިޕޯޓްކުރުމުން ހުކުރު މިސްކިތަށް ފުލުހުންވެސް ދިޔަކަމަށާއި، އޭރު އެ ފަތުރުވެރިޔާ ހުކުރު މިސްކިތް ދޫކޮށް ގޮސްފައިވާކަމަށް އިސްލާމިކް މިނިސްޓަރ ވިދާޅުވިއެވެ. މި ހާދިސާ ހިނގާ ދިޔަގޮތަށް ބަލާއިރު، ބައެއް މީޑިއާތަކުން ރިޕޯޓްކޮށްފައިވާގޮތާއި ޚިލާފަށް ހުކުރު މިސްކިތުގެ ހުރުމަތް ކެނޑޭފަދަ ކަމެއް ފަތުރުވެރިޔާ ކުރިކަމަށް ނުބެލެވޭ އިސްލާމިކް މިނިސްޓަރ ވިދާޅުވިއެވެ.
މާލޭ ހުކުރު މިސްކިތުގައި ބިދޭސީ އަންހެނަކު ޣައިރު ދީނުގެ އަޅުކަމެއްކަމަށް ބެލެވޭކަމެއް ކުރާ ވީޑީއޯއެއް ވަނީ އާންމުވެފައެވެ. އާންމުވި ވީޑިއޯއިން ފެންނަ ގޮތުން، އެ އަންހެން މީހާ މިސްކިތުގެ އެއްފަރާތެއްގައި އިންނަނީ "މެޑިޓޭޓް" ކުރަންކަމަށް ބައެއް މީހުން ސޯޝަލް މީޑިއާގައި ދިޔައީ ބުނަމުންނެވެ. މީގެއިތުރުން އޭނާ އެތާ އިންނައިރު ކުރިމަތީގައި އެއްޗެއް އޮތްތަންވެސް ފެނިގެންދާކަމަށް ރިޕޯޓްކޮށްފައިވެއެވެ.
މިކަމާ ގުޅިގެން ފުލުހުން ބުނީ، ހުކުރު މިސްކިތުގައި އަންހެނަކު އަޅުކަންކުރަމުން ދާ ކަމުގެ ރިޕޯޓް ލިބިފައިވާކަމަށެވެ. އެހެންނަމަވެސް ފުލުހުން ގޮސް ބެލި ބެލުމުން އެ ފަދަ ކަމެއް ފާހަގަނުވާކަމަށް ވަނީ ބުނެފައެވެ.
