ގދ. ތިނަދޫގައި ކޮވިޑްގެ ހާލަތު ރަގަޅުވަމުންދާކަމަށް އެ ރަށު ހޮސްޕިޓަލްގެ މެނޭޖަރ އަހުމަދު ސައީދު ވިދާޅުވެއްޖެއެވެ.

ގދ. ތިނަދޫއިން ކޮވިޑް ޕޮޒިޓިވް ކޭސްތަކެއް ފެނިގެން އެޕްރީލް 24ގައި އެ ރަށް ވަނީ މޮނީޓަރިން ހާލަތަށް ގެނެސްފައެވެ. ރާއްޖެ އެމްވީއަށް މައުލޫމާތު ދެއްވަމުން އެރަށު ހޮސްޕިޓަލްގެ މެނޭޖަރ އަހުމަދު ސައީދު ވިދާޅުވީ  މި ހަފްތާގެ ތެރޭގައި ރަށުގެ ޕޮޒިޓިވްވި ކޭސްތައް މަދުވުމާގުޅިގެން މިހާރު އަޅާފައިވާ ފިޔަވަޅުތަކަށް ލުއި ދީފައިވާކަމަށެވެ.

20 ޖުލައި ގައި ފޮޒިޓިވްވެފައިވަނީ 8 ކޭސްކަމަށާއި، އެއީ ކަރަންޓީނުގައި ތިބި ބަޔެއް ކަމަށް ސައީދު ވިދާޅުވިއެވެ. މިހާތަނަށް އެ ރަށުން ޕޮޒިޓިވްވި 917 ކޭސްގެ ތެރެއިން 835 ކޭސް ވަނީ ބަލިން ރަގަޅުވެފައެވެ. އަދި މިހާރު ބަލިޖެހި ރަނގަޅުނުވެ 82 މީހުން އެބަ ތިބިކަމަށް ސައީދު ވިދާޅުވިއެވެ.

ރާއްޖެ އެމްވީއަށް މައުލޫމާތުދެމުން ކައުންސިލް ރައީސް ސައުދު އަލީ ވިދާޅުވީ ދީފައިވާ ލުއިތަކުގެ ތެރޭގައި ޕޮލިސް ޕާމިޓްއާ ނުލާ ކާފިއު ނޫން ގަޑިތަކުގައި ބޭރުގައި އުޅެވޭނެކަމަށާއި އަދި ޒަރޫރީ ބޭނުންތަކަށް ކާފިއު ގަޑީގައި ބޭރުގައި އުޅެވޭނެކަމަށެވެ. ކާފިއު ގަޑިތަކުގެ ތެރެއިން ހަވީރު 4ން ފެށިގެން ރޭގަނޑު 9ށް ފިހާރަތަކުން ޑެލިވަރީ ކުރެވޭނެކަމަށާއި އަދި ރެސްޓޯރެންޓް ތަކުން ހެނދުނު 8ން ރޭގަނޑު 10ށް ޑެލިވަރީ ކުރެވޭނެކަމަށް ސައުދު ވިދާޅުވިއެވެ. އަދި އެންމެން ވެސް މަސައްކަތް ކުރަމުން ދަނީ ރަށް ވީހާވެސް އަވަހަށް މޮނީޓަރިންގެ ހާލަތުން ނެގުމަށް ކަމަށް ސައުދު ފާހަގަކުރެއްވިއެވެ.