މި ފަހަރުގެ ޓްރާންސްފާ ބާޒާރުގައި މެންޗެސްޓާ ސިޓީން އެ ޓީމަށް ކުޅެމުން އަންނަ ބްރެޒިލުގެ ފޯވާޑް ގަބްރިއެލް ޖީސޫސް ވިއްކާނީ 43 މިލިޔަން ޕައުންޑަށް ކަމަށް ރިޕޯޓުތައް ބުނެފިއެވެ.

އުމުރުން 24 އަހަރުގެ ޖީސޫސް މި ވަގުތު ސިޓީގެ އެއްބަސްވުމުގައި ހުރީ 2023 ވަނަ އަހަރުގެ ޖޫން މަހުގެ ނިޔަލަށެވެ.

ރިޕޯޓުތައް ބުނާ ގޮތުން އިޓަލީގެ ޔުވެންޓަސްއިން އަންނަނީ މި ފަހަރުގެ ޓްރާންސްފާގައި ޖީސޫސް ގަތުމަށް މަސައްކަތް ކުރަމުންނެވެ. އަދި ސިޓީއަށް އައު ކުޅުންތެރިންތަކެއް ގެންނަން އެ ޓީމުގެ ކޯޗު ޕެޕް ގާޑިއޯލާ ބޭނުންވާތީ، ރަނގަޅު ފީއަކަށް ޖީސޫސް ވިއްކާލަން ސިޓީން ދެކޮޅު ނުހަދާނެ ކަމަށްވެސް ރިޕޯޓުތައް ބުނެއެވެ.

އެއާއެކު މި ފަހަރުގެ ޓްރާންސްފާގައި ޖީސޫސް ވިއްކަން ސިޓީން ކަނޑައަޅާފައިވާ އަގަކީ 43 މިލިޔަން ޕައުންޑް ކަމަށް މީޑިއާތަކުން ވަނީ ރިޕޯޓުކޮށްފައެވެ. އެހެންވެއްޖެނަމަ މިއީ ކުޅުންތެރިއަކު ވިއްކަން ސިޓީން މިހާތަނަށް ކަނޑައެޅި އެންމެ ބޮޑު އަގެވެ. އެގޮތުން އެންމެ ފަހުން ސިޓީން އެންމެ ބޮޑު އަގެއްގައި ވިއްކި ކުޅުންތެރިއަކީ 40.5 މިލިޔަން ޕައުންޑަށް ބަޔާން މިއުނިކަށް ވިއްކާލި ޖަރުމަނުގެ ފޯވާޑް ލެރޯއި ސާނޭއެވެ.

މި ފަހަރުގެ ޓްރާންސްފާގައި ސިޓީން ޖީސޫސް ވިއްކާލާނެ ކަމަޑް ރިޕޯޓުތައް ބުނިއިރު، މި ޓްރާންސްފާގައި ހިލޭ ޓްރާންސްފާއެއްގެ ދަށުން އެ ޓީމަށް ކުޅެމުން އައި އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ވަނީ ބާސެލޯނާއަށް ބަދަލުވެފައެވެ.

ސިޓީގައި ޖީސޫސްގެ ކުރިމަގާ މެދު ސުވާލު އުފެދިފައިވާއިރު، މީގެ ކުރިން އިޓަލީގެ ޕަލްމެއިރަސްއަށް ކުޅުނު ޖީސޫސް ސިޓީއާ ގުޅުނީ 2017 ވަނަ އަހަރުގެ ޖެނުއަރީ މަހު 27 މިލިޔަން ޕައުންޑަށެވެ. އޭގެ ފަހުން ޖީސޫސް ވަނީ ސިޓީއަށް ކުޅެދިން 195 މެޗުގައި 82 ލަނޑު ޖަހާފައެވެ. އަދި ވަނީ ސިޓީއާއެކު މިހާތަނަށް އިނގިރޭސި ޕްރިމިއާ ލީގު ތިން ފަހަރު ކާމިޔާބުކޮށްފައެވެ.