ގެފުޅުގެ އުރަކޮޅު ބަދަލުކޮށްފި

މި އަހަރުގެ ހައްޖުދުވަހާ ދިމާކޮށް ގެފުޅުގެ އުރަކޮޅު ބަދަލުކޮށްފިއެވެ.

ކޮންމެ އަހަރެއްގެ ވެސް ހައްޖު ދުވަހާ ދިމާކޮށް ގެފުޅުގެ އުރަކޮޅު ބަދަލުކުރެއެވެ. 1442 ވަނަ އަހަރުގެ އުރަކޮޅު ބަދަލުކުރުމަށް މީގެ ދެހަފްތާ ކުރިން ފެށިގެން މިކަމަށް ޚާއްސަ ޓީމަކުން ގެންދެވީ ތައްޔާރުވަމުންނެވެ. ގެފުޅުގެ އުރަކޮޅު އެކުލެވިގެންވަނީ ގެފުޅުގެ ހަތަރު ފަރާތުގައި ހަރުކުރާ ހަތަރު ގަނޑު ފޮއްޗާއި، ގެފުޅުގެ ދޮރުކޮޅުގައި ހަރުުކުރާ ފަރުދާގެ މައްޗަށެވެ.

ގެފުޅުގެ އުރަކޮޅު ބަދަލު ކުރާއިރު ކޮންމެ ފަރާތަކުން ވެސް ވަކި ފޮތިގަނޑެއް ގެފުޅުގެ މައްޗަށް އަރުވައި މަތީ ކައިރީގައި ހަރުކުރުމަށްފަހު، އުރަކޮޅު މަތިން ވައްޓާލައެވެ. ހަތަރުފަރާތުން އުރަކޮޅު ވައްޓާލުމަށްފަހު ހަތަރު ފަރާތުގެ ފޮތިގަނޑު އެއް ފޮތިގަނޑު އަނެއް ފޮތިގަނޑާ ގުޅާލަނީ ފަހައިގެންނެވެ.

ގެފުޅުގެ އުރަކޮޅު ތައްޔާރު ކުރުމަށް 670 ކިލޯގެ މޮޅު ފަށުވި އާއި 120 ކިލޯގެ ރަން ބަރަންޏާއި، 100 ކިލޯގެ ރިހި ބަރަނި ބޭނުން ކުރެއެވެ.

އުރަކޮޅު ބަދަލުކުރުމަށްފަހު ހައްޖުގެ އަޅުކަން ނިމެންދެން އުރަކޮޅު ވަކިހިސާބަކަށް ބަހައްޓައެވެ. މީގެ ބޭނުމަކީ ހައްޖުވެރިން ތަވާފުގެ އަޅުކަން އަދާކުރާއިރު، އުރަކޮޅަށް ލިބިދާނެ ގެއްލުމަކުން ސަލާމަތްކުރުމެވެ.