ހައްޖުވެރިން އަރަފާތު ބިމަށް ޖަމާވާން ފަށައިފި
19 ޖުލައި 2021 | ހޯމަ 08:50މިއަހަރު ހައްޖުގެ މަތިވެރިކަން އަޅުކަމުގައި ބައިވެރިވުމުގެ ފުރުސަތު ދީފައިވަނީ، 60،000 މީހުންނަށް
ހައްޖުވެރިން އަރަފާތު ބިމަށް ޖަމާވަނީ
ހައްޖުވެރިން އަރަފާތު ބިމަށް ޖަމާވާން ފަށައިފިއެވެ.
އަރަފާތު ބިމަށް ޖަމާވުމަކީ، ހައްޖުގެ އެންމެ މުހިއްމު އަދި އެންމެ މަތިވެރި ރުކުނެވެ. އެ ރުކުނަކީ، އެއާ ނުލައި ހައްޖުގެ މާތް އަޅުކަން ފުރިހަމަ ނުކުރެވޭނޭ ރުކުނެކެވެ. އަރަފާތު ދުވަހުގެ އިރު އޮއްސުމުގެ ކުރީން އަރަފާތު ބިމަށް ނުދެވިއްޖެ ނަމަ ހައްޖުގެ އަޅުކަން ފުރިހަމައެއް ނުވާނެއެވެ.
އެެހެންކަމުން ހައްޖުވެރިން މިއަދުގެ އިރުއޮއްސުމުގެ ކުރިން އަރަފާތު ބިމަށް ޖަމާވާން ޖެހެއެވެ.
މި އަހަރު ހައްޖުވުމަށް ސައުދީއަށް އެތެރެވުމުގެ ފުރުސަތު އެއްވެސް ގައުމަކަށް ދީފައެއް ނުވެއެވެ. ފުރުސަތު ދީފައިވަނީ، ސައުދީގެ ރައްޔިތުންނާއި އެގައުމުގައި ދިރިއުޅޭ އެހެން ގައުމުތަކުގެ މީހުންނަށެވެ. މިފަހަރުގެ ހައްޖާޖީންގެ ތެރޭގައި ހިމެނެނީ އެންމެ ދިވެއްސެކެވެ.
މި އަހަރު ހައްޖުގެ މަތިވެރި އަޅުކަމުގައި ބައިވެރިވުމުގެ ފުރުސަތު ދީފައިވަނީ، 60،000 މީހުންނަށެވެ. މިދިޔަ އަހަރު މިފުރުސަތު ދީފައިވަނީ 10،000 މީހުންނަށެވެ.
