މި އަހަރު ހައްޖަށް ދިޔަ އެއްވެސް މީހަކު ކޮވިޑަށް ޕޮޒިޓިވްވެފައެއް ނުވޭ - ސައުދީގެ ހެލްތު މިނިސްޓްރީ

މި އަހަރު ހައްޖުގެ އަޅުކަން އަދާކުރަން ސައުދީއަށް ދިޔަ އެއްވެސް ހައްޖާޖީއަކު ކޮވިޑް-19ށް ޕޮޒިޓިވް ނުވާ ކަމަށް އެގައުމުގެ ހެލްތު މިނިސްޓްރީން ބުނެފިއެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސައުދީގެ ހެލްތު މިނިސްޓްރީގެ ތަރުޖަމާން ޑރ. މުހައްމަދު ބުން އަލް-އަބްދު އަލް-އަލީ ވަނީ މިހާތަނަށް ކުރި ޓެސްޓުތަކުން ހައްޖުގެ އަޅުކަން އަދާކުރުމަށް އައި އެއްވެސް މީހަކު ކޮވިޑް-19ށް ޕޮޒިޓިވްވެފައި ނުވާކަމަށެވެ. އަދި ހައްޖުގެ އަޅުކަން އެންމެ ރައްކާތެރިކޮށް ކުރޭވެނެ އިންތިޒާމުތައް ހަމަޖެހިފައިވާ ކަމަށް ތަރުޖަމާނު ވިދާޅުވިއެވެ.

އެގޮތުން ކޮވިޑް-19ގެ ސަބަބުން މި އަހަރުގެ ހައްޖުގެ އަޅުކަން އަދާކުރުމުގެ ފުރުސަތު ދީފައި ވަނީ 60،000 މީހުންނަށެވެ. މި އަހަރު ހައްޖުގެ އަޅުކަމުގައި ބައިވެރިވެވޭނީ 18 އަހަރާއި 65 އަހަރާ ދެމެދުގެ މީހުންގެ ތެރެއިން ވެކްސިން ޖަހާފައިވާ މީހުންނަށް ކަމަށް ވެސް ވަނީ ކަނޑައަޅާފައެވެ. އަދި ބޮޑެތި ބަލިތައް ތަހައްމަލު ކުރަމުންދާ މީހުންނަށް މި އަހަރު ހައްޖުގެ އަޅުކަމުގައި ބައިވެރިވުމުގެ ފުރުސަތެއް ނެތެވެ.

ކޮވިޑް-19 ބަލިމަޑުކަމުގެ ސަބަބުން މިދިޔަ އަހަރު ވެސް ހައްޖުގެ އަޅުކަން އަދާކުރުމަށް މީހުން ހޮވާފައިވަނީ ސައުދީ ސަރުކާރުން އެކުލަވާލި ޚާއްސަ މިންގަނޑުތަކެއްގެ ތެރެއިންނެވެ. މަދު މީސްކޮޅަކާއެކު މިދިޔަ އަހަރު ހައްޖުގެ އަޅުކަން ކުރިއަށް ގެންގޮސްފައިވާއިރު، ރައްކާތެރިކަމުގެ ގޮތުން ސައުދީން ވަނީ ވަރުގަދަ ފިޔަވަޅުތަކެއް ކުރީބައިގައި އަޅާފައެވެ.

އޭގެ އިތުރުން މި އަހަރު ހައްޖުވުމަށްދާ ހައްޖުވެރިންގެ ރައްކާތެރިކަން ކަށަވަރުކުރުމަށް ސައުދީ އަރަބިއްޔާގެ ރެޑް ކްރެސެންޓް އޮތޯރިޓީގެ ފަރާތުން ޚާއްސަ މަސައްކަތްތަކެއް ވަނީ ފަށާފައެވެ. ހައްޖުގެ އަޅުކަން އަދާކުރުމަށްދާ ހައްޖުވެރިންގެ ސިއްހީ ކަންކަން ބަލައި ފަރުވާއެއް ދޭންޖެހިއްޖެ ހާލަތެއްގައި ދޭންޖެހޭ ފަރުވާތައް ދިނުމަށް ރެޑް ކްރެސެންޓުން ވަނީ އެކަމަށް ބޭނުންވާނެ ވަސީލަތްތައް ފޯރުކޮށްދޭނެ ކަމަށާއި އެކަމުގައި ދަރުމަވެރިން ވެސް ހަރަކާތްތެރިވާނެ ކަމަށް ބުނެފައެވެ. 300ށް ވުރެ ގިނަ ދަރުމަވެރިން ހޯދާފައިވާ ކަމަށް އެ އޮތޯރިޓީން ހާމަކުރެއެވެ. އޭގެ ތެރޭގައި ފިރިހެނުންގެ އިތުރުން އަންހެނުން ވެސް ހަރަކާތްތެރިވާނެ ކަމަށް ވަނީ ބުނެފައެވެ.

މީގެ އިތުރުން ސިއްހީ ޚިދުމަތް ދިނުމަށް ބޭނުންވާ 2000ށް ވުރެ ގިނަ އާލާތްތަށް ހުންނާނެ ކަމަށާއި ޚިދުމަތްތައް އަރަފާތު ބިމުންނާއި މުޒްދަލިފާއިން ލިބޭނެ ކަމަށް ބުނެއެވެ. ދިމާވެދާނެ ހާދިސާއަކަށް އަވަހަށް އެޓެންޑުވުމުގެ ގޮތުން ހާދިސާތައް ރިޕޯޓްކުރުމަށް ރެޑް ކްރެސެންޓުން މިހާރު ވަނީ ހާއްސަ ކޯލް ސެންޓަރެއް ވެސް ގާއިމުކޮށްފައެވެ.

ކޮވިޑް-19ގެ ސަބަބުން ހައްޖުގެ އަޅުކަން ކުރެވޭ ފަރާތްތައް ސައުދީ ސަރުކާރުން މަދުކޮށްފައިވާ އިރު، މީގެ ކުރިން ކޮންމެ އަހަރަކު ހައްޖުގެ އަޅުކަން އަދާކުރުމަށް 2.5 މިލިއަން މުސްލިމުން ސައުދީއަށް ދެއެވެ.