މި އަހަރު ހައްޖު އޮންނާނެ، އެކަމަކު ޚާއްސަ ފިޔަވަޅު ތަކަކާއެކު
ހައްޖުގެ އަޅުކަން ކުރިއަށް ދާނީ ސިއްހީ ގޮތުން ހައްޖާޖީންގެ ސިއްހަތަށް އަޅަންޖެހޭ ފިޔަވަޅުތަކާ އެކު
ކޮވިޑްގެ ބަލިމަޑުކަމުގެ ތެރޭގައި އުމްރާގެ އަޅުކަމަށް ހުޅުވާލުމުން އުމްރާވެރިން ޠަވާފްކުރަނީ
މި އަހަރު ހައްޖުގެ އަޅުކަން އޮންނާނެ ކަމަށާއި އަދި ހައްޖުގެ ކަންކަން ގެންދާނީ ޚާއްސަ ފިޔަވަޅު ތަކަކާއެކު ކަމަށް ސައުދީ އަރަބިއްޔާ އިން ހާމަކޮށްފިއެވެ.
ސައުދީގެ ހައްޖު އެންޑް އުމްރާ މިނިސްޓްރީން އާދިއްތަ ދުވަހު ނެރުނު ބަޔާނެއްގައި ހާމަ ކުރި ގޮތުގައި މި އަހަރުގެ ހައްޖުގެ އަޅުކަން ކުރިއަށް ދާނީ ސިއްހީ ގޮތުން ހައްޖާޖީންގެ ސިއްޙަތަށް އަޅަންޖެހޭ ހުރިހާ ފިޔަވަޅުތަކެއް އަޅައިގެން ކަމުގައެވެ.
ސިއްހީ ގޮތުން އަޅަން ނިންމާފައިވާ ފިޔަވަޅުތައް ވަރަށް އަވަހަށް ހާމަ ކުރާނެ ކަމަށް ސައުދީގެ ހައްޖާ ބެހޭ ވުޒާރާގެ ބަޔާނުގައި ވެއެވެ.
ކޮވިޑްގެ ހާލަތުގެ ސަބަބުން ހުސްވި އަހަރު ހައްޖުގެ އަޅުކަން ކުރިއަށް ގެންގޮސްފައިވަނީ އެންމެ އެއް ހާސް މީހުންނަށް ފުރުސަތު ދީގެންނެވެ. ކޮވިޑްގެ ސަބަބުން ގައުމުތަކުގެ ބޯޑަރުތައް ބަންދުކޮށްފައި އޮތުމާއެކު ސައުދީން ފުރުސަތު ދިން އެއް ހާސް މީހުންނަކީ ސައުދީގައި ދިރިއުޅޭ މީހުންނެވެ.
އާއްމު ގޮތެއްގައި އަހަރެއްގެ ތެރޭގައި 2.5 މިލިއަން މީހުން ހައްޖަށް ދެއެވެ.
