މި އަހަރުގެ ހައްޖު ދުވަހަކީ ޖުލައި މަހުގެ 19 ވަނަ ދުވަސް ކަމަށާއި، އަޟްހާ އީދު ދުވަހަކީ ޖުލައި 20 ވަނަ ދުވަސް ކަމަށް ސައުދީ އަރަބިއްޔާގެ ސުޕްރީމް ކޯޓުން ކަނޑައަޅައިފިއެވެ.

ސައުދީ ގެޒެޓުގައި ބުނެފައިވަނީ ސުޕްރީމް ކޯޓުން މިގޮތަށް ނިންމާފައިވަނީ ހައްޖު މަހުގެ ހަނދު ފެނިފައި ނުވާތީ ކަމަށެވެ. ސުޕްރީމް ކޯޓުން ނެރުނު ބަޔާނުގައި ބުނެފައިވަނީ ހައްޖުގެ އަޅުކަން ފެށޭނީ ޖުލައި މަހުގެ 18 ވަނަ ދުވަސް ނުވަތަ ހައްޖު މަހުގެ 8 ވަނަ ދުވަހު ކަމަށާއި، ހައްޖުގެ އަޅުކަން ނިމޭނީ ޖުލައި މަހުގެ 22 ވަނަ ދުވަސް ނުވަތަ ހައްޖު މަހުގެ 12 ވަނަ ދުވަހު ކަމަށެވެ.

ސައުދީގެ މިނިސްޓްރީ އޮފް ހައްޖު އެންޑް އުމްރާއިން ބުނެފައިވަނީ މި އަހަރުގެ ހައްޖުގެ އަޅުކަމުގައި ބައިވެރިވާނީ 60،000 މީހުން ކަމަށާއި، އެއީ ސައުދީގެ ތެރެއިން ހޮވާލެވިފައިވާ މީހުން ކަމަށެވެ.

ކޮވިޑާ ގުޅިގެން ސައުދީން ވަނީ ގައުމުން ބޭރުން ހައްޖުވެރިން އައުން މަނާކޮށްފައެވެ. 2021 ވަނަ އަހަރު ހައްޖުގެ އަޅުކަންކުރުމަށް ގައުމުގެ ތެރެއިން މީހުން ހޮވާފައިވާ އިރު، ކޮވިޑާ ގުޅިގެން މިދިޔަ އަހަރު ވެސް ހައްޖުގެ އަޅުކަން އަދާކޮށްފައިވަނީ ސައުދީގެ ތެރެއިން މީހުންނަށް ފުރުސަތު ދީގެންނެވެ.