ހައްޖުމަހުގެ ފުރަތަމަ 10 ދުވަހަކީ ދުނިޔޭގައި ލައްވާފައިވާ އެންމެ މާތް ދުވަސްތައް، ހެޔޮ އަމަލުކުރުން ގިނަ ކުރޭ
9 ޖުލައި 2021 | ހުކުރު 07:59މި ދުވަސްތަކުގައި މާތްﷲގެ މަތިން ހަނދުމަކުރުން އިތުރު ކުރަން ޖެހޭ
އިސްލާމީ މަރުކަޒުގައި ހުކުރު ނަމާދު ކުރުމަށް މީހުން ޖަމާއަތް ހަދައިގެން
ހައްޖުމަހުގެ ފުރަތަމަ 10 ދުވަހަކީ މާތް ﷲ މި ދުނިޔޭގައި ލައްވާފައިވާ އެންމެ މާތް ދުވަސްތައް ކަމަށާއި، މި ދުވަސްތަކުގައި ހެޔޮ އަމަލުކުރުން ގިނަކުރުމަށް ހުކުރު ޚުތުބާގައި ގޮވާލައިފިއެވެ.
''ހައްޖުމަހުގެ ފުރަތަމަ ދިހަ ދުވަހުގެ މާތްކަން'' މި މައުޟޫގެ މައްޗަށް އިއްވި ހުކުރު ޚުތުބާގައި ބުނީ ހައްޖުމަހުގެ ދިހަ ދުވަހުގެ މާތްކަމާއި، މަތިވެރިކަން ގިނަގުނަ ކަމަށާއި، މުސްލިމުންނަށް މާތް ﷲ ދެއްވާފައިވާ މި ފުރުސަތުތަކުގެ ބޭނުން ރަނގަޅަށް ހިފާ ބަޔަކު ކަމުގައިވާން ޖެހޭ ކަމަށެވެ. ޚުތުބާގައި ބުނީ ހައްޖުމަހުގެ ފުރަތަމަ 10 ދުވަހަކީ މާތްﷲ ލައްވާފައިވާ އެންމެ މާތް ދުވަސްތައް ކަމަށާއި، މި ދުވަސްތަކުގައި މާތްﷲގެ މަތިން ހަނދުމަކުރުން އިތުރު ކުރަން ޖެހޭ ކަމަށެވެ.
ޚުތުބާގައި ބުނީ ހެޔޮކަން ބޮޑު ދުވަސްތަކުގައި ޞާލިޙު އަމަލުތައް ގިނަކޮށް، ﷲ ގެ ރުހިވޮޑިގަތުން ލިބޭތޯ ވާދަ ކުރަންޖެހޭ ކަމަށެވެ. މި ދިހަ ދުވަހު ކުރުން ހެޔޮވެގެންވާ އަމަލުތަކުގެ ތެރޭގައި، ރޯދަހިފުމާއި، ގުރްއާން ކިޔެވުމާއި، ގިނަގިނައިން މާތް ﷲ ހަނދުމަކުރުން ހިމެނޭ ކަމަށެވެ. މާތް ﷲ ގެ ޙަޟްރަތުގައި އެންމެ ލޮބުވެތިކަން ބޮޑީ، މާތްﷲ ހަނދުމަކުރުންކަން ޚުތުބާގައި ފާހަގަކޮށްފައިވެއެވެ.
ބަރަކާތްތެރިކަން އެންމެ ބޮޑު ޒަމާނަކީ، ހައްޖު މަހުގެ ފުރަތަމަ ދިހަ ދުވަސްކަން ފާހަގަކޮށް ޚުތުބާގައި ބުނީ އެ 10 ދުވަހުގެ މާތްކަމުގެ ތެރޭގައި، މާތް ﷲ މި މަތިވެރި އިސްލާމް ދީން ފުރިހަމަކޮށްދެއްވުން ހިމެނޭ ކަމަށެވެ. މި ދީން ފުރިހަމަވުމުގެ ސަބަބުން، މި ދީނުގެ އަހުލުވެރިން ކުރާ އަމަލުތަކަށް ފުރިހަމައަށް ސަވާބު ލިބޭ ކަމަށާއި، އެމީހުންގެ ޙަޔާތް އަމާންކަމާއި، ރައްކައުތެރިކަން ލިބިފައިވާ ހެޔޮ ލަފާ ޙަޔާތަކަށް ވާ ކަމަށެވެ. އަދި އެމީހުންގެ ސުލޫކާއި، އަހުލާގު ރިވެތިވާ ކަމަށާއި، އިސްލާމް ދީން ފުރިހަމަވުމުގެ ސަބަބުން، މުސްލިމުންނަށް އެންމެ ސީދާ މަގު އެނގި، އެ މަގަށް ތަބާވެގެން ތިބުމުގެ ނަޞީބު ލިބޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މާތްﷲގެ ހަޟްރަތުގައި އެންމެ ލޮބުވެތިވެގެންވާ މައްސަރުތަކަކީ، ޙުރުމަތްތެރިވެގެންވާ ހަތަރު މައްސަރެއް ކަމަށާއި، އެ މައްސަރުތަކުގެ ތެރެއިން އެންމެ ލޮބުވެތިކަން ބޮޑު މައްސަރަކީ ވެސް ހައްޖު މަސް ކަމަށެވެ.
ޚުތުބާގައި ބުނީ މާތްﷲއަށް ހަނދުމަކުރާ މީހާ ކުފުރުގެ ނުބައި އަނދަވަޅަށް ވެއްޓުމުންނާއި ޝައިތާނާގެ މަޅީގައި ޖެހުމުންނާއި، ނަރަކައިން ރައްކައުތެރިކޮށްދެއްވާ ކަމަށެވެ. މާތް ﷲ ހަނދުމަކުރާ މީހާގެ މައްޗަށް އެކަލާނގެ ރަހުމަތާއި، މަލާއިކަތުންގެ ހެޔޮ ދުއާ ލިބޭނެކަމެއްގެ ގޮތުގައި ޚުތުބާގައި ފާހަގަކޮށްފައިވެއެވެ.
