އިންޑޮނޭޝިއާގެ ޑޮކްޓަރުންގެ އިމިއުނިޓީ ވަރުގަދަކުރަން މޮޑާނާގެ ވެކްސިން ޖަހަނީ

އިންޑޮނޭޝިއާގައި ކޮވިޑް-19ގެ ހާލަތު ގޯސްވެ، ބައްޔާ ދެކޮޅަށް އެ ގައުމުގެ ޑޮކްޓަރުންގެ އިމިއުނިޓީ ވަރުގަދަކުރުމުގެ މަސައްކަތް ފަށައިފިއެވެ.

ކޮވިޑް-19ގެ ސަބަބުން އިންޑޮނޭޝިއާގައި 500 އެއްހާ ޑޮކްޓަރުން މަރުވެފައިވާ ކަމަށް ރިޕޯޓްތަކުން ދައްކާއިރު، އެ ގައުމުން މިވަނީ ޑޮކްޓަރުންގެ ތެރެއިން ޗައިނާގެ ސިނޮވެކް ކުންފުނީގެ ކޮވިޑް-19 ވެކްސިން ޖަހައިގެން ތިބި ޑޮކްޓަރުންގެ އިމިއުނިޓީ ވަރުދަގަކުރުމަށް ބޫސްޓަރ ޝޮޓެއްގެ ގޮތުގައި މޮޑާނާގެ ކޮވިޑް-19 ވެކްސިން ޖަހަން ނިންމާފައެވެ.

މިކަމާގުޅޭ ގޮތުން ވާހަކަދައްކަވަމުން އިންޑޮނޭޝިއާގެ ހެލްތު މިނިސްޓަރ ވަނީ އިންޑޮނޭޝިއާގެ ސްކޫލް އޮފް މެޑިސިންގައި މިހާރު 50 އެއްހާ ސިއްހީ ޚިދުމަތްތެރިންނަށް ވެކްސިންގެ ބޫސްޓަރ ޝޮޓެއްގެ ގޮތުގައި މޮޑާނާގެ ވެކްސިން ޖަހާފައިވާ ކަމަށް ވިދާޅުވެފައެވެ. މިނިސްޓަރ ވަނީ އެހުރިހާ ޚިދުމަތްތެރިން ވަނީ ސިނޮވެކްގެ ވެކްސިން ޖަހާފައި ކަމަށާއި މޮޑާނާގެ ޑޯޒެއް ޖަހަނީ އެކަން ކުރަން ރުހިގެން ކަމަށް ވިދާޅުވެފައެވެ.

އިންޑޮނޭޝިއަން މެޑިކަލް އެސޯސިއޭޝަންގެ މިޓިގޭޝަން ޓީމުން އާންމުކޮށްފައިވާ މައުލޫމާތުތައް ދައްކާގޮތުން މާޗު މަހުން ފެށިގެން މިހާތަނަށް 491 ޑޮކްޓަރުން ކޮވިޑް-19 ގައި ވަނީ މަރުވެފައެވެ.

އިންޑޮނޭޝިއާ އަކީ މިހާރު އޭޝިއާގައި އެންމެ ކޮވިޑް-19ގެ ކޭސްތައް ފެންނަމުންދާ އެއް ގައުމެވެ. އެގޮތުން ހޮނިހިރު ދުވަހު އެކަނިވެސް އެގައުމުން 51,952 މީހުން ކޮވިޑަށް ޕޮޒިޓިވްވެފައިވާ އިރު، 1,092 މީހުން ވަނީ ބަލީގައި މަރުވެފައެވެ.