ތައިލެންޑްގައި ކޮވިޑްގެ ހާލަތު ގޯސްވަމުންދާތީ ލޮކްޑައުންގެ ފިޔަވަޅުތައް ވަރުގަދަކޮށްފި

ތައިލެންޑްގައި ކޮވިޑްގެ ހާލަތު އިތުރަށް ގޯސްވަމުންދާތީ މިހާރު އަޅާފައިވާ ލޮކްޑައުންގެ ފިޔަވަޅުތައް އިތުރު ސަރަހައްދުތަކަށް ފުޅާކޮށް، ފިޔަވަޅުތައް ވަރުގަދަކޮށްފިއެވެ.

ތައިލެންޑްގެ ސަރުކާރުން ވަނީ ކޮވިޑްގެ ހާލަތު ގޯސް ޕްރޮވިންސްތަކުގައި އަންނަ ހަފްތާއިން ފެށިގެން އަޅާނެ ފިޔަވަޅުތައް ހާމަކޮށްފައެވެ. މީގެތެރޭގައި ހިމެނެނީ އެތެރޭގެ ބައެއް އުދުހުންތައް މެދުކަނޑާލުމާއި ކާފިއު ހިންގާ އޭރިއާތައް އިތުރުކުރުމެވެ.

ތައިލެންޑުގައި އާދިއްތަ ދުވަހު ވަނީ 11،397 މީހުންނަށް ކޮވިޑް ޖެހިފައެވެ. އަދި 101 މީހަކު ވަނީ މަރުވެފައެވެ. މިއާއެކު އެގައުމުގައި ކޮވިޑް ޖެހުނު މީހުންގެ އަދަދު ވަނީ 403،386ށް އަރާފައެވެ. އަދި 3341 މީހުން ވަނީ މަރުވެފައެވެ.

އޭޕްރީލް މަހުން ފެށިގެން އެގައުމުގައި ކޮވިޑްގެ ހާލަތު ގޯސްވަމުން އަންނައިރު، ހާލަތު އިތުރަށް ގޯސްވެފައިވަނީ ހަލުވިކަމާއެކު ފެތުރެމުން އަންނަ ދެ ވޭރިއަންޓް ކަމުގައިވާ އަލްފާ އަދި ޑެލްޓާ ވޭރިއަންޓުގެ ސަބަބުންނެވެ.

ވައިރަސް ފެތުރުން ކޮންޓްރޯލްކުރުމަށްޓަކައި، ބުދަ ދުވަހުން ފެށިގެން ބެންކޮކަށް ދިއުމާއި، ބެންކޮކުން ކޮވިޑްގެ ހާލަތު ގޯސް ސަރަހައްދުތަކަށް ދިޔުން ވަނީ މަނާކޮށްފައެވެ. އެގޮތުން ފްލައިޓްތައް މެދުކަނޑާލާނެކަމަށް އެގައުމުގެ ސިވިލް އޭވިއޭޝަން އޮތޯރިޓީން ވަނީ ބުނެފައެވެ.

މީގެތެރެއިން އިސްތިސްނާވާނީ މެޑިކަލް ހާލަތްތަކުގައި ދަތުރުކުރާ ފްލައިޓްތަކާއި އެމަރޖެންސީ ހާލަތުގައި ދަތުރުކުރާ ފްލައިޓްތަކުގެ އިތުރުން ސަރުކާރުގެ އެކި ބޭނުންތަކަށް ދަތުރުކުރާ ފްލައިޓްތަކެވެ. އެހެން ފްލައިޓްތަކަށް ދަތުރުކުރެވޭނީ 50 އިންސައްތަ ފަސިންޖަރުންނާ އެކުއެވެ.

އަންގާރަ ދުވަހުން ފެށިގެން ކޮވިޑްގެ ހާލަތު ގޯސް ސަރަހައްދުތަކުގައި ދިރިއުޅޭ މީހުން ގޭގައި ތިބުމަށް މަޖުބޫރުވާގޮތަށް ފިޔަވަޅުތައް ވަނީ ވަރުގަދަކޮށްފައެވެ. އެހެންނަމަވެސް ސުޕަރމާކެޓްތަކާއި ބޭންކްތަކާއި ހޮސްޕިޓަލްތައް ހުޅުވާފައި ހުންނާނެކަމަށް ސަރުކާރުން ވަނީ ބުނެފައެވެ.