ކޭން ހޯދުމަށް ސިޓީން ބޮޑު ހުށަހެޅުމެއް

މި ޓްރާންސްފާ މާކެޓުގައި މެންޗެސްޓާ ސިޓީގެ އެންމެ ބޮޑު ޓާގެޓަކީ ޓޮޓެންހަމް ހޮޓްސްޕާއަށް ކުޅެމުން އަންނަ ކޭން ހޯދުން ކަމަށް ރިޕޯޓްތައް ބުނެފިއެވެ.

އުމުރުން 27 އަހަރުގެ ކޭން މި ވަގުތު ޓޮޓެންހަމުގެ އެއްބަސްވުމުގައި ހުރީ 2024 ވަނަ އަހަރުގެ ޖޫން މަހުގެ ނިޔަލަށެވެ. 2011 ވަނަ އަހަރު ޓޮޓެންހަމުގެ ސީނިއާ ޓީމުން ޖާގަ ހޯދި ކޭނަށް މިހާތަނަށް ޓޮޓެންހަމާއެކު ބޮޑު ކާމިޔާބީއެއް ހޯދިފައެއް ނުވެއެވެ. އެކަމަކު އޭނާ ވަނީ 2018-2019 ވަނަ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލާއި، 2014-2015 އަދި މިދިޔަ ސީޒަނުގެ އިނގިރޭސި ލީގު ކަޕުގެ ފައިނަލުގައި ކުޅެފައެވެ.

ރިޕޯޓްތައް ބުނާ ގޮތުން ސިޓީން ކޭން ގަތުމަށް ބޮޑު ހުށަހެޅުމެއް ހުށަހަޅާނެއެވެ. އެކަމަކު މިހާތަނަށް ސިޓީން ކޭން ގަތުމަށް ޝައުގުވެރިކަން ފާޅުކޮށްފައެއް ނުވެއެވެ.

ރިޕޯޓްތައް ބުނާ ގޮތުން ސިޓީން ކޭންގެ ސޮއި ހޯދުމަށް މަސައްކަތް ކުރަމުން އަންނަނީ އެ ޓީމުގެ ކޯޗު ޕެޕް ގާޑިއޯލާގެ އެދުމުގެ މަތިންނެވެ. އަދި މި ޓްރާންސްފާ މާކެޓުގައި ކޭންގެ އިތުރުން އެސްޓަން ވިލާއަށް ކުޅެމުން އަންނަ ޖެކް ގްރީލިޝް ހޯދުމަށްވެސް ގާޑިއޯލާ ވަނީ އެދިފައެވެ.

މީގެ ކުރިން ކޭން ވަނީ މިދިޔަ ސީޒަނަށްފަހު ޓޮޓެންހަމް ދޫކޮށްލާނެ ކަމުގެ އިޝާރާތެއް ކޮށްފައެވެ. މީގެ ކުރިން ދިން އިންޓަވިއުއެއްގައި ކޭން ވަނީ ފުޓްބޯޅައިގެ އެންމެ ބޮޑު ޓްރޮފީތައް ހޯދަން އޭނާވެސް ބޭނުންވާ ކަމަށާއި، އެހެންކަމުން ފުޓްބޯޅަ ކެރިއަރު ނިންމާލުމުގެ ކުރިން ބޮޑު މުބާރާތެއް ކާމިޔާބުކުރުމަކީ އަމާޒެއް ކަމަށް ބުނެފައެވެ.

ކޭންއަށް ސިޓީގެ އިތުރުން ޕީއެސްޖީންވެސް އަންނަނީ ފާރަލަމުންނެވެ. އެގޮތުން ކޭން ހޯދުމުގެ މަސައްކަތް ޕީއެސްޖީން ފެށީ މީގެ ކުރިން ޓޮޓެންހަމުގައި ކޭންއަށް އިރުޝާދުދިން އަދި މިހާރު ޕީއެސްޖީއަށް އިރުޝާދުދެމުން އަންނަ މައުރީސިއޯ ޕޮޗެޓީނޯގެ އެދުމުގެ މަތިން ކަމަށް ރިޕޯޓުތައް ބުނެއެވެ. އަދި ޕީއެސްޖީގެ އެއްބަސްވުން ފްރާންސްގެ ތަރި ކީލިއަން އެމްބާޕޭ އާނުކޮށްފިނަމަ، ކޭން ގަތުމަށް ޕީއެސްޖީ އޮތީ ތައްޔާރަށް ކަމަށްވެސް ރިޕޯޓުތައް ބުނެއެވެ.

މި ސީޒަނަށްފަހު ކޭން ޓޮޓެންހަމް ދޫކޮށްލާނެ ކަމަށް ބެލެވޭއިރު، އޭނާ ވަނީ މިހާތަނަށް އެ ޓީމުގައި މޮޅު ކުޅުމެއް ދައްކާފައެވެ. އެގޮތުން މިހާތަނަށް ޓޮޓެންހަމަށް ކުޅެދިން 334 މެޗުގައި ކޭން ވަނީ 220 ލަނޑު ޖަހާފައެވެ.