ރާއްޖޭގެ އާބާދީގެ 50 އިންސައްތަ މީހުން ވެކްސިން ފުރިހަމަކޮށްފި
ހޯމަ ދުވަހު ފުރަަތަމަ ޑޯޒް ޖަހާފައިވަނީ 334 މީހުން
ވެކްސިން ދިނުމުގެ ޕްރޮގްރާމްގެ ތެރެއިން
ރާއްޖޭގެ އާބާދީގެ 50 އިންސައްތަ މީހުން ވެކްސިންގެ ދެ ޑޯޒް ފުރިހަމަ ކޮށްފައިވާކަން ހާމަކޮށްފިއެވެ.
އެޗްއީއޯސީގެ ނޫސްވަރިންގެ ބައްދަލުވުމުގައި ވާހަކަދައްކަވަމުން ތަރުޖަމާނު ނަޒްލާ ރަފީގު ވިދާޅުވީ، ވެކްސިންގެ ދެ ޑޯޒް ފުރިހަމަކުރި މީހުންގެ އިންސައްތަ 50ން މައްޗަށް އަރާފައިވާކަމަށެވެ. އެންމެފަހުން އާއްމުކުރި ތަފާސްހިސާބުތަކަށް ބަލާއިރު، 246،841 (ޖުމްލަ ދެލައްކަ ސާޅީސް ހަ ހާސް އަށްސަތޭކަ ސާޅީސް އެކެއް) މީހަކު ވަނީ ވެކްސިންގެ ދެ ޑޯޒް ފުރިހަމަކޮށްފައެވެ. ހޯމަ ދުވަހު ވެކްސިންގެ ދެ ޑޯޒް ފުރިހަަމަކުރި 4،471 މީހަކު ކަމަށް އެޗްޕީއޭގެ ތަފާސްހިސާބުތަކުން ދައްކައެވެ.
ފުރަަތަމަ ޑޯޒް ޖަހާފައިވަނީ، 334 މީހުންނެވެ. މިއާއެކު ފަރަތަމަ ޑޯޒް ޖެހި މީހުންގެ އަދަދު މިވަނީ، 319،712 ( ތިން ލައްކަ ނަވާރަ ހާސް ހަތް ސަތޭކެ ބާރަ) ށް އަރާފައެވެ.
ރާއްޖޭގައި ޖަހަނީ ކޮވިޝީލްޑް ވެކްސިނާއި ސިނޯފާމް ވެކްސިނާއި ފައިޒާ ވެކްސިނެވެ. ފައިޒާ ވެކްސިން ޖަހަނީ ހާއްސަ ހާލަތްތަކުގައެވެ. ރާއްޖޭގައި ފުރަތަމަ ކޯވިޑް ވެކްސިން ޖަހަންފެށީ މި އަހަރުގެ ފެބްރުއަރީ މަހުގައެވެ. އެގޮތުން އެންމެ ފުރަތަމަ ޖަހަންފެށީ ކޮވިޝީލްޑް ވެކްސިނެވެ.
