ރާއްޖޭގެ އާބާދީގެ 32 އިންސައްތައަކީ ރާއްޖޭގައި ދިރިއުޅޭ ބިދޭސީން
ރާއްޖޭގައި ދިރިއުޅޭ ބިދޭސީންގެ 38 އިންސައްތަ މީހުން މަސައްކަތް ކުރަނީ ކޮންސްޓްރަކްޝަން ދާއިރާގައި
ރާއްޖޭގެ އާބާދީގެ 568،362 ގެ ތެރެއިން 182،696 އަކީ ބިދޭސީން
ރާއްޖޭގެ އާބާދީގެ 32 އިންސައްތައަކީ ރާއްޖޭގައި ދިރިއުޅޭ ބިދޭސީން ކަމަށް ސްޓެޓިސްޓިކްސް ބިޔުރޯއިން ހާމަ ކޮށްފިއެވެ.
ދުނިޔޭގެ އާބާދީގެ ދުވަހާ ގުޅިގެން އެ ބިޔުރޯއިން އާންމުކޮށްފައިވާ ތަފާސްހިސާބުތައް ދައްކާ ގޮތުން ރާއްޖޭގެ އާބާދީގެ 568،362 ގެ ތެރެއިން 182،696 އަކީ ބިދޭސީންނެވެ. ރާއްޖޭގައި ދިރިއުޅޭ ބިދޭސީންގެ 38 އިންސައްތަ މީހުން ކޮންސްޓްރަކްޝަން ދާއިރާގައި މަސައްކަތް ކުރަމުން ދާއިރު ދެވަނައަށް އެންމެ ގިނަ އަދަދެއްގެ ބިދޭސީން މަސައްކަތް ކުރާ ސިނާއަތަކީ ފަތުރުވެރިކަމުގެ ސިނާއަތެވެ. މިއީ ރާއްޖޭގައި އުޅޭ ބިދޭސީންގެ 18 އިންސައްތައެވެ.
ވަޒީފާ އަދާކުރާ އުމުރުފުރައިގެ ތެރެއިން 20 އަހަރާއި 44 އަހަރާ ދެމެދު ދިވެހިންނަށް ވުރެ ގިނައީ ބިދޭސީން ކަމަށް ވެސް މި ތަފާސްހިސާބުތަކުން ދައްކައެވެ. ސްޓެޓިސްޓިކްސް ބިޔުރޯއިން އާންމުކުރި މައުލޫމާތުތަކަށް ބަލާއިރު ރާއްޖޭގެ އާބާދީގެ 48 އިންސައްތައަކީ އަންހެނުންނެވެ. އަދި ދިރިއުޅެމުންދާ ބިދޭސީންގެ 9 އިންސަތައަކީ ވެސް އަންހެނުންނެވެ.
މީގެ އިތުރުން ރާއްޖޭގެ އާބާދީގެ 568،362 ގެ ތެރެއިން ގިނަ އަދަދެއްގެ ބަޔަކު ދިރިއުޅެމުން އަންނަނީ މާލޭގައެވެ. ދިވެހިންނާއި ބިދޭސީން ހިމެނޭހެން ޖުމްލަ 234،454 މީހުން އުޅެމުންދަނީ މާލޭގައި ކަމަށް ތަފާސްހިސާބުތައް ދައްކައެވެ. މިއީ ރާއްޖޭގެ އާބާދީގެ 41.3 އިންސައްތައެވެ.
ރާއްޖޭގައި މީހުން ދިރިއުޅެމުންދާ އުމުރުފުރާތަކަށް ބަލާއިރު އުމުރުން ދުވަސްވީ، 65 އަހަރުން މަތީގެ 19،531 މީހުން މިވަގުތު ރާއްޖޭގައި އުޅެމުންދާކަމަށް ބިޔުރޯއިން ވަނީ ހާމަކޮށްފައެވެ. އޭގެ ތެރެއިން 48 އިންސައްތަ ހިއްސާ ކުރަނީ އަންހެނުންނެވެ. މީގެ އިތުރުން އާބާދީގެ 23 އިންސައްތައަކީ 17 އަހަރުން ދަށުގެ ކުޑަކުދިންނެވެ. ރާއްޖޭގައި މިވަގުތު ތިބީ 128،635 ކުޑަކުދިންނެވެ.
