އަރުޝީފު ރައްކާކުރުމަށް އެންމެ ފުރަތަމަ ބޭނުންވަނީ ދާއިމީ އިމާރާތެއް: ޢާމިރު
ބޯހިޔާވައްސެއް ހޯދައި، އެކަމަށް މަސައްކަތްކޮށްފިނަމަ، ބައިނަލްއަޤްވާމީ އެހީތެރިކަން ވެސް ލިބޭނެ
ގައުމީ އަރުޝީފުގެ ޑިރެކްޓަރ ޖެނެރަލް މުޙައްމަދު ޢާމިރު
ގައުމީ އަރުޝީފު ރައްކާކުރުމަށް އެންމެ ފުރަތަމަ ބޭނުންވަނީ އެތަނުގެ ދާއިމީ އިމާރާތެއްކަމަށް، ގައުމީ އަރުޝީފުގެ ޑިރެކްޓަރ ޖެނެރަލް މުޙައްމަދު ޢާމިރު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން އާމިރު ވިދާޅުވީ، އަރުޝީފަކީ ވަކި ގޮތަކަށް، ވަކި ހަމައެއްގެ ތެރެއިން ރައްކާކޮށް ބަލަހައްޓަން ޖެހޭ އެއްޗެއް ކަމަށެވެ. އެގޮތުން އަބަދު އެއްތަނުން އަނެއްތަނަށް އެ ގެންދިއުމާއި އެއާ ކުޅެ އޭގައި އަތްލުމަކީ ކުރެވޭނެ ކަންކަން ނޫން ކަމަށް އޭނާ ވިދާޅުވިއެވެ.
އާމިރު ވިދާޅުވީ އަރުޝީފުގައި ކޮންމެ ކަމަކީ ވެސް މިހާރު ވަރަށް އުނދަގޫ ކަންތައްތަކެއް ކަމަށެވެ. އަދި އަރުޝީފު ރައްކާކުރުމުގައިވެސް ވަރަށް ބޮޑެތި ދަތިތައް ހުރިކަން އޭނާ ފާހަގަކުރެއްވިއެވެ. ދައުލަތުގެ ރިކޯޑުތައް ރައްކާކޮށްފައި ހުންނަގޮތުގެ މިސާލު ނަންގަވައި އާމިރު ވިދާޅުވީ އެތަކެތި ރައްކާކުރުމަށް ކޮންމެ އަހަރަކު އެތައް ޚަރަދެއް ހިނގާ ކަމަށެވެ. އެހެންވީމައި އޭގެ ބަދަލުގައި ސައިންޓިފިކް ގޮތްތަކުން އަރުޝީފު ހަރުދަނާގޮތަކަށް ރައްކާކޮށް، އެއަށް ރަނގަޅު ބޯހިޔާވަހިކަމެއް ހޯދުމަކީ ކޮންމެހެން ކުރަން ޖެހިފައިވާ ކަމެއް ކަމަށެވެ.
އަރުޝީފު ރައްކާކުރުމަށް ރަނގަޅު ބޯހިޔާވައްސެއް ހޯދައި އެކަމަށް މަސައްކަތްކޮށްފި ނަމަ އެކަމަށް ބައިނަލްއަޤްވާމީ އެހީތެރިކަންވެސް ލިބޭނެ ކަމަށް އޭނާ ވިދާޅުވިއެވެ. އެގޮތުން އެހީދޭނެ ފަންޑުތައް ވެސް މަދުނޫން ކަން ފާހަގަކުރައްވައި ވިދާޅުވީ، މައިގަނޑު ކަމަކީ އަރުޝީފަށް ބޯހިޔާވަހިކަމެއް ހޯދުން ކަމަށެވެ. އަދި ދެން ހުރި ކަންކަމަކީ ވަރަށް ފަސޭހައިން ކުރެވޭނެ ކަންތައްތައް ކަމަށެވެ.
އޭނާ ވިދާޅުވީ އަރުޝީފެއް އުފައްދައި، ތަނަކަށް ޖަމާކުރުމަކުން ނުނިމޭ ކަމަށެވެ. އެއިން ދޭން ޖެހޭ ޚިދުމަތްތަކެއް ވެސް ހުންނަކަން ފާހަގަކުރައްވައި، މައުލޫމާތަށް ފަސޭހައި ވާސިލްވާނެ ގޮތް ހެދުމަކީ ދޭން ޖެހޭ ޚިދުމަތެއް ކަމަށް ވިދާޅުވިއެވެ. ނަމަވެސް ޚިދުމަތްދޭން ޖެހޭ ކޮންމެ ފަހަރަކީ އަރުޝީފުގައި ރައްކާކޮށްފައިވާ އެއްޗެއްގެ އަސްލުގައި އަތްލާ ފަހަރަކަށް ވެގެން ނުވާނެ ކަމަށް އާމިރު ވިދާޅުވިއެވެ.
އެއްޗެހި އަރުޝީފުގައި ރައްކާކުރަނީ ގިނަ ދުވަސްވަންދެން ޤަދީމީ ތަކެތީގެ ގޮތުގައި ރައްކާކުރުމަށްޓަކައި ކަމަށާއި، އެހެންކަމުން ކޮންމެ ފަހަރަކު އޭގައި އަތްލުމުގެ ބަދަލުގައި އަމަލުކުރެވޭނެ އެހެން އުސޫލެއް އޮތުން މުހިންމު ކަމުގައި ވިދާޅުވިއެވެ. އަދި އޭގައި އަތްލާ ނަމަވެސް އަތްލާންޖެހޭއިރު އަޅަން ޖެހޭ ފިޔަވަޅުތަކެއް އަޅައި ރައްކާތެރިކަމާއެކު އެކަން ކުރުން މުހިންމު ކަމަށް ޢާމިރު ފާހަގަކުރެއްވިއެވެ.
