ދިވެހިރާއްޖޭގެ ނަމުގެ މާނައަކީ ކޮބާ؟

މޯލްޑިވްސް މިނަމަށް އަދި މިވީ އެންމެ 52 އަހަރެވެ. ދިވެހިރާއްޖެއަކީ ދިވެހި ބަހުން ރާއްޖޭގެ އާއްމު ނަމެވެ. އުރުދޫ، ހިންދީ އަދި ފާރިސީ ބަހުންނަމަ މަހަލްދީބެވެ. އަރަބި ބަހުން މަލްދީފެވެ. ދިވެހިރާއްޖޭގެ އިނގިރޭސި ނަން މޯލްޑިވް އައިލެންޑްސް ކިޔާފައިވަނީ މަހަލްދީބުގެ އިނގިރޭސި ނަމެއްގެ ގޮތުގައެވެ.

ދިވެހިރާއްޖޭގެ އިނގިރޭސި ނަން މޯލްޑިވްސް އަށް ހަމަޖެއްސީ 11 ނޮވެންބަރު 1968ގައި މި ޖުމުހޫރިއްޔާއާއެކުގައެވެ. އަދި 11 ނޮވެންބަރު 1968ގެ މި ޖުމުހޫރިއްޔާގެ ގާނޫނުއަސާސީގައި ވަނީ "ދިވެހި ޖުމުހޫރިއްޔާ"އެވެ. ރާއްޖެ މިނަމުގެ ލަފުޒީ މާނައަކީ ރަސްކަމެވެ. މަމްލިކާ/ކިންގްޑަމް އެވެ. ރާއްޖެ މިނަމުގެ މަފުހޫމަކީ ގައުމެވެ.

ކަމާބެހޭގޮތުން ތާރީޚީ އިލްމުވެރިންގެ ރައުުޔު ތަފާތެވެ. އަލްއުސްތާޛު އަލްމުއައްރިޚު އިބްރާހީމް ޝިހާބުގެ ރައުޔަކީ ޖަޒީރާތަކުގެ ހާރެވެ. މިއީ މިހާރުގެ ނަޒަރުން، ރާއްޖޭގެ ތިމާވެއްޓާއި ސަގާފަތާއި ފަތުރުވެރިކަމާއި ގުޅޭ ނަމެކެވެ.

އަލްއުސްތާޛު އަލްމުއައްރިޚު މުޙައްމަދު އިބްރާހީމް ލުޠުފީގެ ރައުޔުގައި އަންހެނުންގެ ރާއްޖެއެވެ. މިއީ މިހާރުގެ ނަޒަރުން، އަންހެނުންގެ ކުރިއެރުމާއި ބަވަނަވެފައިވާ ދުނިޔެއާއި ގުޅޭ ނަމެކެވެ.

އަލްމުޙްތަރަމް އަލްމުއައްރިޚު ޢަބްދުލްޙަކީމް ޙުސައިން މަނިކުގެ ރައުޔުގައި މަސްވެރިންގެ ރާއްޖެއެވެ. މިހާރުގެ ނަޒަރުން މިއީ ރާއްޖޭގެ ސަގާފަތާއި ގަދީމީ ދިވެހި އިގުތިސާދާއި ގުޅޭ ނަމެކެވެ.

ވީމާ، މިއީ ވަކިގޮތެއް ކަނޑައެޅި ނިމިފައިވާ ނަމެއް ނޫނެވެ. ކަމެއް ނޫންމެއެވެ. ބޮޑަށް ބުރަވެވެނީ މަރުހޫމް ޝިހާބު ވިދާޅުވިފަދައިން ޖަރީރާތަކުގެ ހާރު ކަމުގައެވެ.