ނަފުރަތުގެ ބިލް ދިރާސާކުރުމަށް އަނބުރާ ކޮމިޓީއަށް
ބިލް އަނބުރާ ކޮމިޓީއަށް ފޮނުވުމަށް ފާސްކޮށްފައިވަނީ 39 މެމްބަރުންގެ ވޯޓުން
ރައްޔިތުންގެ މަޖިލީހުގެ ޖަލްސާގެ ތެރެއިން
އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުމަކީ ކުށެއް ކަމަށް ކަނޑައެޅުމަށް ޤާނޫނުލް ޢުޤޫބާތަށް ހުށަހެޅި އިސްލާހުގެ ބިލް އަލުން އަނބުރާ ކޮމިޓީއަށް ފޮނުވައިފިއެވެ.
ސަރުކާރުގެ ފަރާތުން ތުޅާދޫ ދާއިރާގެ މެމްބަރ ހިސާން ހުސައިން ހުށަހެޅުއްވި އިސްލާހު ދިރާސާކޮށްފައިވަނީ ޖުޑީޝަރީ ކޮމިޓީންނެވެ. ބިލް ހުށަހެޅުމާއެކު ރާއްޖޭގެ ދީނީ އިލްމުވެރިންނާއި އާންމުން ވަނީ މިބިލާ ދެކޮޅަށް ވާހަކަދައްކަވާފައެވެ. ކޮމިޓީން މިބިލް ދިރާސާކޮށްފައިވަނީ އިސްލާމިކް މިނިސްޓްރީ އާއި ޕްރޮސެކިޔުޓަރ ޖެނެރަލް އަދި ހިޔުމަން ރައިޓްސް ކޮމިޝަން އޮފް ދަ މޯލްޑިވްސް އިން ޚިޔާލު ހޯދާފައެވެ. މީގެއިތުރުން މިބިލަކީ އާންމުގެ މަސްލަހަތު ބޮޑު ބިލަކަށް ވުމުން އާންމުންގެ ޚިޔާލު ހޯދުމަށް ކޮމިޓީން ނިންމިކަމަށް ކޮމިޓީ ރިޕޯޓްގައި ބުނެފައިވެއެވެ. އެގޮތުން ހުޅުވާލި ފުރުސަތުގައި ގާތްގަނޑަކަށް 2462 ޚިޔާލު އާންމުންގެ ފަރާތުންނާއި ޖަމިއްޔާ ޖަމާއަތްތަކުން ކޮމިޓީއަށް ލިބިފައިވާކަމަށް ކޮމިޓީ ރިޕޯޓްގައި ބުނެފައިވެއެވެ.
މިހުރިހާ ފަރާތްތަކުގެ ޚިޔާލާއެކު ކޮމިޓީން ވަނީ މިބިލަށް ބޮޑެތި ބަދަލުތަކެއް ގެނެސްފައެވެ. ނަމަވެސް ކޮމިޓީން ގެނައި އިސްލާހުތަކަށް ފަހުން ސަރުކާރުގެ ފަރާތުން ވަނީ އަނެއްކާވެސް އިސްލާހުތަކެއް ހުށަހަޅާފައެވެ.
ބުރާސްފަތި ދުވަހު ކުރިޔަށްދިޔަ ޖަލްސާގައި މިބިލްގެ ކޮމިޓީ ރިޕޯޓަށް މެމްބަރުން ބަހުސްކުރައްވަމުން ގެންދެވިއިރު ވަނީ މިބިލް އަނބުރާ ކޮމިޓީއަށް ފޮނުވާލުމަށް ވާހަކަދައްކަވާފައެވެ. އަދި އެމްޑީޕީގެ ޕާލަމަންޓްރީ ގްރޫޕުން ވަނީ ބިލް އަނބުރާ ކޮމިޓީއަށް ފޮނުވުމަށް ފާސްކޮށްފައެވެ. ބިިލްގެ ކޮމިޓީ ރިޕޯޓަށް މެމްބަރުން ބަހުސްކުރައްވަމުން ވަކިން ޚާއްސަކޮށް އެމްޑީޕީގެ ބައެއް މެމްބަރުން ވަނީ ސަރުކާރުގެ ފަރާތުން މިބިލް މަޖިލީހަށް ހުށަހަޅާ ބިލް ހުށަހެޅުއްވި މެމްބަރު ނުރައްކަލަށް ހުށަހެޅުނުއިރުވެސް ސަރުކާރުން އެމެމްބަރު ދިފާއުކުރައްވާ އެއީ ސަރުކާރުން ހުށަހެޅުއްވި ބިލެއްކަމަށް ސާފުކޮށްދެއްވުމަށް އެއްވެސް މަސައްކަތެއް ކުރައްވާފައިނުވާތީ އެކަމާއި ކަންބޮޑުވުން ފާޅުކުރައްވާފައެވެ. އަދި ބިލްގެ ބެލެނިވެރި ފަރާތަކީ ކޮބައިތޯ ބައެއް މެމްބަރުން ވަނީ ސުވާލުއުފައްދަވާފައެވެ.
އަދި އެމްޑީޕީގެ މެމްބަރުންވެސް ހިމެނޭ ގޮތަށް މިބިލް ބޭރުކޮށްލުމަށް ވަނީ ގޮވާލައްވާފައެވެ. ނަމަވެސް މަޖިލީހުގެ ގަވާއިދު ބުނާގޮތުން ބިލެއް ބަލައިގަނެ ކޮމިޓީއަށް ދިރާސާކުރުމަށް ފޮނުވުމަށްފަހު ދެން އެބިލެއް މަޖިލީހުން ބޭރުކޮށެއްނުލެވޭނެއެވެ.
ބިލް އަނބުރާ ދިރާސާކުރުމަށް ކޮމިޓީއަށް ފޮނުވާލާފައިވަނީ ބިލާ ގުޅޭގޮތުން ހުރި ކަންބޮޑުވުންތަކަށް ހައްލު ހޯދުމުގެ ގޮތުންނެވެ. ބިލް އަނބުރާ ކޮމިޓީއަށް ފޮނުވުމަށް ހުށަހަޅުއްވާފައިވަނީ މެދު ހެންވޭރު ދާއިރާގެ މެމްބަރ އަލީ އާޒިމްއެވެ. އެހުށަހެޅުއްވުމަށް ތާއީދުކުރައްވާފައިވަނީ އުނގޫފާރު ދާއިރާގެ މެމްބަރ މުހައްމަދު ވަހީދެވެ. މިބިލް އަނބުރާ ކޮމިޓީއަށް ފޮނުވުމަށް ފާސްކޮށްފައިވަނީ 39 މެމްބަރުންނެވެ. ކޮމިޓީއަށް ފޮނުވުމަށް ނުފެންނަކަމަށް 3 މެމްބަރުން ވޯޓު ދެއްވިއިރު ވަކި ގޮތަކަށް ވޯޓު ނުދެއްވާ 2 މެމްބަރުން ތިއްބެވިއެވެ.
