ދިލިޕް ކުމާރު މަރުވެއްޖެ

ކުރީގެ މަޝްހޫރު އެކްޓަރ ދިލިޕް ކުމާރު މަރުވެއްޖެއެވެ.

އޭނާ މަރުވީ ބުދަ ދުވަހުގެ ހެނދުނުގެ ވަގުތެއްގައެވެ. މަރުވިއިރު އުމުރަކީ 98 އަހަރެވެ.

އިންޑިއަން އެކްސްޕްރެސް ނޫހުގައި ޑރ. ޖަލިލް ޕާކާއާ ހަވާލާދީ ބުނެފައިވަނީ ދިލިޕް މަރުވީ ބުދަ ދުވަހުގެ ހެނދުނު 07:30 ގައި ދިގު މުއްދަތަކަށް ބޭސް ކުރަންޖެހޭ ބައްޔަކަށް ފަރުވާ ހޯދަމުން ދަނިކޮށެވެ. އިންޑިއާގެ މުމްބާއީގައި ހުންނަ ހިންދޫޖާ ހޮސްޕިޓަލުގައި ދިލިޕް އެޓްމިޓް ކުރީ ނޭވާލާން އުނދަގޫވުމުގެ ސަބަބުންނެވެ.

މި މަހުގެ ކުރީކޮޅު ވެސް ދިލިޕްކުމާރު ނޭވާލާން އުނދަގޫވުމާ ގުޅިގެން ހޮސްޕިޓަލުގައި އެޑްމިޓްކޮށްފައިވާއިރު އޭރު ޑޮކްޓަރުން ވަނީ އޭނާގެ ފުއްޕާމޭގައި ފެން ހެދިފައިވާ ކަމަށް ބުނެފައެވެ.

ދިލިޕް ކުމާރު ވަނީ 65 ފިލްމްގައި މަސައްކަތް ކޮށްފައެވެ. އޭނާގެ ފާހަގަކޮށްލެވޭ ފިލްމްތަކުގެ ތެރޭގައި 1955 ވަނަ އަހަރު ރިލީޒްކުރި "ދޭވްދާސް"، 1957 ވަނަ އަހަރު ރިލީޒްކުރި "ނަޔާ ދައުރު"، 1960 ވަނަ އަހަރު ރިލީޒްކުރި "މުގަލް އީ އާޒަމް"، 1961 ވަނަ އަހަރު ރިލީޒްކުރި "ގަންގާ ޖަމުނާ"، 1981 ވަނަ އަހަރު ރިލީޒްކުރި "ކްރާންޓީ" އަދި 1986 ވަނަ އަހަރު ރިލީޒްކުރި "ކަރްމާ" ހިމެނެއެވެ.

ދިލިޕް ކުމާރު އެންމެ ފަހުން ފެނިފައިވަނީ 1998 ވަނަ ފިލްމް "ގީލާ" އިންނެވެ. އޭނާއަށް ވަނީ 1994 ވަނަ އަހަރު "ދާދާސާހެބް ޕަލްކޭ އެވޯޑް" އަރުވާފައެވެ. އަދި 2015 ވަނަ އަހަރު "ޕަދްމާ ވިބޫޝަން" އެވޯޑް ވެސް ދީފައެވެ.

ދިލިޕް ކުމާރު މަރުވުމާ ގުޅިގެން އިންޑިއާގެ ގިނަ ބަޔަކު ތައުޒިޔާ ކިޔަމުން އަންނައިރު އެ ގައުމުގެ ބޮޑުވަޒީރު ނަރެންދްރަ މޯދީ ވެސް ވަނީ ތައުޒިޔާ ވިދާޅުވެފައެވެ. އެގޮތުން މޯދީ ކުރެއްވި ޓުވީޓެއްގައި ވިދާޅުވީ ދިލިޕް އަކީ ލެޖެންޑެއް ކަމަށާއި އޭނާ މަރުވުމުން އެއީ ލިބުނު ވަރަށް ބޮޑު ހިތާމެއް ކަމަށެވެ.