ޔޫރޯ 2020 ގެ ސެމީ ފައިނަލުގައި ދުނިޔޭގެ ޗެމްޕިއަންކަން ހަތަރު ފަހަރު ހޯދާފައިވާ އިޓަލީ އާއި ޔޫރޯގެ އެންމެ ކާމިޔާބު ޓީމުތަކުގެ ތެރޭގައި ހިމެނޭ ސްޕެއިން ބައްދަލުކުރާ މެޗަކީ ސެމީ ފައިނަލް މެޗުތަކުގެ ތެރެއިން އެންމެ ފޯރިގަދަވާނެ އެއް މެޗެވެ.

ސްޕެއިނުން ވަނީ މިހާތަނަށް ތިން ފަހަރު މި މުބާރާތް ކާމިޔާބުކޮށްފައެވެ. ދެން މި މުބާރާތް ތިން ފަހަރު ކާމިޔާބުކޮށްފައިވަނީ ޖަރުމަނުންނެވެ. އެހެންކަމުން މި އަހަރުގެ މުބާރާތް ކާމިޔާބުކޮށް ސްޕެއިނަށް މި މުބާރާތުގެ އެންމެ ކާމިޔާބު ޓީމުގެ ލަގަބު ލިބުމުގެ ފުރުސަތު އެބައޮތެވެ. އިޓަލީއަށް މި މުބާރާތް ކާމިޔާބު ކުރެވިފައިވަނީ އެންމެ ފަހަރަކުއެވެ. ދުނިޔޭގެ ޗެމްޕިއަންކަން ހަތަރު ފަހަރު ހޯދާފައިވާ އިޓަލީއަކީ މި މުބާރާތުގައި މާކަ ކާމިޔާބު ޓީމެއް ނޫނެވެ. އެގޮތުން އިޓަލީން މި މުބާރާތް ކާމިޔާބުކޮށްފައިވަނީ 1968 ވަނަ އަހަރު އެކަންޏެވެ.

މި ފަހަރުގެ މުބާރާތުގެ ސެމީ ފައިނަލަށް އިޓަލީ ދަތުރުކުރީ ކުއާޓާ ފައިނަލުގައި ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް ބަލިކޮށްގެންނެވެ. އެ މެޗުން އިޓަލީ މޮޅުވީ 2-1 ގެ ނަތީޖާއަކުންނެވެ. އަނެއްކޮޅުން ސެމީ ފައިނަލަށް ސްޕެއިން ދަތުރުކުރީ ކުއާޓާގައި ޕެނަލްޓީ ޖަހައިގެން ސްވިޓްޒަލެންޑް ބަލިކުރުމަށްފަހުއެވެ. 

މީއީ އިޓަލީ އާއި ސްޕެއިނުން ޔޫރޯގެ ނޮކްއައުޓް ބުރުގައި ޖެހިޖެހިގެން ވާދަކުރާ ހަތަރުވަނަ ފަހަރެވެ. މީގެ ކުރިން މި ދެ ޓީމުގެ ކުރިމަތިލުންތަކުގެ ތެރެއިން އެންމެ ފޯރިގަދަ ކުރިމަތިލުމަކަށްވީ 2012 ވަނަ އަހަރުގެ ކުރިމަތިލުމެވެ. އެ އަހަރުގެ ފައިނަލުގައި އިޓަލީ އަތުން ސްޕެއިން ވަނީ ފަސޭހަކަމާއެކު 4-0 ގެ ނަތީޖާއަކުން މޮޅުވެފައެވެ. އޭގެ ފަހުން 2016 ވަނަ އަހަރު ބޭއްވި ޔޫރޯ މުބާރާތުގެ ދެވަނަ ބުރުގައިވެސް މި ދެ ޓީމު ބައްދަލުކުރިއިރު، އެ ފަހަރު އިޓަލީން ވަނީ 2-0 ގެ ނަތީޖާއަކުން ސްޕެއިންގެ މައްޗަށް ކުރި ހޯދާފައެވެ.

މިފަހަރުގެ މުބާރާތުގެ ސެމީގެ މެޗަށް ނުކުންނައިރު އިޓަލީއަށް އޮތް އެންމެ ބޮޑު މައްސަލައަކީ އެ ޓީމުގެ ޑިފެންޑަރު ލެއޮނާޑޯ ސްޕިނައްޒޯލާއަށް ލިބުނު އަނިޔާގެ ސަބަބުން، އޭނާއަށް ދެން މި މުބާރާތުގައި ނުކުޅެވުމެވެ. ސްޕިނައްޒޯލާއަށް އަނިޔާވީ ކުއާޓާ ފައިނަލުގައި ބެލްޖިއަމާ ދެކޮޅަށް ކުޅުނު މެޗުގެ ތެރެއިންނެވެ.

ސްޕެއިން މެޗުގެ ކުރިން ވާހަކަދައްކަމުން އިޓަލީގެ ކޯޗު ރޮބާޓޯ މަންޗިނީ ބުނީ މިއީ އިޓަލީން މި މުބާރާތުގައި ކުޅެން ޖެހޭ އެންމެ ޕްރެޝަރު ބޮޑު މެޗު ކަމަށާއި، އެގޮތުން ސްޕެއިނަކީ މެޗު ފެށިގެން އަބަދުވެސް ބޯޅަ ގިނަ ވަގުތު އެ މީހުންގެ އަތްދަށުގައި ބާއްވާ ޓީމެއް ކަމަށެވެ. އެކަމަކު މި މެޗުގައި ސްޕެއިނަށް ގިނަ ވަގުތު އެ މީހުންގެ އަތްދަށުގައި ބޯޅަ ގެންގުޅެން ފުރުސަތު ނުދޭނެ ކަމަށާއި، އަދި ސްޕެއިންގެ ބަލިފައިތަކުގެ ބޭނުން ހިފައި މި މެޗުން މޮޅުވާން ކުރަންޖެހޭ ކަންކަން އިޓަލީ ކުޅުންތެރިންނަށް އެނގޭނެ ކަމަށްވެސް ބުންޏެވެ. އަދި މި މެޗު ވެގެންދާނީ ފޯރިގަދަ މެޗަކަށް ކަމަށްވެސް މަންޗިނީ ވަނީ ބުނެފައެވެ.

ސްޕެއިންގެ ކޯޗު ލުއިސް އެންރީކޭ ބުނީ މި އަހަރުގެ މުބާރާތުގައި އިޓަލީ ފެންނަނީ ތަފާތު މޮޅު ޓީމެއްގެ ގޮތުގައި ކަމަށާއި، އެގޮތުން އިންގްލެންޑް ނަގާފައި އިޓަލީއަކީ މިހާތަނަށް ބައިކޮޅަށް އެންމެ މަދުން ލަނޑު ވަން ޓީމު ކަމަށެވެ. އަދި ސްޕެއިނަށް މި މުބާރާތުގައި ލަނޑު ނުޖެހުމުގެ މައްސަލަ އެބައޮތް ކަމަށާއި، އެހެންކަމުން މި މެޗަށް ނުކުންނަނީ އެކަންކަމަށް ވިސްނައިގެން ކަމަށްވެސް އެންރީކޭ ބުންޏެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ 22:30 ގައި ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓުންގެ ގޮތުގައި ބައިވެރިވެވަޑައިގަންނަވާނީ އިސްމާޢީލް ޒަރިިޔަންދު އާއި އިމާދު ލަތީފެވެ.

އިޓަލީ އާއި ސްޕެއިން ބައްދަލުކުރާ މެޗު ފަށާނީ އަންގާރަ ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.