ރާއްޖެޓީވީގެ ޔޫރޯ ކަވަރޭޖަށް އެނަލިސްޓުންނާއި ކުޅިވަރު އާއިލާގެ ތައުރީފާއި ހިތްވަރު

ދުނިޔޭގެ އެއްމެ ބޮޑު އެއް ފުޓްބޯޅަ މުބާރާތް ކަމަށްވާ ޔޫރޯ 2020 އަށް ހާއްސަކޮށްގެން ރާއްޖެޓީވީ އިން ގެނެސްދިން ކަވަރޭޖަކީ މިހާތަނަށް ގެނެވުނު ކުޅިވަރުގެ އެއްމެ ފުރިހަމަ ކަވަރޭޖް ކަމަށް އެނަލިސްޓުން އަދި ކުޅިވަރުގެ އާއިލާ އިން ބުނެފިއެވެ.

ޔޫރޯ ކަވަރޭޖާއި ބެހޭ ގޮތުން ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަމުން އެނަލިސްޓުންގެ ޓީމުގައި ހިމެނޭ މަޝްހޫރު ފުޓްބޯޅަ ކޯޗު އިހްސާން އަބްދުލް ޢަނީ (ސާންތި) ބުނީ ރާއްޖެޓީވީ އިން ގެެނެސްދިން މިފަދަ ބޮޑު ކަވަރޭޖެއްގައި ބައިވެރިވީ އަލަށް ކަމަށާއި އެހެން ނަމަވެސް މި ކަވަރޭޖް ގެނެސްދިން ފުރިހަމަ ކަމާއި އިންތިޒާމުތަކުގެ ރަނގަޅުކަމުން އޭނާއަށް ވަރަށް ބޮޑު ހައިރާންކަމެއް ލިބިފައިވާ ކަމަށެވެ.

ޔޫރޯ ފުޓްބޯޅަ މުބާރާތުގެ 51 މެޗު ރާއްޖެޓީވީގެ ބެލުންތެރިންނާއި ހަމަޔަށް ގެނެސްދިން އިރު މެޗާއި ގުޅޭ ތަފާތު ރިޕޯޓްތަކާއި އަގު ހުރި އިނާމުތުގެ އިތުރުން ފުޓްބޯޅަ އާއިލާގެ ގިނަ ބަޔަކު ޝޯވތަކުގައި ވަނީ ބައިވެރިކޮށްފައެވެ.

ސާންތި ބުނީ ކަވަރޭޖެއް ގެނެސްދިނުމަކީ ކިހާ ބޮޑު އަދި ބުރަ މަސައްކަތެއްކަން އިހުސާސްކުރެވުނީ ރާއްޖެޓީވީއަށްް އެނަލިސްޓެއްގެ ގޮތުގައި މަސައްކަތްކޮށްލަން ލިބުމުން ކަމަށާއި ޔޫރޯ ގެނެސްދިނުމަށްޓަކައި ރާއްޖެޓީވީގެ މުވައްޒަފުންކޮށްފައި ވަނީ އަގު ނުކުރެވޭނެ ބޮޑު މަސައްކަތެއް ކަމަށެވެ.

މިހާތަނަށް މިފަދަ ކަވަރޭޖްތަކުގައި އެހެންތަންތަނުގައި ވެސް މަަސައްކަތްކޮށްފައިވާއިރު މިހާ ފުރިހަމަ ކަވަރޭޖެއްގައި ބައިވެރިވެވުނީ އަލަށް ކަމަށާއި ކުރިޔަށް އޮތް ތަނުގައި ވެސް ކުޅިވަރުގެ ކަމެއްގައި ފުރިހައަށް އެއްބާރުލުން ރާއްޖެޓީވީއަށް ދޭނެ ކަމަށް ސާންތި ބުންޏެވެ.

ކުޅިވަރު ފައިލް ޕްރޮގްރާމްގައި ވާހަކަ ދައްކަމުން މުޙައްމަދު ޝިޔާޒް (މޯހަން) ވިދާޅުވީ ޔޫރޯ ކަވަރޭޖަކީ ރާއްޖޭގެ އެއްމެ ގިނަ ބަޔަކު ބެލި ފުޓްބޯޅަ ކަވަރޭޖް ކަމަށާއި ދުނިޔޭގެ އެއްމެ މަޝްހޫރު ފުޓްބޯޅަ މުބާރާތްތައް ދިވެހި ރަހަތަކާއި އެކު ދިވެހި ބަހުން ގެނެސްދިނުމަކީ ދިވެހިންގެ ތެރޭގައި ފުޓްބޯޅައަށް ބޮޑު ދިރުމެއް ލިބިގެންދާނެ ކަމެއް ކަމަށެވެ.

މަސްް ދުވަހަށް ދިގު ދެމިގެންދިޔަ ރާއްޖެޓީވީގެ ޔޫރޯ ކަވަރޭޖްގައި ރާއްޖޭގެ ފުޓްބޯޅައިގެ ގިނަ ކޯޗުން ބައިވެރިވެފައިވާއިރު ފުޓްބޯޅައިގެ ދާއިރާގައި ހަރަކާތްތެރިވާ ގިނަ ފަރާތްތަކަކުން ވަނީ ބައިވެރިވެފައެވެ.

ފުޓްބޯޅަ ކޯޗުން ނާއި ފުޓްބޯޅައިގެ ހަރަކާތްތެރިވާ ގިނަ ބަޔެއްގެ ތައުރީފް ރާއްޖެޓީވީގެ ޔޫރޯ ކަވަރޭޖަށް ލިބިގެންދިޔައިރު ކުޅިވަރުގެ ދާއިރާގެ ގިނަ ބަޔަކު ވެސް ވަނީ މި ކަވަރޭޖަށް ތައުރީފްކޮށްފައެވެ.