ކޮވިޝީލްޑް އެޕޮއިންޓްމެންޓްތައް ޚާއްސަ ޕޯޓަލެއް މެދުވެރިކޮށް
6 ޖުލައި 2021 | އަންގާރަ 06:17އެޕޮއިންޓްމަންޓް ހަދާފައިވާ ވަގުތަށް ވެކްސިންޖަހަން ނުދެވިއްޖެނަމަ ބުކިންގ ކެންސަލްވާނެ
ކުޅުދުއްފުށީ ވެކްސިން ޕްރޮގްރާމްގެ ތެރެއިން
ކޮވިޝީލްޑް ވެކްސިން ޖެހުމަށް އެޕޮއިންޓްމެންޓް ހެއްދުމަށް ޚާއްސަ ޕޯޓަލެއް ތައާރަފްކޮށްފިއެވެ.
ހެލްތް ޕްރޮޓެކްޝަން އެޖެންސީ، އެޗްޕީއޭއިން ބުނީ ކޮވިޝީލްޑުގެ ދެވަނަ ޑޯޒު ޖެހޭނީ ހަމައެކަނި book.hpa.gov.mv މެދުވެރިކޮށް އެޕޮއިންޓުމަންޓު ހެދުމުން ކަމަށެވެ. މިއާއެކު ވެކްސިން ސެންޓަރުތަކުން ކޮވިޝީލްޑްގެ ދެވަނަ ޑޯޒް ޖަހަން އެޕޮއިންޓުމަންޓް ދުލެއް ނުކުރާނެ ކަމަށެވެ. މި ބަދަލަކީ ވެކްސިން ޖެހުމުގެ އިންތިޒާމު ފަސޭހަކޮށްދިނުމުގެ ގޮތުން އޮންލައިންކޮށް އެޕޮއިންޓްމަންޓް ހެދޭނެ ގޮތް ފަހިކޮށްދިނުމަށް ގެނައި ބަދަލެއް ކަމަށް އެޗްޕީއޭއިން ބުނެއެވެ.
ފެބުރުއަރީ 1 އިން މާޗް 15 އާ ދެމެދު ކޮވިޝީލްޑުގެ ފުރަތަމަ ޑޯޒު ޖެހި މީހުންނަށް ކިއުބީ މެދުވެރިކޮށް ޓޯކަން ދޫކުރާގޮތަށް ވެސް ހަމަޖެއްސިއެވެ.
އެޗްޕީއޭއިން ބުނީ ފެބްރުއަރީ ނުވަތަ މާރިޗު މަހުގައި ކޮވިޝީލްޑްގެ ފުރަތަމަ ޑޯޒް ޖަހާފައިވާ ފަރާތްތަކުން ދެވަނަ ޑޯޒް ފުރިހަމަކުރުމަށްޓަކައި ޕޯޓަލް މެދުވެރިކޮށް އެޕޮއިންޓްމަންޓް ހެދޭނެ ކަމަށެވެ. އެޕޮއިންޓްމަންޓް ހަދާފައިވާ ވަގުތަށް ވެކްސިން ޖަހަން ނުދެވިއްޖެނަމަ ބުކިންގ ކެންސަލްވާނެ ކަމަށާއި، ދެން ޖެހޭނީ އެހެން ދުވަހަކަށް އަލުން އެޕޮއިންޓްމަންޓް ހައްދަން ކަމަށް ވެސް އެޗްޕީއޭއިން ބުނެއެވެ.
ރާއްޖޭގައި ފެބްރުއަރީ މަހުގެ 1 ވަނަ ދުވަހު ވެކްސިން ޕްރޮގްރާމް ފެށީ، އިންޑިއާއިން ހަދިޔާކުރި ކޮވިޝީލްޑްގެ 200،000 ޑޯޒާއެކުގައެވެ.
