ޑެލްޓާ ވޭރިއަންޓާއެކު ސްޕެއިނުގައި ކޮވިޑް ކޭސްތަކުގެ އަދަދު މައްޗަށް

ޑެލްޓާ ވޭރިއަންޓާއެކު ސްޕެއިންގައި ދުވާލެއްގެ މައްޗަށް ފެންނަމުންދާ ކޮވިޑް ކޭސްތަކުގެ އަދަދު މައްޗަށް ދާން ފަށައިފިއެވެ.

ސްޕެއިންގައި ހުކުރު ދުވަހު ކޮވިޑް ޖެހިފައިވަނީ 12،563 މީހުންނަށެވެ. އަދި 28 މީހަކު ވަނީ މަރުވެފައެވެ. އެގައުމުގައި ބުރާސްފަތި ދުވަހު ކޮވިޑް ޖެހިފައިވަނީ 12،345 މީހުންނަށެވެ. އަދި މިބަލީގައި 8 މީހުން ވަނީ ބުރާސްފަތި ދުވަހު މަރުވެފައެވެ.

ސްޕެއިންގެ ހެލްތު މިނިސްޓްރީގެ ޑާޓާތަކަށް ބަލާއިރު މިހަފުތާގައި އެގައުމުގައި ކޮވިޑްގެ ކޭސްތައް ވަނީ މައްޗަށް ދާން ފަށާފައެވެ. މިއީ އޭޕްރީލް މަހުގެ މެދެއްހާ ހިސާބުން ފެށިގެން އެގައުމުގައި ކޮވިޑްގެ ކޭސްތައް މައްޗަށް ދާން ފެށި ފުރަތަމަ ފަހަރެވެ.

ފާއިތުވި 14 ދުވަހު އެގައުމުގައި ކޮވިޑް ޖެހުނު މީހުންގެ އަދަދުތަކަށް ބަލާއިރު ކޭސްތައް ފެންނަ މިންވަރު ކޮންމެ ލައްކައަކުން ވަނީ 134ން 153ށް މައްޗަށް ގޮސްފައެވެ.

ވެކްސިން ދިނުމުގެ ޕްރޮގްރާމް ކުރިޔަށް ގެންދިޔުމާއި ކޭސްތަކުގެ އަދަދު ދަށަށްދާން ފެށުމުން ސްޕެއިންގައި ވަނީ ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް ލުއި ދޭން ފަށާފައެވެ. އެގޮތުން ބޭރުތެރޭގައި އުޅޭއިރު މާސްކު އެޅުން މަޖުބޫރުކޮށްފައި އޮތް އޮތުން ވަނީ ނިމުމަކަށް ގެނެސްފައެވެ.

ސްޕެއިންގައި މިހާތަނަށް އައިއިރު ކޮވިޑް ޖެހުނު މީހުންގެ އަދަދު 3.8 މިލިއަނަށް އަރާއިރު މަރުވި މީހުންގެ އަދަދު 80،911ށް އަރައެވެ.