ޔޫރޯ 2020 ގެ ކުއާޓާ ފައިނަލުގައި ޕެނަލްޓީ ޖަހައިގެން ސްވިޓްޒަލެންޑް ބަލިކޮށް ސެމީ ފައިނަލަށް ސްޕެއިން ދަތުރުކޮށްފިއެވެ.
ހުކުރު ދުވަހުގެރޭ ސެއިންޓް ފީޓަސްބާގުގެ ކްރެސްޓޮވްސްކީ ސްޓޭޑިއަމުގައި ކުޅުނު މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ.
މި މެޗު ފަށައިގެން ސްޕެއިނުން ގިނަ ހަމަލާތަކެއް އުފެއްދިއިރު، މެޗުގެ އަށްވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މިއީ ސްވިޓްޒަލެންޑްގެ ޑެނިސް ޒަކަރިއާ އަތުން ބައިކޮޅަށް ވަން ލަނޑެކެވެ. މި ލަނޑަށްފަހު ވެސް ސްޕެއިނުން ސްވިޓްޒަލެންޑުގެ ގޯލަށް ނުރައްކާކުރިއިރު، އެ ޓީމުގެ ފޯވާޑް އަލްވާރޯ މޮރާޓާއަށް ވަނީ ލަނޑު ޖެހުމަށް ރަނގަޅު ފުރުސަތެއް ލިބި ބޭކާރުވެފައެވެ.
މި މެޗުގެ ދެވަނަ ހާފުގައި ސްވިޓްޒަލެންޑުން ކުޅުން ރަނގަޅުކުރިއިރު، މެޗުގެ 68 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ މިޑްފިލްޑަރު ޒެރްޑަން ޝަގީރީއެވެ. އެކަމަކު އޭގެ 10 މިނެޓު ފަހުން ސްވިޒަލެންޑްގެ ކުޅުންތެރިއަކަށް ވަނީ ރަތް ކާޑެއް ދައްކާފައެވެ. އެގޮތުން އެ ޓީމުގެ ފްރެއުލާއަށް ސީދާ ރަތް ކާޑެއް ދެއްކީ ސްޕެއިންގެ ޖެރާޑް މޮރޭނޯއަށް ކުރި ނުރައްކާތެރި ފައުލަކާ ގުޅިގެންނެވެ.
މި މެޗުގެ 90 މިނެޓު ހަމަވިއިރު ދެ ޓީމު އެއްވަރުވެފައި އޮތުމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، މި ދެ ހާފުގައިވެސް ލަނޑެއް ފެނިފައެއް ނުވެއެވެ. އެހެންކަމުން ނަތީޖާ ނެރުމަށް ޕެނހަލްޓީ ޖެހިއިރު، ޕެނަލްޓީގައި ސްޕެއިން ކުރިހޯދީ 3-1 ގެ ނަތީޖާއަކުންނެވެ.
ޕެނަލްޓީ ޝޫޓްއައުޓުގައި ސްޕެއިނުން ސާޖިއޯ ބުސްކެޓްސް ފޮނުވާލި ޕެނަލްޓީ އަމާޒުވީ ގޯލުގެ ދަނޑިއަށެވެ. އެކަމަކު އޭގެ ފަހުން ސްވިޓްޒަލެންޑުގެ އަކަންޖީ އާއި ފަބިއަން ޝެއާ އަދި ވާގަސް ފޮނުވާލި ޕެނަލްޓީތައް ސްޕެއިންގެ ގޯލްކީޕަރު ވަނީ މަތަކޮށްފައެވެ. ސްޕެއިން އިން ދެން ނާކާމިޔާބުވީ ރޮޑްރީ ފޮނުވާލި ޕެނަލްޓީއެވެ.
މި މޮޅާއެކު ސްޕެއިން ސެމީއަށް ދަތުރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ކުއާޓާގައި ބެލްޖިއަމާއި އިޓަލީ ބައްދަލުކުރާ މެޗުން މޮޅުވާ ޓީމަކާއެވެ.
