"އަހަރެންގެ ރިޔާސަތުގައި އީރާނަށް ނިއުކުލިއަރ ހަތިޔާރާ ހަމައަށް ދަތުރު ވިޔަކަ ނުދޭނަން"

އީރާނަށް ނިއުކްލިއަރ ހަތިޔާރާ ހަމައަށް ވާސިލްވިޔަ ނުދޭނެ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

އިސްރާއީލްގެ ރައީސް ރިއުވެން ރިވްލިން އެމެރިކާއަށް ކުރައްވާ ދަތުރުފުޅުގެ ތެރެއިން ކުރިއަށްގެންދިޔަ ބައްދަލުވުމުގައި ވާހަކަދައްކަވަމުން ބައިޑަން ވިދާޅުވީ، އިރާނަށް ނިއުލިއަރ ހަތިޔާރާ ހަމައަށް ދަތުރުކުރުމުގެ ފުރުސަތު ނުދެއްވާނެކަމުގެ ޔަގީންކަން އަރުވާ ކަމަށެވެ.

ވައިޓް ހައުސްގެ ތަރުޖަމާން ޖެން ސާކި ވިދާޅުވެފައިވަނީ، ބައިޑްންއާއި ރިވްލިންގެ ބައްދަލު ކުރެއްވުމުގައި ސަލާމަތީ ދާއިރާއިން ދެގައުމުގެ ގުޅުން ބަދަހި ކުުރުމުގެ މަޝްވަރާތައް ކުރެވުނު ކަމަށެވެ. އަދި އައު ބޮޑުވަޒީރު ނަފްތާލީ ބެނެޓް އެމެރިކާއަށް ވަޑައިގަންނަވާނޭ ދުވަހެއް އަދި ޔަގީން ކުރެވިފައި ނުވި ނަމަވެސް، ބައިޑްން އުއްމީދު ކުރައްވަނީ ވަރަށް އަވަހަށް ބެނެޓް އެމެރިކާއަށް ވަޑައިގަންނަވާނެ ކަމަށެވެ.

އެމެރިކާގެ ރިޔާސީ ރޭހުން ޑޮނަލްޑް ޓްރަމްޕް ބަލިވުމުން، އެމެރިކާއާއި އިސްރާއީލާ ދެމެދު އޮތް ގުޅުމުގައި ކޮންމެވެސް ވަރަކަށް ކުނި ޖެހުނު ނަމަވެސް އައު ބޮޑުވަޒީރު ބެނެޓް ބޮޑުވަޒީރުކަމާ ހަވާލުވެވަޑައިގަތުމާއެކު ގުޅުން ރަނގަޅުވާން ވަނީ ފަށާފައެވެ.

ނަފްތާލީ ބެނެޓް ވަރަށް އަވަހަށް އެމެރިކާއަށް ވަޑައިގަތުމަށް ވަނީ ހަމަޖެހިފައެވެ.