އެމެރިކާއާއި ރަޝިޔާއިން 1987 ވަނަ އަހަރު ސޮއިކުރި ނިއުކްލިއަރ ހަތިޔާރާއި ބެހޭ މުއާހަދާގައިވާ ކަންކަމަށް އަމަލުކުރުން ވަގުތީ ގޮތުން ހުއްޓާލަން އެމެރިކާއިން ނިންމައިފިއެވެ.

ރަޝިޔާއިން އެއްބަސްވުމާއި ޚިލާފުވެފައިވާ ކަމަށް ތުހުމަތު ކުރައްވަމުން އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ވަނީ، ކުރިޔަށް އޮތް ހަ މަސް ދުވަހުގެ ތެރޭގައި އެއްބަސްވުމުގައިވާ ގޮތަށް ރަޝިޔާއިން ކަންކަން އިސްލާހު ނުކޮށްފިނަމަ މުއާހަދާއިން ވަކިވާނެ ކަމަގެ އިންޒާރު ދެއްވާފައެވެ.

މި ކަމާއި ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ނެރުއްވި ބަޔާނެއްގައި ވިދާޅުވީ، ރަޝިޔާއިން އެތައް ދުވަހެއް ވަންދެން މުއާހަދާއާއި ހިލާފުވެފައިވާ ކަމަށެވެ. އަދި ރަޝިޔާއިން ސިއްރިއްޔާތުގައި އެމެރިކާއާއި އެމެރިކާގެ ބައިވެރިންނަށް ނުރައްކާ ވާނެ ކަހަލަ މަނާ ކުރެވިފައިވާ މިސައިލް ސިސްޓަމެއް ތައްޔާރު ކުރުމުގެ މަސައްކަތް ކުރަމުންދާ ކަމަށް ވެސް ޓްރަމްޕް ތުހުމަތުކުރެއްވިއެވެ.

އެމެރިކާގެ ސަރުކާރުން ވަނީ މުއާހަދާގެ ބައިވެރިއެއްގެ ގޮތުގައި ނުހިމެނޭ ޗައިނާއިން ވެސް މިފަދަ ނިއުކްލިއަރ ހަތިޔާރުތައް އުފައްދާ ކަމަށް ތުހުމަތުކޮށްފައެވެ. އަދި މި މައްސަލަތައް ހައްލުކުރުމަށް އެމެރިކާ އާއި ރަޝިޔާއިން ޗައިނާގެ ބެއިޖިންގގައި މި ހަފުތާގެ ތެރޭގައި ކުރިޔަށް ގެންދިޔަ މަޝްވަރާ ބައްދަލުވުންތަކުގައި، މައްސަލައިގައި އެއްބަސްވުމަކަށް އާދެވިފައި ނުވާކަމަށް ދެ ގައުމުގެ މަންދޫބުންވެސް ވަނީ ވިދާޅުވެފައެވެ.

ރަޝިޔާއިން ވަނީ މުއާހަދާއާއި ހިލާފުވެފައި ނުވާނެކަމަށް ތަކުރާރުކޮށް ބުނެފައެވެ. އަދި މައްސަލައަށް ހައްލެއް ނުހޯދިގެން އުޅެނީ އެމެރިކާއިން މަޝްވަަރާތަކުގައި ހުށައަޅާފައިވާ ކަންކަމުގައި ދޫނުދީގެން އުޅޭތީ ކަމަށް ރަޝިޔާގެ ޑެޕިއުޓީ ފޮރިން މިނިސްޓަރު ސާރގޭ ރަބްކޯވް ވަނީ ވިދާޅުވެފައެވެ. 

ފިނި ހަނގުރާމައިގެ ދުވަސްވަރު އޭރުގެ އެމެރިކާގެ ރައީސް ރޮނަލްޑް ރޭގަން އާއި ސޯވިއެޓް ލީޑަރު މީކާއިލް ގޮރްބަޗޭވް 1987 ވަނަ ސޮއިކުރި އެއްބަސްވުމުގައި ވަނީ 500 ކިލޯމީޓަރާއި 5500 ކިލޯމީޓަރާއި ދެމެދުގެ ރާސްތާއަކަށް ދަތުރުކުރެވޭ، ބިމުން އުދުއްސާލެވޭ މިސައިލް ތަރައްގީކުރުން މަނާކޮށްފައެވެ.