މިއަހަރުގެ ނޯބެލް ޞުލްހައިގެ އިނާމް ނިއުކްލިއަރ ހަތިޔާރާ ދެކޮޅު ބައިނަލްއަޤްވާމީ ކެމްޕެއިން އަށް

މިއަހަރުގެ ނޯބެލް ސުލްޙައިގެ އިނާމް އިންޓަނޭޝަނަލް ކެމްޕެއިން ޓު އެބޮލިޝް ނިއުކްލިއަރ ވެޕަންސް (އިކާން) އަށް ލިބިއްޖެ އެވެ.

މިއަހަރުގެ ނޯބެލް ޞުލްޙައިގެ އިނާމް އިކާން އަށް ލިބުނުކަން އިޢުލާން ކުރަމުން ނޯވޭގެ ނޯބެލް ކޮމިޓީގެ ޗެއަރމަން ބެރިޓް ރެއިސް އެންޑަސަން ވިދާޅުވީ، އެ ކެމްޕެއިން އަށް މިއަހަރުގެ ނޯބެލް ޞުލްޙައިގެ އިނާމް ދިނުމަށް ނިންމީ، ނިއުކްލިއަރ ހަތިޔާރާ ދެކޮޅަށް ކުރާ މަސައްކަތުގެ އަގު ވަޒަން ކުރުމުގެ ގޮތުން ކަމަށެވެ.

އެގޮތުން ނިއުކްލިއަރ ހަތިޔާރު ބޭނުން ޚުރުމުން ކުރިމަތިވެދާނެ އިންސާނީ ކާރިސާއެއްގެ ސަބަބުން ދިމާވާނެ މައްސަލަތަކަށް ސަމާލުކަން ހޯދުމަށާއި، ނިއުކްލިއަރ ހަތިޔާރު މަނާކުރާ ބައިނަލްއަޤްވާމީ އެއްބަސްވުމެއް އެކުލަވާލުމަށްޓަކައި ކޮށްފައިވާ މަސައްކަތް ނޯބެލް ކޮމިޓީން ވަނީ ފާހަގަކޮށްފައެވެ.

އިކާން އިން ވަނީ ފާއިތުވި 10 އަހަރުގެ ތެރޭގައި ނިއުކްލިއަރ ހަތިޔާރުގެ ނުރައްކާތެރިކަމާ ގުޅޭ ގޮތުން ހޭލުންތެރިކުރުމާއި، ދުނިޔެއިން ނިއުކްލިއަރ ހަތިޔާރު މަނާ ކުރުމަށް ގިނަ މަސައްކަތްތަކެއް ކޮށްފައެވެ.

ނިއުކްލިއަރ ހަތިޔާރު މަނާ ކުރާ ބައިނަލްއަޤްވާމީ އެއްބަސްވުމެއް އެކުލަވާލުމަށް 2007 ވަނަ އަހަރު ފެށި މަސައްކަތަށް ތާޢީދުކޮށް، ދުނިޔޭގެ 101 ޤައުމަކުން 468 ޖަމިއްޔާއެއް ވަނީ އިކާންގެ އެ މަސައްކަތާ ގުޅިފައެވެ.

އިކާން އަށް މިއަހަރުގެ ނޯބެލް ޞުލްޙައިގެ އިނާމް ލިބުނުކަން ނޯބެލް ކޮމިޓީން އިޢުލާން ކޮށްފައިވާއިރު، ކުރިން ބެލެވިފައި އޮތީ މިއަހަރުގެ ނޯބެލް ޞުލްޙައިގެ އިނާމް ޙާއްސަ ކުރާނީ އީރާންގެ ނިއުކްލިއަރ އެއްބަސްވުމުގެ ބައިވެރިންނަށް ކަމަށެވެ. އެގޮތުން އީރާންގެ ނިއުކްލިއަރ އެއްބަސްވުން އެކުލަވާލުމުގައި އެންމެ އިސް ދައުރެއް އަދާކުރެއްވި އީރާންގެ ޚާރިޖީވަޒީރު މުޙައްމަދު ޖަވާދު ޒާރިފް އާއި، ވިލާތުގެ އިއްތިޙާދު (އީޔޫ)ގެ ޚާރިޖީ ސިޔާސަތުތަކާއި ބެހޭ އިސްވެރިޔާ ފެޑެރިކާ މޮގެރިނީ އަށް ނޯބެލް ޞުލްޙައިގެ އިނާމް ލިބޭނެ ކަމަށް ގިނަ ބަޔަކު އުއްމީދު ކުރިއެވެ.