ކޮންމެ އިރަކުވެސް ނިއުކުލިއަރ ހަނގުރާމައެއް ފެށިދާނެކަމަށް އުތުރު ކޮރެއާއިން ބުނެފި
އުތުރު ކޮރެއާއިން އެކަން ހާމަކުރީ ޔޫއެންގެ ޖެނެރަލް އެސެމެބްލީގައި
އުތުރު ކޮރެއާ ސިފައިން
ނިއުކްލިއާ ހަނގުރާމައެއް ކޮންމެ ފަދަ ވަގުތަކުވެސް ފެށިދާނެ ކަމަށް އުތުރު ކޮރެއާއިން ބުނެފިއެވެ.
ޔޫއެންއަށް އުތުރު ކޮރެއާއިން ކަނޑައަޅާފައި ހުންނަ އެމްބެސެޑަރު ކިމް އިން ރްޔޯންގް އެކަން ހާމަކުރެއްވީ ޔޫއެންގެ ޖެނެރަލް އެސެމެބްލީގައެވެ.
އޭނާ ވިދާޅުވި ގޮތުގައި އުތުރު ކޮރެއާއަކީ "ހައްދު ފަހަނަ އަޅާފައިވާ ނިއުކްލިއާ ބިރެއް" ގެ ގޮތުގައި އެމެރިކާއިން ކަނޑައަޅާފައިވާ ކަމަށެވެ. އަދި 1970 ވަނަ އަހަރުން ފެށިގެން "ނިއުކްލިއާ ބިރެއް" ގެ ގޮތުގައި އެމެރިކާއިން ދެކޭ ހަމައެކަނި ގައުމަކީވެސް އުތުރު ކޮރެއާ ކަމަށް އޭނާ ވިދާޅުވިއެވެ.
ރްޔޯންގް ވިދާޅުވި ގޮތުގައި ގައުމުގެ ދިފާއުއަށްޓަކައި ނިއުކްލިއާ ހަތިޔާރު އުފެއްދުމުގެ ހައްގު އުތުރު ކޮރެއާއަށްވެސް ލިބިގެންވެއެވެ.
ފަހަކަށް އައިސް އުތުރު ކޮރެއާއިން ނިއުކްލިއާ ޓެސްޓް ކުރާ މިންވަރު ވަނީ އިތުރުވެފައެވެ. އެގައުމުން މިސައިލް ޓެސްޓު ކުރުން އިތުރުކޮށްފައިވާއިރު އެމެރިކާގެ ގުއާމަށް ހަމަލާދޭނެ ކަމުގެ އިންޒާރު ދަނީ ދެމުންނެވެ.
