ޝަރީއަތުގައި ބައިވެރިވެވަޑައިގަތުމަށް ޢަލީ ވަޙީދު ހައިކޮމިޝަނަށް ވަޑައިގަތްކަން ޔަގީންވެއްޖެ
އޭނާ ޝަރީއަތުގައި ބައިވެރިވެ ވަޑައިގަތީ ހައިކޮމިޝަނުގައި ހުންނަވައިގެންކަން ބަޔާންކޮށް ފޮރިން މިނިސްޓްރީން ސިޓީއެއް ފޮނުވާފައިވޭ
ޢަލީ ވަޙީދު
ޖިންސީ ފުރައްސާރައިގެ މައްސަލާގައި ކުރީގެ ޓޫރިޒަމް މިނިސްޓަރ އަލީ ވަހީދުގެ މައްޗަށް އުފުލާފައިވާ ދައުވާގެ ޝަރީއަތުގައި ބައިވެރިވެވަޑައިގަތުމަށް، އިނގިރޭސި ވިލާތުގައި ހުންނަ ރާއްޖޭގެ ހައި ކޮމިޝަނަށް އޭނާ ވަޑައިގެންނެވިކަން ޔަގީންވެފައިވާ ކަމަށް ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.
ޕްރޮސެކިއުޓަރ ޖެނެރަލް "ރާއްޖެ އެމްވީ"އަށް ވިދާޅުވީ ޝަރީއަތުގެ އަޑުއެހުމުގައި ޢަލީ ވަޙީދު ބައިވެރިވެވަޑައިގަތީ ހައިކޮމިޝަނުންކަން ޔަގީންކުރެއްވީ ފޮރިން މިނިސްޓްރީ މެދުވެރިކޮށް ކަމަށެވެ. އަދި ޝަރީއަތުގައި ބައިވެވަޑައިގަތީ ހައިކޮމިޝަނުގައި ހުންނަވައިގެންކަން ބަޔާންކޮށް ފޮރިން މިނިސްޓްރީން ސިޓީއެއް ފޮނުވާފައިވާ ކަމަށް ވިދާޅުވިއެވެ.
ޓޫރިޒަމް މިނިސްޓަރުގެ މަގާމުގައި ހުންނެވިއިރު އެ ވުޒާރާގެ މުވައްޒަފުންތަކަކަށް ޖިންސީ ފުރައްސާރަކުރި މައްސަލައެއްގައި އޭނާގެ މައްޗަށް ދައުވާ އުފުލާފައިވާއިރު، އެ މައްސަލަ ފެންމަތިވުމާއެކު އޭނާގެ ޕާސްޕޯޓު ހިފެހެއްޓިއެވެ. ނަމަވެސް ބޭސްފަރުވާއަށް ރާއްޖެއިން ބޭރަށް ދިއުމަށް އެދިވަޑައިގެން ހުށަހެޅުއްވުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އެހެން ނަމަވެސް ހަތަރު މަސް ވީއިރު ވެސް އޭނާ އެނބުރި ރާއްޖެ ވަޑައިގެންފައެއް ނުވެއެވެ.
އޭނާ ރާއްޖެ ވަޑައިނުގަތީ ބޭސްފަރުވާ ނުނިމޭ ކަމަށް ވިދާޅުވެފައިވެއެވެ. އަދި އެކަމުގެ ލިޔެކިޔުންތައް ކޯޓަށް ހުށަހެޅުއްވުމުން ކޯޓުން ވަނީ އެ މައްސަލާގެ ޝަރީއަތް އޮންލައިންކޮށް ކުރިއަށްގެންދަން ނިންމާފައެވެ. ނަމަވެސް އޭނާ ހުރީ ރާއްޖޭގެ އިޚްތިޞާޞް ނުހިނގާ ތަނެއްގައި ކަމަށްވާތީ އެގޮތަށް ޝަރީއަތް ކުރިއަށް ގެންދިއުމަށް ޕީޖީ އޮފީހުން ވަނީ އިންކާރުކޮށްފައެވެ. އަދި ސިއްހީ ހާލަތާ ގުޅިގެން އޭނާ ހުށަހެޅުއްވި ލިޔެކިޔުންތައް ހޯދުމަށްވެސް އެދިފައިވެއެވެ.
ޕީޖީ ވިދާޅުވީ ކޯޓުން މިހާރު އެ ލިޔެކިޔުންތައް ވެސް ދީފައިވާ ކަމަށާއި، އެއަށް ރިއާޔަތްކޮށް ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދަން ނިންމި ނިންމުން ހައިކޯޓުގައި އިސްތިއުނާފް ކޮށްފައިވާ ކަމަށެވެ. ނަމަވެސް ހައިކޯޓުން އަދި އެ މައްސަލަ ބަލައިގެންފައެއް ނުވެއެވެ. މީގެ އިތުރަށް ޕީޖީ އޮފީހުން އެދިގެން ފުލުހުން މިހާރު ވަނީ ޢަލީ ވަޙީދުގެ ޕާސްޕޯޓު ހިފެހެއްޓުމުގެ އަމުރަކަށް ވެސް އެދިފައެވެ.
ޖިންސީ ފުރައްސާރާގެ ތުހުމަތުގެ މައްސަލާގައި އޭނާގެ މައްޗަށް އުފުލާފައި ވަނީ ޖިންސީ ގޯނާއާ ގުޅޭ ހަތް ދައުވާ އެވެ.
