ރިޔާސީ އިންތިޚާބުގައި ވާދަކުރާ ފަސް ކެންޑިޑޭޓުން ނިކަރާގުއާގެ ފުލުހުން ހައްޔަރުކޮށްފި
22 ޖޫން 2021 | އަންގާރަ 02:10މިހާތަނަށް އިދިކޮޅު 15 ލީޑަރުން ވަނީ ހައްޔަރުކޮށްފައި
އެންމެ ފަހުން ނިކަރާގުއާގެ ފުލުހުން ހައްޔަރުކުރި ޑިމޮކްރަޓިކް ރިސްޓޮރޭޝަން ޕާޓީގެ ރިޔާސީ ކެންޑިޑޭޓް މިގުއެލް މޯރާ ބާރބެރެނާ
މި އަހަރުގެ ނޮވެމްބަރު މަހު ނިކަރާގުއާގައި ކުރިއަށް ގެންދިއުމަށް ހަމަޖެހިފައިވާ ރިޔާސީ އިންތިޚާބާ ދިމާކޮށް، އިންތިޚާބުގައި ވާދަކުރާ ފަސް ކެންޑިޑޭޓުން އެގައުމުގެ ފުލުހުންގެ ބެލުމުގެ ދަށަށް ގެންގޮސްފިއެވެ.
ނިކަރާގުއާގެ ފުލުހުން އެންމެ ފަހުން ހައްޔަރުކޮށްފައި ވަނީ އެގައުމުގެ ޑިމޮކްރަޓިކް ރިސްޓޮރޭޝަން ޕާޓީ (ޑީއާރްޕީ)ގެ ރިޔާސީ ކެންޑިޑޭޓް މިގުއެލް މޯރާ ބާރބެރެނާއެވެ. އޭނާ ހައްޔަރުކޮށްފައި ވަނީ އާދިއްތަ ދުވަހުއެވެ. އަދި މިގުއެލް ހައްޔަރުކޮށްފައި ވަނީ އެ ގައުމުގެ ސިޔާދަތަށް ނުރައްކާކުރާކަމަށް ބުނެއެވެ. މިގުއެލް އަކީ ނޫސްވެރިއެކެވެ.
ޖޫން 20 ވަނަ ދުވަހު މިގުއެލް ހައްޔަރުކޮށްފައިވާ އިރު، ރިޔާސީ އިންތިޚާބުގައި ދެން ވާދަކުރައްވާ ނޫސްވެރިއެއް ކަމަށްވާ ކްރިސްޓިއާނާ ކެމޮރޯ، ޖޫން ދެ ވަނަ ދުވަހުން ފެށިގެން ހުރީ ގޭ ބަންދުގައެވެ. އަދި ޖޫން ފަސް ވަނަ ދުވަހު ކުރީގެ ޑިޕްލޮމެޓް އަރޓުރޯ ކްރުޒް ހައްޔަރުކޮށްފައިވާއިރު، ޕޮލިޓިކަލް ސައިންޓިސްޓް ފީލިކްސް މަރަޑިއަގާ އަދި އިކޮނޮމިސްޓް ސެބޭޝްޓަން ކެމޮރީ ވަނީ ޖޫން 8 ވަނަ ދުވަހު ހައްޔަރުކޮށްފައެވެ.
ފާއިތުވި ހަފްތާގެ ތެރޭގައި ނިކަރާގުއާގެ ފުލުހުން ހައްޔަރުކުރި އިދިކޮޅު ލީޑަރުންގެ އަދަދު 15ށް އަރާފައިވާއިރު، މާހިރުން ދަނީ މިއީ ނިކަރާގުއާގެ މިހާރުގެ ރައީސް ޑެނިއަލް އޯރޓެގާއަށް އޮތް ތާއީދު ކަށަވަރުކޮށް މި އަހަރުގެ ރިޔާސީ އިންތިޚާބު ކާމިޔާބުކުރުމަށް ކުރާ މަސައްކަތެއްކަމަށް ބުނަމުންނެވެ.
