އަސްރާގެ ނަމުގައި ޕީޖީ އޮފީހަށް ސިޓީ ދިޔައީ އީސަގެ ވަކީލުންގެ ފަރާތުން: ޕީޖީ
19 ޖޫން 2021 | ހޮނިހިރު 14:57ސިޓީއެއް ލިބުމުން އެއީ ކޮންމެ ގޮތަކަށް ކޮންމެ ވާހަކައެއް އޮތް ސިޓީއަކަށް ވިޔަސް އެއަށް ޖަވާބު ފޮނުއްވާނެ: ޕީޖީ
އަސްރާ ނަސީމް
ގެވެށި އަނިޔާގެ މައްސަލާގައި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަޙުމަދު ޢީސާގެ އަނބިކަނބަލުން އަސްރާ ނަސީމްގެ ނަމުގައި ޕްރޮސެކިއުޓާ ޖެނެރަލްގެ އޮފީހަށް ސިޓީއެއް ފޮނުވާފައި ވަނީ އީސަގެ ވަކީލުންގެ ފަރާތުން ކަމަށް ޕީޖީ ހުސައިން ޝަމީމް ވިދާޅުވެއްޖެއެވެ.
އަސްރާ ޖަޒުބާތުގައި ޖެހި ހުށަހެޅި މައްސަލައެއް ކަމަށް ބުނެ އެ މައްސަލަ ނުބަލައި ދޫކޮށްލުމަށް އެދި ޕީޖީއަށް ސިޓީއެއް ފޮނުވާފައިވާ ކަމަށް ބުނެ ބައެއް މީޑިއާތަކުން ދަނީ ރިޕޯޓުކުރަމުންނެވެ. ގެވެށި އަނިޔާގެ މައްސަލަ ހުށަހެޅީ ޢީސައާ ހިލޭ އަންހެނަކާ ގާތް ގުޅުމެއް އޮވެ އެކަމުގެ ތެރެއިން ދިޔަ ހަމަނުޖެހުމެއްގައި ކަމަށާއި، އަސްރާ ޖަޒުބާތުގައި ޖެހި ފުލުހުންނަށް ބަޔާން ދިނީ ކަމަށް ވެސް ސިޓީއާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
އެކަމާ ގުޅިގެން "ރާއްޖެއެމްވީ"އަށް މައުލޫމާތު ދެމުން އަސްރާ ވިދާޅުވީ މައްސަލަ ނުބަލަން އެދި ދެފަހަރަކު ފުލުހަށް ދިޔަ ކަމަށެވެ. އެކަމަކު ޕީޖީއަށް އެފަދަ އެއްވެސް ސިޓީއެއް އަސްރާގެ ނަމުގައި ގޮސްފައިވާ ކަމުގެ އެއްވެސް މައުލޫމާތެއް ނެތް ކަމަށެވެ. އަދި އެކަމާ ގުޅިގެން ޕީޖީ އޮފީހުން ވެސް ގުޅާ ސުވާލުކޮށްފައިނުވާ ކަމަށާއި، ކޮށްފި ނަމަ އެކަމުގައި ޕީޖީއަށް ފުރިހަމައަށް ޖަވާބުދާރީވެވަޑައިގަންނަވާނެ ކަމަށެވެ.
އެކަމާ ގުޅިގެން ޕްރޮސެކިއުޓާ ޖެނެރަލް ޙުސައިން ޝަމީމް ވަނީ އަސްރާގެ ސިޓީއެއް ލިބިފައިވާ ކަން "ރާއްޖެއެމްވީ"އަށް ކަށަވަރުކޮށްދެއްވާފައެވެ. އެކަމަކު އެ ސިޓީގައިވާ އެއްވެސް ތަފްސީލެއް ޝަމީމް ހިއްސާއެއް ނުކުރައްވައެވެ. އޭނާ ވިދާޅުވީ އެކަމުގައި ސުވާލު އުފެދޭ ކަންތައްތަކެއް ވެސް އެބަހުރި ކަމަށެވެ. އެގޮތުން އެ ސިޓީ އެ އޮފީހަށް ލިބިފައި ވަނީ ޢީސަގެ ވަކީލުންގެ ފަރާތުން ކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ ސިޓީއެއް ލިބުމުން އެއީ ކޮންމެ ގޮތަކަށް ކޮންމެ ވާހަކައެއް އޮތް ސިޓީއަކަށް ވިޔަސް އެއަށް ޖަވާބު ފޮނުއްވާނެ ކަމަށެވެ. ނަމަވެސް މައްސަލާގައި ދައުވާ ކުރުމާއި ނުކުރުމަކީ އަސްރާގެ ވެސް އަދި އެހެން ބައެއްގެ އަތްމަތީގައި ވެސް އޮތް ކަމެއް ނޫން ކަމަށާއި، އެކަމުގައި ގޮތް ނިންމާނީ އެ އޮފީހުން ކަމަށެވެ.
ގެވެށި އަނިޔާގެ މައްސަލާގައި މިދިޔަ ބުރާސްފަތި ދުވަހު ވަނީ ޢީސަގެ މައްޗަށް ދައުވާ އުފުލާފައެވެ. އެގޮތުން ޤާނޫނުލްޢުޤޫބާތުގެ 120ވަނަ މާއްދާގެ (ހ)ގެ 1ވަނަ ނަންބަރާ ހަވާލާދީ، އެމާއްދާގެ (ށ)ގެ 2ވަނަ ނަންބަރުގެ ދަށުން، ޢީސަގެ މައްޗަށް އުފުލާފައިވަނީ އަނިޔާއެއް ދިނުމުގެ ކުށުގެ ދައުވާއެވެ.
މި މައްސަލަ ފުލުހުންނަށް ރިޕޯޓުކޮށްފައިވަނީ މިދިޔަ މެއި މަހުގެ 18 ވަނަ ދުވަހުގެ ރެއެވެ. މި މައްސަލާގައި ފުލުހުންނަށް ބަޔާން ދެއްވުމަށްފަހު އަސްރާގެ ފޭސްބުކް ސްޓޭޓަސްގައި ބުނެފައިވަނީ، އެ ކުރެވުނު ތަޖުރިބާއަކީ އެކަމަކަށް ދުވަހަކު ވެސް އުއްމީދުކޮށްގެން ހުރި ތަޖުރިބާއެއް ނޫން ކަމަށެވެ. އަދި ދަރިފުޅާއި އޭނާއަށް ވެސް މިއީ ވަރަށް ވެސް އުނދަގޫ ވަގުތެއް ކަމަށެވެ.
މި މައްސަލަ ކުރިއަށް ނުގެންދިޔުމަށް އަސްރާ ފުލުހުގައި އެދުމުން އެކަމާ ގުޅިގެން ފުލުހުން ބުނީ، އެ މައްސަލައަކީ ޖިނާއީ މައްސަލައަކަށްވާތީ، އަސްރާ އެ މައްސަލަ ކުރިއަށް ނުގެންދިޔުމަށް އެދުނު ނަމަވެސް، ތަހުގީގު ކުރިއަށްދާނެ ކަމަށެވެ. މި މައްސަލަ ކުރިއަށް ނުގެންދިއުމަށް އަސްރާ ފުލުހުންގެ ކިބައިން އެދުނީ ކީއްވެގެންކަން ފުލުހުން ހާމައެއް ނުކުރެއެވެ.
