ޔޫރޯ 2020 ގެ ގްރޫޕް ބީ ގައި ބުރާސްފަތި ދުވަހުގެރޭ ނެދަލެންޑްސް އާއި އޮސްޓްރިއާ ބައްދަލުކުރާނެއެވެ. މި މެޗު ކުޅޭނީ އެމްސްޓެޑަމްގައި ހުންނަ ޔޯހަން ކްރައިފް އެރީނާގައެވެ.

ގްރޫޕް ސްޓޭޖުގެ ފުރަތަމަ މެޗުގައި އޮސްޓްރިއާއިން ވަނީ 3-1 ގެ ނަތީޖާއަކުން ނޯތު މެސެޑޯނިއާ ބަލިކޮށްފައެވެ. އަދި ނެދަލެންޑްސް ވަނީ ޔޫކްރޭން އަތުން 3-2 ގެ ނަތީޖާއަކުން މޮޅުވެފައެވެ. އެހެންކަމުން މި މެޗު ކާމިޔާބުކޮށް ދެވަނަ ބުރަށް ދިޔުމުގެ ފުރުސަތު ދެ ޓީމަށްވެސް އެބައޮތެވެ.

ނެދަލެންޑްސްއާ ދެކޮޅަށް ނުކުންނައިރު އޮސްޓްރިއާއަށް އޮތް އެންމެ ބޮޑު ގޮންޖެހުމަކީ މި މެޗަށް އެ ޓީމު ފޯވާޑް މާކޯ އަނައުޓޮވިޗް ސަސްޕެންޑް ކޮށްފައިވުމެވެ. ޔުއެފާއިން އަނައުޓޮވިޗް ސަސްޕެންޑްކުރަން ނިންމީ ނޯތު މެސެޑޯނިއާ މެޗުގައި ލަނޑު ޖެހުމަށްފަހު ނަސްލީ ތަފާތުކުރުން ދޭހަވާ ނިޝާނެއް އަތުން ދެއްކުމާ ގުޅިގެންނެވެ.

އޮސްޓްރިއާ މެޗުގެ ކުރިން ނެދަލެންޑްސްގެ ކޯޗު ފްރޭންކް ޑި ބޮއާ ބުނީ މި މެޗަކީ ނެދަލެންޑްސްއަށް މޮޅުވާން މުހިންމު މެޗެއް ކަމަށާއި، އެގޮތުން މި މެޗު އެއްވަރުވިޔަސް ނުވަތަ ބަލިވިޔަސް ނެދަލެންޑްސްއަށް އޭގެ ޕްރެޝަރާ ކުރިމަތިލާން ޖެހޭނެ ކަމަށެވެ. އަދި އޮސްޓްރިއާއަކީ އާދައިގެ ޓީމެއްގެ ގޮތުގައި ނެގުން އެއީ ހެދޭނެ ގޯހެއް ކަމަށާއި، އެހެންކަމުން ކުޅުންތެރިންނަށް އެކަން ވަރަށް ރަނގަޅަށް ވިސްނާދީފައިވާނެ ކަމަށްވެސް ވަނީ ބުނެފައެވެ.

މެޗުގެ ކުރިން އޮސްޓްރިއާގެ ކޯޗު ފްރެންކޯ ފޯޑާގެ ބުނީ މި މެޗަށް ނުކުންނައިރު އެ ޓީމުގެ އަނައުޓޮވިޗް ސަސްޕެންޑް ކޮށްފައި ހުރުމުން އެކަން ޓީމުން ވަރަށް ބޮޑަށް ދައްކާނެ ކަމަށާއި، އެގޮތުން އޭނާ އަކީ ޓީމުގައި ހުރި އެންމެ ތަޖުރިބާކާރު ކުޅުންތެރިންގެ ތެރޭގައި ހިމެނޭ ކުޅުންތެރިއެއް ކަމަށެވެ. އަދި އަނައުޓޮވިޗް ނެތްތަން ފޫބައްދަން އިތުރު ޕްލޭނަކަށް ދާން ޖެހިފައިވާ ކަމަށާއި، އަދި އެކަމަށް ތައްޔާރުވަމުން އަންނަ ކަމަށްވެސް ވަނީ ބުނެފައެވެ.

ނެދަލޭންޑްސްއާ ބެހޭ ގޮތުން ފޯޑާ ބުނީ އެ ޓީމަކީ މަޝްހޫރު ގިނަ ކުޅުންތެރިންތަކެއް ތިބި ޓީމެއް ކަމަށާއި، އަދި ކޮންމެ ވަގުތެއްގައިވެސް ނަތީޖާ ބަދަލުކޮށްލުމުގެ ގާބިލުކަން އެ ޓީމުގައި އެބަހުރި ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ސީ ގެ އެނަލިސްޓް އިހުސާން އަބްދުލް ޣަނީ (ސާންތި) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން މުޙައްމަދު ނަޖީލު (ނަޖީ) ބައިވެރިވެވަޑައިގަންނަވާނެއެވެ.

ނެދަލެންޑްސް އާއި އޮސްޓްރިއާ ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.