ޔޫރޯ 2020 ގެ ގްރޫޕް ބީ ގެ ދެވަނަ މެޗުގައި ފިންލެންޑް އަތުން ރަޝިއާ މޮޅުވެއްޖެއެވެ.

ސެއިންޓް ފީޓަސްބާގުގެ ކްރެސްޓޮވްސްކީ ސްޓޭޑިއަމުގައި ބުދަ ދުވަހުގެ ހަވީރު ކުޅުން މެޗުން ރަޝިއާ މޮޅުވީ 1-0 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ހަތަރުވަނަ މިނެޓުގައި ފިންލެންޑުގެ ޔޮއެލް ޕޮހްޔަންޕަލޯ ވަނީ ލަނޑެއް ޖަހާފައެވެ. އެކަމަކު ވީޑިއޯ އެސިސްޓެންޓް ރެފްރީ (ވީއޭއާރް) އިން ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

މެޗުގައި ރަޝިއާއިން ލަނޑު ޖަހާ ލީޑު ނެގީ ފުރަތަމަ ހާފުގެ އިތުރު ވަގުތުގައެވެ. މި ލަނޑު އެ ޓީމަށް ކާމިޔާބުކޮށްދިނީ އަންދްރީ މުސްތާވޮއިއެވެ.

މެޗުގެ ދެވަނަ ހާފުގައި ރަޝިއާއިން އެ ޓީމުގެ އެޓޭކުތައް ވަރުގަދަކުރިއިރު، މި ހާފުގައި ރަޝިއާއަށް ވަނީ ލަނޑު ޖަހަން ގިނަ ފުރުސަތުތަކެއް ލިބި ބޭކާރުވެފައެވެ. އެގޮތުން މެޗުގެ 65 ވަނަ މިނެޓުގައި ރަޝިއާގެ އާޓޭމް ޒޫބާއަށް ވަނީ ހުސް ފުރުސަތެއް ލިބި ބޭކާރުވެފައެވެ. އޭގެ ފަހުން މެޗުގެ 73 ވަނަ މިނެޓުގައިވެސް ޒޫބާއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ.

މި ނަތީޖާއާއެކު ގްރޫޕް ބީ ގައި ހިމެނޭ ބެލްޖިއަމް، ރަޝިއާ އަދި ފިންލެންޑަށްވެސް ވަނީ ތިން ޕޮއިންޓް ލިބިފައެވެ.