ޔޫރޯ 2020 - ފިންލެންޑާއި ރަޝިއާގެ ކުރިމަތިލުން

ޔޫރޯ 2020 ގެ ގްރޫޕް ސްޓޭޖުގެ ފުރަތަމަ މެޗުތައް ކުޅެ ނިމިފައިވާއިރު، ގްރޫޕް ސްޓޭޖުގެ ދެވަނަ މެޗުތައް ފަށާނީ ގްރޫޕް ބީ ގައި ހިމެނޭ ފިންލެންޑާއި ރަޝިއާގެ ކުރިމަތިލުމުންނެވެ.

ގްރޫޕް ސްޓޭޖުގެ ފުރަތަމަ މެޗުން ބެލްޖިއަމް އަތުން ރަޝިއާ 3-0 ގެ ނަތީޖާއަކުން ބަލިވެފައިވާއިރު، ފިންލެންޑުން ވަނީ ޑެންމާކް އަތުން 1-0 ގެ ނަތީޖާއަކުން މޮޅުވެފައެވެ. އެއާއެކު މި ގްރޫޕުގެ އެއްވަނައިގައި އޮތް ބެލްޖިއަމާއި ދެވަނައިގައި އޮތް ފިންލެންޑަށް ތިން ޕޮއިންޓް ލިބިފައިވާއިރު، ޑެންމާކާއި ރަޝިއާއަށް ޕޮއިންޓެއް ލިބިފައެއް ނުވެއެވެ.

މެޗުގެ ކުރިން ވާހަކަ ދައްކަމުން ފިންލެންޑުގެ ކޯޗު މާކިން ކެނޭވާ ބުނީ މި މެޗަށް ނުކުންނައިރު ފިންލެންޑުން ލަނޑު ޖެހުމުގެ މައްސަލަ ހައްލު ކުރަން އިސްކަން ދޭން ޖެހޭ ކަމަށެވެ. އަދި މެޗަށް ނުކުންނައިރު ފިންލެންޑަށް ޕްރެޝަރެއް ނެތް ކަމަށާއި، ބެލްޖިއަމް އަތުން ބަލިވުމުން އެ ޕްރެޝަރު އޮތީ ރަޝިއާއަށް ކަމަށްވެސް ވަނީ ބުނެފައެވެ. އަދި މި މެޗުން ޕޮއިންޓެއް ލިބުނަސް ހިތްހަމަޖެހޭނެ ކަމަށް ކެނޭވާ ވަނީ ބުނެފައެވެ.

މެޗުގެ ކުރިން ރަޝިއާގެ ކޯޗު ސްޓަނިސްލާވް ޗެރްޗެޝީފް ބުނީ ފިންލެންޑުން މި މެޗާ ކުރިމަތިލާއިރު ޑެންމާކް ބަލިކޮށްފައި އޮތުން އެއީ އެ ޓީމަށް ލިބޭނެ ހިތްހަމަޖެހުމެއް ކަމަށާއި، އެހެންކަމުން ރަޝިއާއިން މި މެޗަށް ނުކުންނަނީ މޮޅުވާން މަޖުބޫރު މެޗެއްކަން ދަނެގެން ކަމަށެވެ. އަދި ބެލްޖިއަމް އަތުން ބަލިވުމުން ފާޑުކިއުންތަކެއް އަމާޒުވި ނަމަވެސް، އެކަމުން ޓީމުގެ ކުޅުންތެރިން މިހާރު އަރައިގަނެފައިވާ ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން 17:00 ގައި މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ބީ ގެ އެނަލިސްޓް މުޙައްމަދު ނިޒާމް (ނިޒާމްބެ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އަޙްމަދު ޝަރީފް (ޑުންގާ) ބައިވެރިވެވަޑައިގަންނަވާނެއެވެ.

ފިންލެންޑާއި ރަޝިއާ ބައްދަލުކުރާ މެޗު ފަށާނީ ބުދަ ދުވަހުގެ ހަވީރު ރާއްޖެ ގަޑިން ދަންވަރު 18:00 ގައެވެ.