އެރިކްސަންގެ ޝުކުރު އެންމެނަށް، "އުއްމީދުކަނޑައެއް ނުލާނަން"
15 ޖޫން 2021 | އަންގާރަ 11:34އެރިކަންސް މިހާރު އަންނަނީ ހޮސްޕިޓަލުގައި ފަރުވާ ހޯދަމުން
ޑެންމާކުގެ ތަޖުރިބާކާރު މިޑްފީލްޑަރު ކްރިސްޓަން އެރިކްސަން
ޔޫރޯ ފުޓުބޯޅަ މުބާރާތުގައި ހޮނިހިރު ދުވަހުގެރޭ ޑެންމާކާއި ފިންލެންޑް ބައްދަލުކުރި މެޗުގެ ތެރެއިން ހޭނެތިގެން ދަނޑު މައްޗަށް ވެއްޓުމުން ހޮސްޕިޓަލުން ފަރުވާ ހޯދަމުން އަންނަ ޑެންމާކުގެ ކްރިސްޓަން އެރިކްސަން އޭނާއަށް ހިތްވަރުދީ މެސެޖު ފޮނުވި އެންމެނަށް ޝުކުރުއަދާކޮށް ހާއްސަ މެސެޖެއް ދީފިއެވެ.
ޑެންމާކުގެ ކޯޕަންހޭގަންގައި ކުޅުނު މި މެޗުގެ 43 ވަނަ މިނެޓުގެ ތެރެއިން އެރިކްސަން ހޭނެތިގެން ދަނޑަށް ވެއްޓުމާއެކު ރެފުރީ ވަނީ ވަގުތުން މެޗު ހުއްޓާލައި، ސިއްހީ އެހީތެރިން ދަނޑަށް އަރުވާފައެވެ. ސިއްހީ އެހީތެރިން ދަނޑަށް އެރުމުގެ ކުރިން އެރިކްސަންއަށް ސީޕީއާރް ދިނީ ޑެންމާކުގެ ކެޕްޓަން ސިމޯން ކިއާއެވެ.
މިހާރު ހާލު ރަނގަޅުވަމުން އަންނަ އެރިކްސަން އޭނާގެ ސަޕޯޓަރުންނަށް ޝުކުރުއަދާކޮށް ނެރުނު ހާއްސަ މެސެޖުގައި ބުނީ އޭނާއަށް ހިތްވަރުދީ ހާލުބެލި އެންމެނަށް ޝުކުރުއަދާކުރާ ކަމަށެވެ. އަދި މިހާރު ކުރިއަށްވުރެ ހާލު ރަނގަޅު ކަމަށާއި، އުއްމީދުކަނޑާނުލާނެ ކަމުގެ ޔަގީންކަން އެންމެނަށް ދޭ ކަމަށެވެ.
އެރިކްސަންއަށް އޮތް ސަޕޯޓް މަޝްހޫރު ކުޅުންތެރިން ވަނީ ޔޫރޯގެ ތެރެއިންވެސް ދައްކާލާފައެވެ. އޭގެ ތެރޭގައި އޭނާއާއެކު އެއް ކްލަބަކަށް ކުޅެމުން އަންނަ ބެލްޖިއަމުގެ އިތުބާރު ފޯވާޑް ލުކާކޫ ވަނީ ލަނޑު ޖެހުމަށްފަހު އެ ލަނޑު އެރިކްސަންއަށް ހާއްސަކޮށްފައެވެ. މީގެ އިތުރުން ދަނޑުތަކަށް ވަންނަ ސަޕޯޓަރުން ވަނީ އެރިކްސަންއަށް އަވަސް ޝިފާއަކަށް އެދި ޕޯސްޓަރު ދައްކާލާފައެވެ. މީގެ އިތުރުން ޔޫރަޕުގެ ބޮޑެތި ކްލަބްތަކުންވެސް އަންނަނީ އެރިކްސަންއަށް ސަޕޯޓް އޮތްކަން ހާމަކޮށްފައެވެ.
