ޔޫރޯ 2020 - ޕޯޗުގަލާއި ހަންގޭރީގެ ކުރިމަތިލުން

ޔޫރޯ 2020 ގެ ކުޅުން ފެށިގެން ކުރިއަށްދާއިރު، މި މުބާރާތުގެ މަރުގެ ގްރޫޕުގެ ކުރިމަތިލުންތައް ފަށާނީ އަންގާރަ ދުވަހުގެރެއެވެ. މަރުގެ ގްރޫޕް ކަމަށްވާ ގްރޫޕް އެފް ގެ ފުރަތަމަ މެޗުގައި ވާދަކުރާނީ ޕޯޗުގަލާއި ހަންގޭރީއެވެ. މި މެޗު ކުޅޭނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައެވެ.

މި ފަހަރުގެ ޔޫރޯއާ ޕޯޗުގަލް ކުރިމަތިލާއިރު، އެ ގައުމަކީ މި މުބާރާތުގެ އެންމެ ފަހުގެ ޗެމްޕިއަނުންނެވެ. އެ ގައުމުން 2016 ވަނަ އަހަރު ފްރާންސްގައި ބޭއްވި މުބާރާތުގެ ޗެމްޕިއަންކަން ހޯދީ ފައިނަލް މެޗުގައި މުބާރާތް ބޭއްވި ގައުމު ކަމަށްވާ ފްރާންސް 1-0 ގެ ނަތީޖާއަކުން ބަލިކޮށްގެންނެވެ.

މި ފަހަރުގެ މަރުގެ ގްރޫޕުގައި ޕޯޗުގަލް ހިމެނޭއިރު، ޕޯޗުގަލާ ދެކޮޅަށް ނުކުންނަ ހަންގޭރީ ގްރޫޕް ސްޓޭޖުން ޖާގަ ހޯދާފައިވަނީ ޕްލޭއޮފް ކާމިޔާބުކޮށްގެންނެވެ. ޔޫރޯގެ ގްރޫޕް އެފް ގެ ފުރަތަމަ މެޗުގައި ޕޯޗުގަލާއި ހަންގޭރީ ބައްދަލުކުރާއިރު، މި ދެ ގައުމު ވަނީ 2016 ވަނަ އަހަރު ފްރާންސްގައި ބޭއްވި ޔޫރޯގަވެސް ވާދަކޮށްފައެވެ. އެ ފަހަރުގެ ގްރޫޕް ސްޓޭޖުގައި ކުޅުނު މެޗު ނިމުނީ 3-3 ގެ ނަތީޖާއަކުން ދެ ގައުމު އެއްވަރުވެގެންނެވެ. އަދި އެ ފަހަރުގެ ޔޫރޯގައި ހަންގޭރީ ވަނީ ޕޯޗުގަލް ހިމެނުނު ގްރޫޕުގެ އެއްވަނަވެސް ހޯދާފައެވެ.

ހަންގޭރީ މެޗުގެ ކުރިން ޕޯޗުގަލުގެ ކޯޗު ފެނާންޑޯ ސަންޓޯސް ބުނީ ޔޫރޯއަށް ޕޯޗުގަލުން ވަރަށް ރަނގަޅަށް ތައްޔާރުވެފައިވާ ކަމަށާއި، އަދި ޓީމު މިހާރު އޮތް ފޯމާ މެދު ވަރަށް ބޮޑަށް ހިތްހަމަޖެހޭ ކަމަށެވެ. އަދި އެ ޓީމުގައި އަނިޔާގެ މައްސަލައެއް ނެތް ކަމަށާއި، މި ވަގުތު ޕޯޗުގަލުގައި މި އޮތް ސްކޮޑަކީ ޔޫރޯގެ ތަށި ދިފާއުކުރެވޭ ފެންވަރުގެ ޓީމެއް ކަމަށްވެސް ވަނީ ބުނެފައެވެ. މީގެ އިތުރުން ޔޫރޯ މެޗުތަކުގައި ޕޯޗުގަލުގެ ތަޖުރިބާކާރު ކުޅުންތެރިން ކަމަށްވާ ޕެޕޭ އާއި ކެޕްޓަން ކްރިސްޓިއާނޯ ރޮނާލްޑޯގެ ތަޖުރިބާ މުހިންމު ކަމަށްވެސް ސަންޓޯސް ވަނީ ބުނެފައެވެ.

ހަންގޭރީގެ ކޯޗު މާކޯ ރޯސީ ބުނީ ޔޫރޯގެ ފުރަތަމަ މެޗުގައި އެންމެ ފަހުގެ ޗެމްޕިއަނުންނާ ޖެހުން އެއީ ބޭނުންވި ގޮތް ނޫން ކަމަށާއި، އަދި އެ ގްރޫޕުގައި ހިމެނޭ ޓީމުތަކީ ހަންގޭރީއަށްވުރެ ވަރުގަދަ ޓީމުތައް ކަމަށެވެ. އެހެންކަމުން ހަންގޭރީން މި މެޗުތަކަށް ނުކުންނާނީ އެކަމަށް ވިސްނައިގެން ކަމަށާއި، އަދި މި މުބާރާތަށް އޭނާގެ ޓީމުންވީ ތައްޔާރީތައް ރަނގަޅު ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން 20:00 ގައި މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އެފް ގެ އެނަލިސްޓް މައުރޫފް އަޙްމަދު (މާއްޓޭ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އަޙްމަދު ޝަރީފް (ޑުންގާ) ބައިވެރިވެވަޑައިގަންނަވާނެއެވެ.

ޕޯޗުގަލާއި ހަންގޭރީ ބައްދަލުކުރާ މެޗު ފަށާނީ އަންގާރަ ދުވަހުގެރޭ ރާއްޖެ ގަޑިން 21:00 ގައެވެ.