ސްޕެއިނާއި ސްވިޑެންގެ ކުރިމަތިލުން އެއްވަރު

ޔޫރޯ 2020 ގްރޫޕް އީ ގައި ސްފެއިނާއި ސްވިޑެން ބައްދަލުކުރި މެޗު އެއްވަރުވެގެން ނިމިއްޖެއެވެ.

ހޯމަ ދުވަހުގެރޭ ސެވިއްޔާގެއެސްޓާޑިއޯ ލަ ކަރްތޫޒާސްޓޭޑިއަމުގައި ކުޅުނު މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މެޗު ފަށައިގެން ސްޕެއިނުން ވަރުގަދަ އެޓޭކިން ގޭމެއް ކުޅުނުއިރު، މެޗުގެ 16 ވަނަ މިނެޓުގައި އެ ޓީމުގެ ޑަނީ އޮލްމޯ ވަނީ ނުރައްކާތެރި ހަމަލާއެއް ފޮނުވާލާފައެވެ. އެކަމަކު ހުހަށްހުރެ އޭނާ ބޮލުން ފޮނުވާލި ހަމަލާ ސްވިޑެންގެ ގޯލްކީޕަރު ރޮބިން އޯލްސެން ވަނީ ހުށިޔާރުކަމާއެކު ދިފާއުކޮށްފައެވެ. އޭގެ ފަހުން މެޗުގެ 23 ވަނަ މިނެޓުގައި ސްޕެއިނުގެ މިޑްފީލްޑަރު ކޮކޭ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގައި ސްޕެއިނަށް ލިބުން އެންމެ ހުސް ފުރުސަތު މެޗުގެ 38 ވަނަ މިނެޓުގައި ލިބުނީ އަލްވާރޯ މޮރާޓާއަށެވެ. އެކަމަކު ހުހަށްހުރެ އޭނާ ފޮނުވާލި ބޯޅަ ގޯލާ އަމާޒުނުވެ ދިޔައީ ބޭރަށެވެ. އޭގެ ފަހުން މެޗުގެ 41 ވަނަ މިނެޓުގައި ސްވިޑެނުން ވަނީ ސްޕެއިންގެ ގޯލަށް ނުރައްކާތެރި ހަމަލާއެއް ފޮނުވާލާފައެވެ. އަލެކްްޒެންޑަ އައިސަކް ފޮނުވާލި ހަމަލާ ސްޕެއިންގެ ޔޮރެންޓޭ ފައިގައި ޖެހިފައި އަމާޒުވީ ގޯލުގެ ދަނޑިއަށެެވެ.

މި މެޗުގެ ދެވަނަ ހާފުގައިވެސް ސްޕެއިނުން ވަނީ ސްވިޑެންގެ ގޯލާ އަމާޒުކޮށް ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 49 ވަނަ މިނެޓުގައި ސްޕެއިންގެ ފޯވާޑް މޮރާޓާއަށް ލަނޑު ޖަހަން ރަނުގެ ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ. އޭގެ ފަހުން މެޗުގެ 61 ވަނަ މިނެޓުގައި ސްވިޑެންއަށް ލަނޑު ޖަހަން ރަނުގެ ފުރުސަތެއް ލިބުނުއިރު، އެ ޓީމުގެ ފޯވާޑް މާކަސްް ބާގް ހުހަށްހުރެ ފޮނުވާލި ހަމަލާ ދިޔައީ ބޭރަށެވެ. އަދި މެޗު ނިމެން ގާތްވެފައިވަނިކޮށް ސްޕެއިންގެ ޖެރާޑް މޮރޭނޯއަށްވެސް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ.

މި ނަތީޖާއާއެކު މި ގްރޫޕްގެ އެއްވަނައިގައި އޮތީ ޕޮލެންޑު އަތުން މޮޅުވެ ތިން ޕޮއިންޓާއެކު ސްލޮވާކިއާއެވެ. ދެވަނަ އާއި ތިންވަނައިގައި އޮތް ސްޕެއިންނާއި ސްވިޑެންއަށް ލިބިފައިވަނީ އެއް ޕޮއިންޓެވެ.