ޔުއެފާ ޔޫރޯ 2020 ގެ ގްރޫޕް އީ ގެ ފުރަތަމަ މެޗުގައި ޕޮލެންޑް ބަލިކޮށް ސްލޮވާކިއާއިން ފެށުން ރަނގަޅުކޮށްފިއެވެ.

ހޯމަ ދުވަހުގެރޭ ސެއިންޓް ފީޓަސްބާގުގެކްރެސްޓޮވްސްކީސްޓޭޑިއަމުގައި ކުޅުނު މެޗު ސްލޮވާކިއާއިން ކާމިޔާބުކުރީ 2-1 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ 14 ވަނަ މިނެޓުގައި ސްލޮވާކިއާގެ މިޑްފީލްޑަރު އޮންްޑްރެއި ޑޫޑާ ވަނީ ނުރައްކާތެރި ހަމަލާއެއް ފޮނުވާލާފައެވެ. އެކަމަކު އޭނާ ފޮނުވާލި ހަމަލާ ގޯލުގެ އަރިމަތީ ދަނޑިކައިރިން ދިޔައީ ބޭރަށެވެ.

އޭގެ ފަހުން މެޗުގެ 18 ވަނަ މިނެޓުގައި ސްލޮވާކިއާއިން ވަނީ ލަނޑު ޖަހައި ލީޑު ނަގާފައެވެ. މިއީ ޕޮލެންޑުގެ ގޯލްކީޕަރު ވޮސިއެޗް ޝެޒްނީ އަތުން ބައިކޮޅަށް ވަން ލަނޑެކެވެ. މިއީ ޔޫރޯގެ ތާރީޚުގައި ގޯލްކީޕަރެއްގެ އަތުން ބައިކޮޅަށް ވަން ފުރަތަމަ ލަނޑެވެ. މި ލަނޑަށްފަހު ވެސް ސްލޮވާކިއާއިން ވަނީ ޕޮލެންޑްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ 27 ވަނަ މިނެޓުގައި އެ ޓީމުގެ ޔުރައި ކުޗްކާ ނުރައްކާތެރި ހަމަލާއެއް އުފެއްދިއިރު، އެ ހަމަލާ ދިޔައީ ގޯލުގެ މަތީ ދަނޑި ކައިރިން ބޭރަށެވެ.

މެޗުގެ ދެވަނަ ހާފުގެ ވަރަށް ކުރީކޮޅު ޕޮލެންޑުން ވަނީ ލަނޑު ޖަހައި ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކަރޮލް ލިނެޓީއެވެ. އެކަމަކު މި މެޗުގައި ޕޮލެންޑަށް މައްސަލަތަކެއް ދިމާވީ މެޗުގެ 62 ވަނަ މިނެޓުގައި އެޓީމުގެ ޒެގޮޒް ކްރިހޯވިއަކަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމާ ގުޅިގެންނެވެ. އޭގެ ފައިދާ ނަގައި ސްލޮވާކިއާއިން ވަނީ ލިބުނު ކޯނަރެއްގެ އެހީގައި ލަނޑު ޖަހާ ލީޑު އަލުން ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މިލާން ސްކްރިނިއާއެވެ.

މި ނަތީޖާއާއެކު ޕޮލެންޑުން މުބާރާތުގެ ފެށުން ރަނގަޅުކުރިއިރު، ޕޮލެންޑުން ދެން މުބާރާތުގައި ނުކުންނާނީ ސްވިޑެންއާ ދެކޮޅަށެވެ.