ޔޫރޯ 2020 ގެ މެޗުތައް ފެށިގެން ކުރިއަށްދާއިރު، ހޯމަ ދުވަހުގެރޭ ކުޅޭ މެޗުތަކުގެ ތެރެއިން އާންމުންގެ ލޯ އެންމެ ބޮޑަށް އަމާޒުވާނެ މެޗަކީ ސްޕެއިނާއި ސްވިޑެން ބައްދަލުކުރާ މެޗަށެވެ. މި މެޗު ކުޅޭނީ ސްޕެއިނުގެ ސެވިއްޔާގައި ހުންނަ އެސްޓާޑިއޯ ލަ ކަރްތޫޒާ ސްޓޭޑިއަމުގައެވެ.

މުބާރާތުގެ ފެވަރިޓުންގެ ތެރޭގައި ހިމެނޭ ސްޕެއިން މި މުބާރާތަށް ނުކުމެފައިވަނީ މުޅިން އައު ސްކޮޑަކާއެކުއޭ ބުންޏަސް ދޮގަކަށް ނުވާނެއެވެ. މި ފަހަރުގެ ސްކޮޑުގައި ސްޕެއިނުގެ ކެޕްޓަން ސާޖިއޯ ރާމޯސް ހިމަނާފައި ނުވާއިރު، މި މަހުގެ ކުރީކޮޅު ސްކޮޑުގައި ހިމެނުނު މިޑްފީލްޑަރު ސާޖިއޯ ބުސްކެޓްސް ވަނީ ކޮވިޑް-19 އަށް ޕޮޒިޓިވްވެފައެވެ.

ސްޕެއިންގެ ކޯޗު ލުއިސް އެންރީކޭއަށް މިއީ މާޔޫސްކަން ބޮޑު މުބާރާތެކެވެ. މުބާރާތް ފެށުމަށް ކުޑަތަން ވެފައިވަނިކޮށް މުހިންމު ދެ ކުޅުންތެރިން ކޮވިޑަށް ޕޮޒިޓިވްވެ، ޓީމުގެ ފަރިތަކުރުންތައް ހުއްޓާލަން ޖެހުނެވެ. އެކަމަކު އެންރީކޭ ބުނީ މި މެޗަށް އޭނާގެ ޓީމުން އޮތީ ފުރިހަމައަށް ތައްޔާރުވެފައި ކަމަށެވެ. އަދި ބުނީ ފަރިތަކުރަން ލިބުނު ވަގުތު މަދު ނަމަވެސް، އެކަން ޓީމުގެ ކުޅުމުން ނުދައްކާނެ ކަމަށާއި، އެއަށްވުރެ އޭނާގެ ކުޅުންތެރިން ކޮންފިޑެންސް ރަނގަޅުވާނެ ކަމަށެވެ.

ސްވިޑެންގެ ކޯޗު ޔާނީ އެންޑަސަން ބުނީ މި މެޗަށް ނުކުންނަނީ ސްޕެއިނަކީ މޮޅު ޓީމެއްކަން ދަނެގެން ކަމަށާއި، އެކަމަކު ސްޕެއިން ބަލިކޮށް މުބާރާތުގެ ފެށުން ރަނގަޅު ކުރުމަށް އޭނާގެ ކުޅުންތެރިން ތައްޔާރަށް ތިބި ކަމަށެވެ. މިފަހަރުގެ ޔޫރޯގައި ސްވިޑެންގެ އަމާޒަކީ ގްރޫޕް ސްޓޭޖް ފަހަނައަޅައި ދިޔުން ކަމަށްވެސް ބުންޏެވެ. އެންޑަސަން އިތުރަށް ބުނީ އޭނާގެ ޓީމުގައި އަނިޔާގެ މައްސަލައެއް ނެތް ކަމަށާއި، ހުރިހާ ކުޅުންތެރިންވެސް މެޗަށް ފިޓް ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އީ ގެ އެނަލިސްޓް އިމާދު ލަތީފެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއް ބައިވެރިވާނެއެވެ.

ސްޕެއިނާއި ސްވިޑެން ބައްދަލުކުރާ މެޗު ފަށާނީ ހޯމަ ދުވަހުގެރޭ ރާއްޖެ ގަޑިން 00:00 ގައެވެ.