ނޯތު މެސެޑޯނިއާ އަތުން އޮސްޓްރިއާއަށް މޮޅެއް

ޔޫރޯ 2020 ގެ ގްރޫޕް ސީ ގެ ފުރަތަމަ މެޗުގައި ނޯތު މެސެޑޯނިއާ އަތުން އޮސްޓްރިއާ މޮޅުވެއްޖެއެވެ.

އާދީއްތަ ދުވަހުގެރޭ ބުކަރެސްޓްގެ ނެޝަނަލް އެރީނާގައި ކުޅުނު މެޗުން އޮސްޓްރިއާ މޮޅުވީ 3-1 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 18 ވަނަ މިނެޓުގައި އޮސްޓްރިއާއިން ވަނީ ލަނޑު ޖަހާ ލީޑު ނަގައިފައެވެ. މާސެލް ސަބިޓްޒާގެ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ ކޮންރަޑް ލައިމާއެވެ.

މި ލަނޑާއެކު ނޯތު މެސެޑޯނިއާއިން އެ ޓީމުގެ ކުޅުން ރަނގަޅުކުރިއިރު، މެޗުގެ 28 ވަނަ މިނެޓުގައި އެ ޓީމުން ވަނީ ލަނޑު ޖަހާ ނަތީޖާ އެއްވަރުކޮށްފައެވެ. އޮސްޓްރިއާގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ގޯރަން ޕާންޑޭވްއެވެ.

މި މެޗުގެ ދެވަނަ ހާފު ފަށައިގެންވެސް ދެ ޓީމުގެ ފަރާތުން ފެނިގެންދިޔައީ ހަމަހަމަ ކުޅުމެކެވެ. އެކަމަކު މެޗުގެ 78 ވަނަ މިނެޓުގައި އޮސްޓްރިއާގެ މިކައެލް ގްރެގޮރިޗް ވަނީ ލަނޑު ޖަހައި އޮސްޓްރިއާއަށް އަލުން ލީޑު ނަގައިދީފައެވެ. އަދި މެޗު ނިމެން މިނެޓަކަށް ވެފައި ވަނިކޮށް މާކޯ އަނައުޓޮވިޗް ވަނީ އިތުރު ލަނޑެއް ޖަހާ އޮސްޓްރިއާއަށް ލީޑު ފުޅާކޮށްދީފައެވެ.

މި ފަހަރުގެ ޔޫރޯއަކީ ނޯތު މެސެޑޯނިއާއިން ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެވެ.