ޔޫރޯ 2020 - އޮސްޓްރިއާ އާއި ނޯތު މެސެޑޯނިއާގެ ކުރިމަތިލުން

ޔޫރަޕުގައި ބާއްވާ އެންމެ ޝަރަފުވެރި ފުޓްބޯޅަ މުބާރާތް ފެށިގެން ކުރިޔަށްދާއިރު، މި މުބާރާތުގެ ގްރޫޕް ސީ ގެ މެޗުތައް ފަށާނީ އާދީއްތަ ދުވަހުގެރެއެވެ. ގްރޫޕް ސީގެ ފުރަތަމަ މެޗުގައި އޮސްޓްރިއާ އާއި ނޯތު މެސެޑޯނިއާ ބައްދަލުކުރާއިރު، މި މެޗު ކުޅުމަށް ހަމަޖެހިފައިވަނީ ރުމޭނިއާގެ ވެރިރަށް ބުކަރެސްޓުގެ ނެޝަނަލް އެރީނާގައެވެ.

ޔޫރޯގައި އޮސްޓްރިއާ އާއި ނޯތު މެސެޑޯނިއާ ބައްދަލުކުރާއިރު، މި ދެ ގައުމު ވަނީ 2019 ވަނަ އަހަރު ދެ ފަހަރު ބައްދަލުކޮށްފައެވެ. އެ ދެ މެޗުންވެސް މޮޅުވީ އޮސްޓްރިއާއެވެ.

ނޯތު މެސެޑޯނިއާގެ ކޯޗު އީގޯ އަންގްލޮވްސްކީ ބުނީ އެ ގައުމަކީ މި މުބާރާތަށް އައު ޓީމަކަށް ވެދާނެ ކަމަށާއި، އެކަމަކު އެކަމާ އޭނާގެ ކުޅުންތެރިން ޖެހިލުން ނުވާނެ ކަމަށެވެ. އަދި މި މުބާރާތަށް ނޯތު މެސެޑޯނިއާ އާވުމަކީ ކުޅުންތެރިންނަށް ލިބޭނެ އިތުރު ހިތްވަރެއް ކަމަށްވެސް ވަނީ ބުނެފައެވެ. އަދި އޮސްޓްރިއާ މެޗަށް ނޯތު މެސެޑޯނިއާއިން ވަރަށް ރަނގަޅަށް ތައްޔާރުވެފައިވާ ކަމަށްވެސް ވަނީ ބުނެފައެވެ.

އޮސްޓްރިއާގެ ކޯޗު ފްރެންކޯ ފޯޑާ ބުނީ ގްރޫޕް ސީ ގައި ހިމެނެނީ ހަމަހަމަ ޓީމުތަކެއް ކަމަށާއި، އޮސްޓްރިއާއިން މި މުބާރާތާ ކުރިމަތިލީ ވަކި އަމާޒެއް އޮވެގެން ކަމަށެވެ. އެގޮތުން އޮސްޓްރިއާގެ އަމާޒަކީ ގްރޫޕް ސްޓޭޖް ފަހަނައަޅާ ދިޔުން ކަމަށް ފޯޑާ ބުންޏެވެ. އަދި މި މެޗަށް ނުކުންނައިރު އޭނާއަށް އެއްވެސް ޕްރެޝަރެއް ނެތް ކަމަށާއި، ހުރިހާ ވިސްނުމެއްވެސް ހުރީ މުބާރާތުގައި ކުޅޭ ފުރަތަމަ މެޗު ކާމިޔާބުކުރުމަށް ކަމަށްވެސް ފޯޑާ ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ސީ ގެ އެނަލިސްޓު އިހުސާން އަބްދުލް ޣަނީ (ސާންތި) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއް ބައިވެރިވާނެއެވެ.

އޮސްޓްރިއާ އާއި ނޯތު މެސެޑޯނިއާ ބައްދަލުކުރާ މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން 21:00 ގައެވެ.