ލުކާކޫގެ ދެ ލަނޑާއެކު ބެލްޖިއަމުން ފެށުން ރަނގަޅުކޮށްފި

ޔޫރޯ 2020 ގެ ގްރޫޕް ބީ ގެ ދެވަނަ މެޗުގައި ރަޝިއާ ބަލިކޮށް ބެލްޖިއަމުން ފެށުން ރަނގަޅު ކޮށްފިއެވެ.

ސެއިންޓް ޕީޓަސްބާގުގެ ކްރެސްޓޮވްސްކީ ސްޓޭޑިއަމުގައި ހޮނިހިރު ދުވަހުގެރޭ ކުޅުނު މެޗު ބެލްޖިއަމުން ކާމިޔާބުކުރީ 3-0 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު ބެލްޖިއަމުން ވަނީ ލަނޑު ޖަހާ ލީޑު ނަގާފައެވެ. ރަޝިއާގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ މެޗުގެ 10 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮމޭލޫ ލުކާކޫއެވެ. މި ލަނޑަށްފަހު ބެލްޖިއަމުން ރަޝިއާގެ ހާފަށް ބާރު ބޮޑު ކުރިއިރު، މެޗުގެ 34 ވަނަ މިނެޓުގައި ބެލްޖިއަމުން ވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ތޯމަަސް މުނިއޭއެވެ.

މެޗުގެ ދެވަނަ ހާފު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ދެ ޓީމަށްވެސް މާކަ އެދެވޭ ހަމަލާއެއް ގޯލާ އަމާޒުކޮށް ފޮނުވާލެވިފައެއް ނުވެއެވެ. އެކަމަކު މެޗުގެ 88 ވަނަ މިނެޓުގައި ލުކާކޫ ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އޭނާ ކާމިޔާބުކުރީ ތޯމަސް މުނިއޭގެ އެހީތެރިކަމާއެކުގައެވެ. މިއީ ލުކާކޫ ބެލްޖިއަމަށް ކާމިޔާބު ކޮށްދިން 62 ވަނަ ލަނޑެވެ.

މި ނަތީޖާއާއެކު ގްރޫޕް ބީގެ އެއްވަނައިގައި ބެލްޖިއަމް އޮތީ ލިބުނު ތިން ޕޮއިންޓާއެކުގައެވެ. ހޮނިހިރު ދުވަހުގެރޭ ޑެންމާކު ބަލިކުރި ފިންލެންޑަށްވެސް ތިން ޕޮއިންޓް ލިބިފައިވާއިރު، ބެލްޖިއަމަށް އެއްވަނަ ލިބެނީ ލަނޑުގެ ތަފާތުންނެވެ.