ކުރިން މައްސަލަ ބަލާފައިވާނަމަ އިންތިގާލީ އިންސާފު ހޯދަން ހުށަހަޅަންޖެހޭނީ އައު ހެކިތަކާއެކު
12 ޖޫން 2021 | ހޮނިހިރު 04:541 ޖެނުއަރީ 1953ން ފެށިގެން 17 ނޮވެމްބަރ 2018އާ ހަމައަށް ހިނގާފައިވާ މިފަދަ މައްސަލަތައް ބަލާނެ
އިންތިގާލީ އިންސާފުގެ އޮމްބަޑްސްޕާރސަންގެ އޮފީހުން ފަލަ ސުރުޚީ ޕްރޮގްރާމްގައި މަޢުލޫމާތުދެނީ
ކުރިން މައްސަލަ ބަލާފައިވާނަމަ މިހާރު އިންތިގާލީ އިންސާފު ހޯދަން ހުށަހަޅަންޖެހޭނީ އައު ހެކިތަކާއެކުކަމަށް އިންތިގާލީ އިންސާފުގެ އޮމްބަޑްސްޕާރސަންގެ އޮފީހުން ބުނެފިއެވެ.
އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުގެ މަސައްކަތްތަކުގެ މަޢުލޫމާތު ރާއްޖެޓީވީގެ ފަލަ ސުރުޚީ ޕްރޮގްރާމްގައި ހިއްސާކުރައްވަމުން އޮމްބަޑްސްޕާރސަން ޖިހާދާ އަނީސް ވަނީ އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުން މަސައްކަތް ކުރާގޮތުގެ ތަފުސީލު ހިއްސާކުރައްވާފައެވެ. ޖިހާދާ ވިދާޅުވީ، އޮމްބަޑްސްޕާރސަންގެ އޮފީހަށް ހުށަހެޅޭނީ، ދައުލަތުގެ މުއައްސަސާއަކުން ނިޒާމީ ސިފައެއްގައި ރާވައި ހިންގި އަމަލެއްގެ ސަބަބުން ނުވަތަ އެފަދަ އަމަލެއްގެ ނަތީޖާއެއްގެ ސަބަބުން އިންސާނީ ހައްގެއް ނުވަތަ އަސާސީ ހައްގެއް ނިގުޅައިގެންފައިވާ މައްސަލަތައްކަމަށެވެ. އެގޮތުން 1 ޖެނުއަރީ 1953ން ފެށިގެން 17 ނޮވެމްބަރ 2018 އާ ހަމައަށް ހިނގާފައިވާ މިފަދަ މައްސަލަތައް އެ އޮފީހުން ބަލާނެ ކަމަށް ޖިހާދާ ވިދާޅުވިއެވެ.
މި މުއްދަތުގެ ތެރޭގައި ހިނގާ މީގެ ކުރިން އެހެން މުއައްސަސާއަކުން މައްސަލަ ބަލާފައިވާނަމަވެސް، މައްސަލަ ހުށަހެޅޭނެކަމަށް ޖިހާދާ ވިދާޅުވިއެވެ. އެހެންނަމަވެސް، ކުރިން މައްސަލަ ބަލާފައިވާނަމަ އިންތިގާލީ އިންސާފު ހޯދަން މިހާރު ހުށަހަޅަންޖެހޭނީ އައު ހެކިތަކާއެކުކަމަށް ވިދާޅުވިއެވެ. މިގޮތަށް ހުށަހެޅުމުން ކުރިއަށް އޮތް ދެ އަހަރުގެ ތެރޭގައި މިފަދަ މައްސަލަތައް ބަލައި އިންސާފު ހޯދައިދިނުމަށް މަސައްކަތް ކުރައްވާނެ ކަމަށް ވިދާޅުވިއެވެ. އަދި ލިބިފައިވާ ގެއްލުމުގެ ބަދަލު ހޯދައިދީ، އެފަދަ އަމަލުތައް ހިނގަން މެދުވެރިވާ ސަބަބުތައް ދެނެގަންނަން މަސައްކަތް ކުރައްވައި، އެކަންކަން ތަކުރާރު ނުކުރުމަށް އެ މުއައްސަސާއަކަށް އެންގޭނެކަން ޖިހާދާ ފާހަގަކުރެއްވިއެވެ.
މިކަމަށް ހޭލުންތެރި ކުރުމުގެ ޕްރޮގްރާމްތައް ކުރިއަށް ރޭވިފައި އެބަހުރި ކަމަށާއި، އެންމެ ބޮޑު އަމާޒަކީ ހައްގުތައް ކަށަވަރު ކޮށްދިނުންކަންވެސް ޖިހާދާ ފާހަގަކުރެއްވިއެވެ.
އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުން މައްސަލަ ބެލުމަށް ގަވައިދުތައް މިހާރު ވަނީ އެކުލަވާލާފައެވެ. މި ކަމުގައި ދައުލަތުގެ ހުރިހާ މުއައްސަސާއަކުން ވެސް އެއްބާރުލުން ލިބޭނެ ކަމުގެ ޔަގީންކަން ލިބިފައިވާ ކަމަށް އެ އޮފީހުން ބުނެއެވެ. އާއްމުން ހުށަހަޅާ މައްސަލަތަކުގެ އިތުރުން އަމިއްލައަށް އިސްނަގައިގެން ވެސް މައްސަލަ ބެލުމުގެ ބާރު އެ އޮފީހަށް ލިބިގެންވާއިރު، އެގޮތަށް ބަލާނީ ޕަބްލިކް އިންޓަރެސްޓް ހިމެނޭ މައްސަލަތައްކަަމަށް އެ އޮފީހުން ބުނެއެވެ. ޕަބްލިކް ހިއަރިން އަކަށް ދާން ޖެހޭ މައްސަލަތަކުގައި އެކަން އެގޮތަށް ކުރާނެ ކަމަށް ވެސް އެ އޮފީހުން ވަނީ މައުލޫމާތުދީފައެވެ.
މައްސަލަ ބަލައި ދައުވާކުރުމުގެ ބާރު ލިބިގެންވީ ނަމަވެސް ބޮޑަށް ބަލާނީ، ދެފަރާތް ސުލްހަ ކުރުމަށެވެ. އެހެންނަމަވެސް އެކަމުން ހައްލު ނުލިބިއްޖެނަމަ، ޖިނާއީ ދައުވާ ކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާއި، ތަހުގީގުކުރި މައްސަލައެއްގެ މަދަނީ ގެއްލުމުގެ ބަދަލު ހޯދުމާއި، މުދަލާއި ފައިސާ އަނބުރާ ހޯދުމުގެ ކަންކަން ހިމެނޭނަމަ، ފިޔަވަޅު އެޅުމަށް ޓަކައި އެޓަރނީ ޖެނެރަލްގެ އޮފީހަށް ފޮނުވުމުގެ ބާރު އެ އޮފީހަށް ލިބިގެންވެއެވެ.
