ޔޫރޯ 2020 - ޑެންމާކާއި ފިންލެންޑުގެ ކުރިމަތިލުން
ޑެންމާކާއި ފިންލެންޑް ވަނީ 59 ފަހަރު ބައްދަލުކޮށްފައި
ފިންލެންޑް މެޗުގެ ކުރިން ޑެންމާކުން ކުރިއަށްގެންދިޔަ ތަމްރީނުތަކުގެ ތެރެއިން
ޔޫރަޕުގެ އެންމެ ޝަރަފުވެރި ފުޓްބޯޅަ މުބާރާތުގެ ކުޅުން ހުކުރު ދުވަހުގެރޭ ފަށާފައިވާއިރު، މި މުބާރާތުގެ ގްރޫޕް ބީ ގެ މެޗުތައް ހޮނިހިރު ދުވަހުގެރޭ ފަށާނެއެވެ. އޭގެ ތެރެއިން ގިނަ ބެލުންތެރިންގެ ލޯ ހުއްޓިފައިވާ އެއް މެޗަކީ ގްރޫޕް ބީ ގައި ޑެންމާކާއި ފިންލެންޑް ބައްދަލުކުރާ މެޗަށެވެ. މި މެޗު ކުޅޭނީ ޑެންމާކުގެ ޕާކެން ސްޓޭޑިއަމްގައެވެ. މި މެޗަށް ދަނޑުގެ 25 އިންސައްތަ މީހުން ވެއްދުމަށް ޑެންމާކުން ވަނީ ނިންމާފައެވެ.
މެޗުގެ ފަހު ފަރިތަކުރުންތައް ޑެންމާކުން ހުކުރު ދުވަހުގެ ހަވީރު ނިންމާލާފައިވާއިރު، މި ފަރިތަކުރުންތަކުގައި އިތުބާރު ފޯވާޑް ރޮބާޓް ސްކޯވްވެސް ވަނީ ބައިވެރިވެފައެވެ. މީގެ ކުރިން ބެލެވިފައި އޮތީ އަނިޔާގެ ސަބަބުން ގްރޫޕް ސްޓޭޖުގެ ދެ މެޗު އޭނާއަށް ގެއްލޭނެ ކަމަށެވެ.
މީގެ ކުރިން ޑެންމާކާއި ފިންލެންޑް 59 ފަހަރު ބައްދަލުކޮށްފައިވާއިރު، އޭގެ ތެރެއިން 38 މެޗުން ޑެންމާލް ވަނީ މޮޅުވެފައެވެ. އަދި 10 މެޗު އެއްވަރުވެގެން ނިމުނުއިރު، އަނެއް 11 މެޗުން ފިންލެންޑް ވަނީ މޮޅުވެފައެވެ.
ޑެންމާކުގެ ކޯޗު ކެސްޕަ ހިލްމަންޑް ބުނީ ޓީމުގެ ފަރިތަކުރުންތައް އެންމެ ބޭނުންވި ގޮތަށް ނުކުރެވުނު ނަމަވެސް، ފިންލެންޑް މެޗަށް ނުކުންނާނީ ބަލިވާން ނޫން ކަމަށެވެ. އަދި މި މުބާރާތުގައި ކުޅޭ ކޮންމެ މެޗެއްވެސް ކުޅޭނީ މޮޅުވުމުގެ ރޫހުގައި ކަމަށާއި، އަމާޒަކީ ގްރޫޕް ސްޓޭޖު ފަހަނައަޅައި ދިޔުން ކަމަށްވެސް ވަނީ ބުނެފައެވެ.
މެޗުގެ ކުރިން ވާހަކަ ދައްކަމުން ފިންލެންޑުގެ ކޯޗު މާކިން ކެނޭވާ ބުނީ މި މެޗަށް ނުކުންނައިރު އޮތް އެންމެ ބޮޑު ހިތްހަމަޖެހުމަކީ ޓީމުގެ ހުރިހާ ކުޅުންތެރިންވެސް ފިޓްކޮށް ތިބުން ކަމަށެވެ. އަދި މެޗަށް ނުކުންނައިރު އެ ޓީމުން ފުރަތަމަ އެގާރާގައި ކުޅޭނެ ކުޅުންތެރިން އަދި ނުނިންމާ ކަމަށާއި، ހުރިހާ ކުޅުންތެރިންވެސް އޭނާއަށް ހަމަހަމަ ކަމަށްވެސް ބުންޏެވެ. އަދި ޑެންމާކް މެޗުގައި ވިސްނާނީ ލިބޭ ފުރުސަތުތަކުގައި ބޭނުން ހިފުމަށް ކަމަށާއި، އެކަމަށް ފަރިތަކުރުންތަކުގައި އިސްކަން ދީފައިވާނެ ކަމަށްވެސް ވަނީ ބުނެފައެވެ.
ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑް ކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އެގޮތުން މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ބީ ގެ އެނަލިސްޓު މުޙައްމަދު ނިޒާމް (ނިޒާމްބެ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްވެސް ބައިވެރިވާނެއެވެ.
ޑެންމާކާއި ފިންލެންޑް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ 21:00 ގައެވެ.
